سعد بن ابی وقاص (رض) کہتے ہیں کہ رسول اللہ ﷺ نے فرمایا : جو شخص قرآن خوش الحانی سے نہ پڑھے، وہ ہم میں سے نہیں ١ ؎۔ تخریج دارالدعوہ : تفرد بہ أبوداود، (تحفة الأشراف : ٣٩٠٥، ١٨٦٩٠) ، وقد أخرجہ : مسند احمد (١/١٧٢، ١٧٥، ١٧٩) ، سنن الدارمی/فضائل القرآن ٣٤ (٣٥٣١) (صحیح ) وضاحت : ١ ؎ : امام خطابی نے اس کے تین معانی بیان کئے ہیں : ایک یہی ترتیل اور حسن آواز، دوسرے : قرآن کے ذریعہ دیگر کتب سے استغناء (دیکھئے نمبر : ١٤٧٢) ، تیسرے : عربوں میں رائج سواری پر حدی خوانی کے بدلے قرآن کی تلاوت۔

اس سند سے بھی سعد (رض) سے اسی کے مثل حدیث مرفوعاً مروی ہے۔ تخریج دارالدعوہ : انظر ما قبلہ، (تحفة الأشراف : ٣٩٠٥، ١٨٦٩٠) (صحیح )

عبیداللہ بن ابی یزید کہتے ہیں ہمارے پاس سے ابولبابہ (رض) کا گزر ہوا تو ہم ان کے پیچھے ہو لیے یہاں تک کہ وہ اپنے گھر کے اندر داخل ہوگئے تو ہم بھی داخل ہوگئے تو دیکھا کہ ایک شخص بیٹھا ہوا ہے۔ بوسیدہ سا گھر ہے اور وہ بھی خستہ حال ہے، میں نے سنا : وہ کہہ رہا تھا کہ میں نے رسول اللہ ﷺ کو کہتے ہوئے سنا ہے : جو قرآن کو خوش الحانی سے نہ پڑھے وہ ہم میں سے نہیں ہے ۔ عبدالجبار کہتے ہیں : میں نے ابن ابی ملیکہ سے کہا : اے ابو محمد ! اگر کسی کی آواز اچھی نہ ہو تو کیا کرے ؟ انہوں نے جواب دیا : جہاں تک ہو سکے اسے اچھی بنائے۔ تخریج دارالدعوہ : تفرد بہ أبوداود، (تحفة الأشراف : ٣٩٠٥) (حسن صحیح )

محمد بن سلیمان انباری کا بیان ہے، وہ کہتے ہیں وکیع اور ابن عیینہ نے کہا ہے کہ اس کا مطلب یہ ہے کہ قرآن کے ذریعہ (دیگر کتب یا ادیان سے) بےنیاز ہوجائے۔ تخریج دارالدعوہ : تفرد بہ أبو داود، (تحفة الأشراف : ٣٩٠٥) (صحیح )

ابوہریرہ (رض) سے روایت ہے کہ رسول اللہ ﷺ نے فرمایا : اللہ تعالیٰ کسی کی اتنی نہیں سنتا جتنی ایک خوش الحان رسول کی سنتا ہے جب کہ وہ قرآن کو خوش الحانی سے بلند آواز سے پڑھ رہا ہو ۔ تخریج دارالدعوہ : صحیح البخاری/فضائل القرآن ١٩ (٥٠٢٤) ، والتوحید ٣٢ (٧٤٨٢) ، ٥٢ (٧٥٤٤) ، صحیح مسلم/المسافرین ٣٤ (٧٩٢) ، سنن النسائی/الافتتاح ٨٣ (١٠١٨) ، (تحفة الأشراف : ١٤٩٩٧) ، وقد أخرجہ : مسند احمد (٢/٢٧١، ٢٨٥، ٤٥٠) ، سنن الدارمی/الصلاة ١٧١ (١٥٢٩) ، و فضائل القرآن ٣٣ (٣٥٤٠) (صحیح )

