29501 ۔۔۔ سیدنا حضرت عمر بن خطاب (رض) نے فرمایا : دین کے متعلق رائے قائم کرنے سے ڈرو چنانچہ رسول اللہ (صلی اللہ علیہ وآلہ وسلم) کی رائے درست ہوئی تھی چونکہ اللہ تعالیٰ انھیں درست رائے سے نوازتے تھے اب ہماری رائے محض تکالیف اور ظن ہے جبکہ ظن حق کا فائدہ نہیں دیتا ۔ (رواہ ابن ابی حاتم البیہقی وابن عبدالبر فی العلم)

29502 ۔۔۔ عمروبن دینار کی روایت ہے کہ ایک شخص نے سیدنا حضرت عمر بن خطاب (رض) سے عرض کی : اللہ تعالیٰ آپ کو کیا رائے دیتے ہیں ؟ آپ (رض) نے فرمایا ! یہ نبی کریم (صلی اللہ علیہ وآلہ وسلم) کی خصوصیت تھی ۔ (رواہ ابن المنذر)

29503 ۔۔۔ سیدنا حضرت عمر بن خطاب (رض) کی روایت ہے کہ علم تین چیزوں کے لیے نہ حاصل کیا جائے اور تین چیزوں کے لیے نہ چھوڑا جائے چنانچہ علم مقابلہ کرنے کے لیے فخر کرنے کے لیے اور ریاکاری کے لیے نہ حاصل کیا جائے ، علم سے حیاء کرنے کی وجہ سے علم سے بےرغبتی کی وجہ سے اور جہالت پر راضی رہنے کی وجہ سے علم کو نہ چھوڑا جائے ۔ (ابن ابی الدنیا)

29504 ۔۔۔ عطاء بن عجلان کی روایت ہے کہ سیدنا حضرت عمر بن خطاب (رض) نے فرمایا عین ممکن ہے کہ یہ علم بہت اٹھا لیا جائے لہٰذا جس کے پاس جو علم ہو وہ اسے پھیلا لے غلو سے بچے اور سرکشی اور تکبر سے گریز کرے ۔ (رواہ ابو عبداللہ بن مندہ فی مسند ابراھیم بن ادھم عبدالرزاق)

29505 ۔۔۔ ابن سیرین کی روایت ہے کہ سیدنا حضرت عمر بن خطاب (رض) نے حضرت موسیٰ (رض) سے فرمایا : مجھے خبر پہنچی ہے کہ تم لوگوں کو فتوے دیتے ہو حالانکہ تم امیر نہیں ہو ؟ ابو موسیٰ نے جواب دیا جی ہاں میں ایسا کرتا ہوں سیدنا حضرت عمر بن خطاب (رض) نے فرمایا : یہ ذمہ داری اسی کو سونپو جو امارت کا بوجھ اٹھائے ہوئے ہے۔ (رواہ عبدالرزاق والدینوری فی المجالسۃ وابن عبدالبرفی العلم وابن عساکر)

29506 ۔۔۔ مکحول کی روایت ہے کہ سیدنا حضرت عمر بن خطاب (رض) لوگوں کو احادیث سناتے جب آپ (رض) دیکھتے کہ لوگ تھک گئے ہیں اور اکتانے لگے ہیں تو لوگوں کو باغات میں لے جا کر کام پر لگا دیتے ۔ (رواہ ابن السمعانی) اتفاق رائے پیدا کرنا :

29507 ۔۔۔ ابو حصین کی روایت ہے کہ صحابہ کرام رضوان اللہ تعالیٰ عنہم اجمعین میں سے کوئی ایک فتوی دیتا اگر کوئی مسئلہ سیدنا حضرت عمر بن خطاب (رض) کے سامنے پیش کیا جاتا تو آپ (رض) اس مسئلہ کے حل کے لیے اہل بدر کو جمع کرتے ۔ (رواہ ابن عساکر)