سعد بن عبادہ (رض) کہتے ہیں کہ رسول اللہ ﷺ نے فرمایا : جو بھی آدمی قرآن پڑھتا ہو پھر اسے بھول جائے تو قیامت کے دن وہ اللہ سے مجذوم ١ ؎ ہو کر ملے گا ۔ تخریج دارالدعوہ : تفرد بہ أبوداود، (تحفة الأشراف : ٣٨٣٥) ، وقد أخرجہ : مسند احمد (٥/٢٨٤، ٢٨٥، ٣٢٣) ، سنن الدارمی/فضائل القرآن ٣ (٣٣٨٣) (ضعیف) (اس کے راوی یزید ضعیف ہیں ، نیز : عیسیٰ نے اسے براہ راست سعد بن عبادہ (رض) سے نہیں سنا ہے ) وضاحت : ١ ؎ : کوڑھ کے سبب جس کے ہاتھ کٹ کر گرگئے ہوں۔

عمر بن خطاب (رض) کہتے ہیں کہ میں نے ہشام بن حکیم بن حزام (رض) کو سورة الفرقان پڑھتے سنا، وہ اس طریقے سے ہٹ کر پڑھ رہے تھے جس طرح میں پڑھتا تھا حالانکہ مجھے خود رسول اللہ ﷺ نے پڑھایا تھا تو قریب تھا کہ میں ان پر جلدی کر بیٹھوں ١ ؎ لیکن میں نے انہیں مہلت دی اور پڑھنے دیا یہاں تک کہ وہ فارغ ہوگئے تو میں نے ان کی چادر پکڑ کر انہیں گھسیٹا اور انہیں لے کر رسول اللہ ﷺ کی خدمت میں حاضر ہوا، میں نے عرض کیا : اللہ کے رسول ! میں نے انہیں سورة الفرقان اس کے برعکس پڑھتے سنا ہے جس طرح آپ نے مجھے سکھائی ہے، رسول اللہ ﷺ نے ہشام سے فرمایا : تم پڑھو ، انہوں نے ویسے ہی پڑھا جیسے میں نے پڑھتے سنا تھا، اس پر رسول اللہ ﷺ نے فرمایا : یہ اسی طرح نازل ہوئی ہے ، پھر مجھ سے فرمایا : تم پڑھو ، میں نے بھی پڑھا، آپ ﷺ نے فرمایا : اسی طرح نازل ہوئی ہے ، پھر فرمایا : قرآن مجید سات حرفوں ٢ ؎ پر نازل ہوا ہے، لہٰذا جس طرح آسان لگے پڑھ ۔ تخریج دارالدعوہ : صحیح البخاری/الخصومات ٤ (٢٤١٩) ، و فضائل القرآن ٥ (٤٩٩٢) ، ٢٧ (٥٠٤١) ، والمرتدین ٩ (٦٩٣٦) ، والتوحید ٥٣ (٧٥٥٠) ، صحیح مسلم/المسافرین ٤٨ (٨١٨) ، سنن الترمذی/القراء ات ١١ (٢٩٤٣) ، سنن النسائی/الافتتاح ٣٧ (٩٣٨، ٩٣٩) ، (تحفة الأشراف : ١٠٥٩١) ، وقد أخرجہ : موطا امام مالک/ القرآن ٤ (٥) ، مسند احمد (١/ ٤٠، ٤٢، ٤٣، ٢٦٣) (صحیح ) وضاحت : ١ ؎ : یعنی انہیں قرات سے روک دوں۔ ٢ ؎ : علامہ سیوطی نے ” الاتقان “ میں اس کی تفسیر میں متعدد اقوال نقل کئے ہیں مثلاً سات حرفوں سے مراد سات لغات ہیں یا سات لہجے ہیں جو عرب کے مختلف قبائل میں مروج تھے یا سات قراتیں ہیں جنہیں قرات سبعہ کہا جاتا ہے وغیرہ وغیرہ۔

زہری کہتے ہیں کہ یہ حروف (اگرچہ بظاہر مختلف ہوں) ایک ہی معاملہ سے تعلق رکھتے ہیں، ان میں حلال و حرام میں اختلاف نہیں۔ تخریج دارالدعوہ : انظر ما قبلہ (صحیح )

ابی بن کعب (رض) کہتے ہیں کہ نبی اکرم ﷺ نے فرمایا : ابی ! مجھے قرآن پڑھایا گیا، پھر مجھ سے پوچھا گیا : ایک حرف پر یا دو حرف پر ؟ میرے ساتھ جو فرشتہ تھا، اس نے کہا : کہو : دو حرف پر، میں نے کہا : دو حرف پر، پھر مجھ سے پوچھا گیا : دو حرف پر یا تین حرف پر ؟ اس فرشتے نے جو میرے ساتھ تھا، کہا : کہو : تین حرف پر، چناچہ میں نے کہا : تین حرف پر، اسی طرح معاملہ سات حروف تک پہنچا ، آپ ﷺ نے فرمایا : ان میں سے ہر ایک حرف شافی اور کافی ہے، چا ہے تم سميعا عليما کہو یا عزيزا حكيما جب تک تم عذاب کی آیت کو رحمت پر اور رحمت کی آیت کو عذاب پر ختم نہ کرو ۔ تخریج دارالدعوہ : تفرد بہ ابوداود ، (تحفة الأشراف : ٢٥) ، وقد أخرجہ : مسند احمد (٥ /١٢٤، ١٢٧، ١٢٨) (صحیح )

ابی بن کعب (رض) سے روایت ہے کہ نبی کریم ﷺ بنی غفار کے تالاب کے پاس تھے کہ آپ کے پاس جبرائیل (علیہ السلام) تشریف لائے اور فرمایا : اللہ عزوجل آپ کو حکم دے رہا ہے کہ آپ اپنی امت کو ایک حرف پر قرآن پڑھائیں ، آپ ﷺ نے فرمایا : میں اللہ سے اس کی بخشش اور مغفرت مانگتا ہوں، میری امت اتنی طاقت نہیں رکھتی ہے ، پھر دوبارہ آپ ﷺ کے پاس آئے اور اسی طرح سے کہا، یہاں تک کہ معاملہ سات حرفوں تک پہنچ گیا، تو انہوں نے کہا : اللہ آپ کو حکم دے رہا ہے کہ آپ اپنی امت کو سات حرفوں پر پڑھائیں، لہٰذا اب وہ جس حرف پر بھی پڑھیں گے وہ صحیح ہوگا ۔ تخریج دارالدعوہ : صحیح مسلم/المسافرین ٤٨ (٨٢١) ، سنن النسائی/الافتتاح ٣٧ (٩٤٠) ، (تحفة الأشراف : ٦٠) ، وقد أخرجہ : مسند احمد (٥/١٢٧) (صحیح )

نعمان بن بشیر (رض) کہتے ہیں کہ نبی اکرم ﷺ نے فرمایا : دعا عبادت ہے ١ ؎، تمہارا رب فرماتا ہے : مجھ سے دعا کرو، میں تمہاری دعا قبول کروں گا (سورۃ غافر : ٦٠) ۔ تخریج دارالدعوہ : سنن الترمذی/تفسیر البقرة ٣ (٢٩٦٩) ، تفسیر المؤمن ٤١ (٣٢٤٧) ، الدعوات ١ (٣٣٧٢) ، ن الکبری/ التفسیر (١١٤٦٤) ، سنن ابن ماجہ/الدعاء ١ (٣٨٢٨) ، (تحفة الأشراف : ١١٦٤٣) ، وقد أخرجہ : مسند احمد (٤/٢٧١، ٢٧٦) (صحیح ) وضاحت : ١ ؎ : دعا جب عبادت ہے تو غیر اللہ سے دعا کرنا شرک ہوگا، کیونکہ عبادت و بندگی کی جملہ قسمیں اللہ ہی کو زیب دیتی ہیں۔