29508 ۔۔۔ عثمان بن عبداللہ بن موھب کی روایت ہے کہ جبیر بن مطعم حضرت انس بن مالک (رض) ایک پانی کے پاس سے گزرے لوگوں نے ان سے میراث کا ایک مسئلہ پوچھا جبیر (رض) نے کہا : مجھے نہیں معلوم البتہ میرے ساتھ کوئی آدمی بھیجو میں پوچھ کر بتائے دیتا ہوں ، چنانچہ لوگوں نے جبیر (رض) کے ساتھ ایک آدمی بھیجا جبیر (رض) سیدنا حضرت عمر بن خطاب (رض) کے پاس آئے اور ان سے سوال کیا عمر (رض) نے فرمایا : جس شخص کو یہ بات خوش کرتی ہو کہ وہ فقیہ ہو تو وہ ایسا ہی کرے جیسا کہ جبیر بن مطعم (رض) نے کیا ہے ان سے ایک مسئلہ پوچھا گیا جسے یہ نہیں جانتے تھے اور کہا : اللہ تعالیٰ ہی خوب جانتا ہے۔ (رواہ ابن مسعود)

29509 ۔۔۔ سعید بن المسیب روایت کی ہے کہ سیدنا حضرت عمر بن خطاب (رض) ایسے قضیہ سے اللہ تعالیٰ کی پناہ مانگتے تھے جس کا کوئی حل نہ ہو ۔ (رواہ ابن سعد والمروزی فی العلم)

29510 ۔۔۔ ابن شہاب کی روایت ہے کہ سیدنا حضرت عمر بن خطاب (رض) نے ابو اشعری (رض) کی طرف لکھا لوگوں کو حکم دو کہ عربیت سیکھیں چونکہ اس سے کلام میں درستی پیدا ہوتی ہے اور لوگوں کو شعر گوئی کی تلقین کرو ، چونکہ اس سے بلندی اخلاق پر راہنمائی ملتی ہے۔ (رواہ ابن الانباری)

29511 ۔۔۔ ابو عکرمہ کی روایت ہے کہ سیدنا حضرت عمر بن خطاب (رض) جب کس شخص کو خطا کرتے دیکھتے تو اسے لقمہ دے دیتے تھے اور جب کسی کو اعراب میں غلطی کرتے پاتے تو اسے درے سے مارتے تھے ۔ (ابن لانباری)

29512 ۔۔۔ علی بن عیسیٰ بن یونس ابو اسحاق سے روایت نقل کرتے ہیں کہ ایک اعرابی ایک شخص کے پاس ٹھہرا وہ شخص کسی کو قرآن پڑھا رہا تھا چنانچہ معلم کہہ رہا تھا ۔ : ” ان اللہ بری من المشرکین ورسولہ “۔ یعین اس نے ورسولہ کا عطف مشرکین پر کردیا اور معنی بالکل غلط ہوگیا (اعرابی نے کہا : اللہ تعالیٰ کی قسم اللہ تبارک وتعالیٰ نے یہ کلام (اس طرح جس طرح تم پڑھتے ہو) اپنے نبی محمد (صلی اللہ علیہ وآلہ وسلم) پر نہیں نازل کیا اس شخص نے جھٹ اعرابی کا گلا پکڑ لیا اور کہا : چلو ہمارے درمیان سیدنا حضرت عمر بن خطاب (رض) فیصلہ کریں گے چنانچہ وہ شخص اعرابی کو سیدنا حضرت عمر بن خطاب (رض) کے پاس لے گیا اور کہا : میں ایک شخص کو قرآن پڑھا رہا تھا اور یہ آیت یوں پڑھی : ” ان اللہ بری من المشرکین ورسولہ “۔ سن کر اس اعرابی نے کہا : اللہ کی قسم یہ کلام اللہ تعالیٰ نے محمد (صلی اللہ علیہ وآلہ وسلم) پر نازل نہیں کیا سیدنا حضرت عمر بن خطاب (رض) نے فرمایا : اعرابی نے سچ کہا ہے چونکہ یہ تو اس طرح ہے ” ورسولہ “۔ (رواہ ابن الانباری)

29513 ۔۔۔ سعید بن مسیب کی روایت ہے ایک مرتبہ سیدنا حضرت عمر بن خطاب (رض) اور سیدنا حضرت عثمان ذوالنورین (رض) کا کسی مسئلہ پر اختلاف ہوگیا حتی کہ دیکھنے والا سمجھا اب یہ آپس میں اکٹھے نہیں ہوں گے چنانچہ اس کے بعد خوش اخلاقی سے ملتے اور الگ ہوجاتے ۔ (رواہ الخطیب فی رواۃ مالک)

29514 ۔۔۔ سیدنا حضرت عمر بن خطاب (رض) نے فرمایا : جس کے چہرے میں شائستگی ہو اس کا علم بھی شائستہ ہوتا ہے۔ (رواہ الدارمی)

29515 ۔۔۔ ” مسند علی (رض) “۔ سیدنا حضرت علی المرتضی (رض) نے فرمایا : لوگوں سے وہی کچھ بیان کرو جسے وہ جانتے ہوں ورنہ کیا تم پسند کرتے ہو کہ اللہ اور اس کے رسول کی تکذیب کی جائے ۔ (رواہ البخاری)

29516 ۔۔۔ سیدنا حضرت علی المرتضی (رض) نے فرمایا : اللہ تعالیٰ نے اہل جہالت سے طلب علم کا عہد نہیں لیا حتی کہ اہل علم سے بیان علم کا عہد لیا چونکہ جہالت علم سے پہلے ہوتی ہے۔ (رواہ المرھبی فی العلم)

29517 ۔۔۔ محمد بن کعب (رض) کی روایت ہے کہ ایک شخص نے سیدنا حضرت علی المرتضی (رض) سے ایک مسئلہ دریافت کیا سیدنا حضرت علی المرتضی (رض) نے اسے مناسب جواب دیا ، وہ شخص بولا : اس کا جواب ایسا نہیں بلکہ اس کا جواب یہ اور یہ ہے سیدنا حضرت علی المرتضی (رض) نے فرمایا : تم نے درست کہا اور مجھ سے خطا ہوئی ہر ذی علم کے اوپر ایک اور علم والا ہوتا ہے۔ (رواہ ابن جریر وابن عبدالبر فی العلم)

29518 ۔۔۔ عبداللہ بن بشیر کی روایت ہے کہ حضرت علی بن ابی طالب (رض) سے ایک مسئلہ پوچھا گیا فرمایا ! مجھے اس کا علم نہیں ، پھر فرمایا : دل پر بہت گراں گزرتا ہے کہ جب مجھ سے ایسی بات پوچھی جائے جس کا مجھے علم نہ ہو اور مجھے کہنا پڑے : میں اس کا علم نہیں رکھتا ۔ (رواہ سعدان بن نصر فی الرابع من حدیثہ)

29519 ۔۔۔ خالد بن عرعرہ کی روایت ہے کہ میں نے حضرت علی بن ابی طالب (رض) کو فرماتے سنا کہ خبردار جب کوئی شخص سوال کرتا ہے تو خود بھی نفع اٹھاتا ہے اور اپنے ہم نشینوں کو بھی نفع پہنچاتا ہے۔ ابن عبدالبر فی العلم

29520: عالم کا حق یہ ہے کہ کثرت سے اس سے سوالات نہ کئے جائیں جواب دینے میں اسے مشقت میں نہ ڈالا جائے جب وہ پہلو تہی کرے تم اس کے پیچھے نہ پڑجاؤ اس کے کپڑے نہ پکڑو اپنے ہاتھ سے اس کی طرف اشارے نہ کرو آنکھوں سے بھی اس کی طرف اشارے نہ کرو اس کی مجلس میں اس سے سوال نہ کرو اس کے پھسلنے کی طلب میں نہ رہو اگر پھسل جائے تو اس کے واپس لوٹنے کی امید رکھو اس کی بات کو قبول کرو ، عالم سے یوں نہ کہو کہ تم نے فلاں کے خلاف قول کیا ہے تم اس کا راز افشاء نہ کرو عالم کے پاس کسی کی غیبت مت کرو یہ کہ خواہ وہ موجود ہو یا غائب ہو اس کی حفاظت کرو یہ کہ لوگوں میں عمومی سلام کرو اور عالم کو خصوصی سلام پیش کرو عالم کے سامنے بیٹھو اگر عالم کو کوئی کام پیش آئے تو سب سے پہلے اس کی خدمت کے لیے حاضر ہو عالم کی پاس زیادہ دیر بیٹھ کر اسے اکتاہٹ میں مت ڈالو وہ کھجور کی مانند ہے تو اس انتظار میں ہے کہ کب گرنے پائے گی ، چونکہ اس میں تمہارا نفع ہے عالم اس روزہ دار کی طرح ہوتا ہے جو اللہ تعالیٰ کی راہ میں جہاد کے لیے نکلا ہو۔ جب عالم مرجاتا ہے اسلام میں دراڑ پڑجاتی ہے پھر وہ دراڑ تا قیامت پر نہیں ہونے پاتی ، طالب علم کے ساتھ بطور مشابہت کے ستر ہزار فرشتے چلتے ہیں۔ (رواہ المرھبی وابن عبدالبر فی العلم)