1499 ۔ ایک اور سند کے ہمراہ یہ روایت منقول ہے ، جو اس سجدے کے بارے میں جو سو رہ ص میں ہے حضرت داؤد (علیہ السلام) نے توبہ کے طور پر یہ سجدہ کیا تھا، اور ہم شکر کے طور پر یہ سجدہ کرتے ہیں۔

1500 ۔ سعید بن جبیر بیان کرتے ہیں : انھوں نے حضرت عبداللہ بن عباس (رض) کو یہ بیان کرتے ہوئے سنا ہے وہ فرماتے ہیں : میں نے حضرت عمر (رض) کو منبر پر سو رہ ص کی تلاوت کرتے ہوئے سنا، وہ منبر سے نیچے اترے انھوں نے سجدہ تلاوت کیا اور پھر منبر پرچڑھ گئے۔

1501 ۔ سائب بن یزید بیان کرتے ہیں : حضرت عثمان غنی (رض) نے منبر پر سو رہ ص کی تلاوت کی تونیچے اتر کر انھوں نے سجدہ تلاوت کیا۔

1502 ۔ حضرت ابوسعید خدری (رض) بیان کرتے ہیں : ایک دن نبی کریم (صلی اللہ علیہ وآلہ وسلم) ہمیں خطبہ دے رہے تھے آپ (صلی اللہ علیہ وآلہ وسلم) نے سورة ص کی تلاوت کی ، جب آپ سجدے سے متعلق مقام پر پہنچے تو آپ منبر سے نیچے اترے آپ نے سجدہ کیا، آپ کے ساتھ ہم نے بھی سجدہ کیا، پھر آپ نے دوبارہ اس سورت کی تلاوت کی جب آپ سجدے کے مقام پر پہنچے توہم سجدہ کرنے کے لیے تیار تھے، جب آپ نے ہمیں ملاحظہ کیا توفرمایایہ ایک نبی کی توبہ کا واقعہ ہے اور میں یہ دیکھ رہاہوں کہ تم لوگ سجدہ کرنے کے لیے تیارہو پھر نبی کریم (صلی اللہ علیہ وآلہ وسلم) منبر سے نیچے اترے آپ نے سجدہ کیا تو ہم نے بھی سجدہ کیا۔

1503 ۔ حضرت عمرو بن عاص (رض) بیان کرتے ہیں : نبی کریم (صلی اللہ علیہ وآلہ وسلم) نے انھیں قرآن مجید میں پندرہ مقامات پڑھائے تھے جہاں سجدہ ہے ان میں سے تین مفصل سورتوں میں ہیں اور سو رہ حج میں دوسجدے ہیں۔

1504 ۔ حضرت عقبہ بن عامر (رض) بیان کرتے ہیں : میں نے عرض کی : یارسول اللہ، کیا سو رہ حج میں دوسجدے ہیں ؟ آپ نے فرمایا ہاں، اگر تم ان کو ادا نہیں کرتے توپھرتم اس سورت کی تلاوت نہ کرو۔

1505 ۔ عبداللہ بن ثعلبہ بیان کرتے ہیں : میں نے حضرت عمر (رض) کو دیکھا انھوں نے سورة حج میں دوسجدے کیے ، راوی بیان کرتے ہیں : میں نے دریافت کیا کیا صبح کی نماز میں ؟ انھوں نے جواب دیا جی ہاں، صبح کی نماز میں۔

1506 ۔ حضرت ابوہریرہ (رض) بیان کرتے ہیں : نبی کریم (صلی اللہ علیہ وآلہ وسلم) نے (اور آپ کے ساتھ) جنات انسانوں اور درختوں نے سورة نجم کی آخری آیت میں سجدہ کیا۔

1507 ۔ حضرت عبداللہ بن عباس (رض) بیان کرتے ہیں : نبی کریم (صلی اللہ علیہ وآلہ وسلم) نے سورة نجم کی تلاوت کرتے ہوئے سجدہ کیا اور مسلمانوں اور مشرکین نے بھی (آپ کے ساتھ ) سجدہ کیا۔

1508 ۔ حضرت عبداللہ بن عباس (رض) بیان کرتے ہیں : نبی کریم (صلی اللہ علیہ وآلہ وسلم) نے یہ سورت پڑھی ، النجم، اور آپ نے اس میں سجدہ کیا۔

1509 ۔ حضرت ابوہریرہ (رض) بیان کرتے ہیں : میں نے نبی کریم (صلی اللہ علیہ وآلہ وسلم) کی اقتداء میں ، سورة انشقاق ، اور سو رہ علق میں سجدہ تلاوت کیا ہے۔

1510 ۔ خارجہ بن زید اپنے والد حضرت زید بن ثابت انصاری کا یہ بیان نقل کرتے ہیں : میں نے نبی کریم (صلی اللہ علیہ وآلہ وسلم) کے سامنے سورة نجم کی تلاوت کی تو ہم میں سے کسی نے بھی سجدہ نہیں کیا۔

ابوصخر نامی راوی بیان کرتے ہیں : میں نے عمر بن عبدالعزیز اور ابوبکر بن حزم کی اقتداء میں (نماز ادا کی جس میں انھوں نے اس سورت کی تلاوت کی ) تو ان دونوں نے سجدہ تلاوت نہیں کیا۔

1511 ۔ ابوجعفر بیان کرتے ہیں : نبی کریم (صلی اللہ علیہ وآلہ وسلم) نے ایک شخص کو الناقص الخلق دیکھا، تو آپ (صلی اللہ علیہ وآلہ وسلم) سجدے میں چلے گئے۔

1512 ۔ حضرت ابوبکرہ (رض) بیان کرتے ہیں : نبی کریم (صلی اللہ علیہ وآلہ وسلم) کو جب کوئی خوشی ملتی تھی تو آپ (صلی اللہ علیہ وآلہ وسلم) اللہ تعالیٰ کے شکر کے لیے سجدے میں چلے جاتے تھے۔

1513 ۔ حضرت ابوبکرہ (رض) بیان کرتے ہیں : نبی کریم (صلی اللہ علیہ وآلہ وسلم) کو جب کوئی خوشی کی صورت حال درپیش ہوتی تھی یا آپ (صلی اللہ علیہ وآلہ وسلم) کسی بات پر خوش ہوتے تھے تو آپ سجدہ میں چلے جاتے تھے۔

1514 ۔ حضرت ابوہریرہ (رض) بیان کرتے ہیں : نبی کریم (صلی اللہ علیہ وآلہ وسلم) نے ارشاد فرمایا ہے : یہ نماز کو مکمل کردیتا ہے۔

1515 ۔ جابر بن یزید اپنے والد کا یہ بیان نقل کرتے ہیں : میں نبی کریم (صلی اللہ علیہ وآلہ وسلم) کے ساتھ آپ کے حج میں شریک ہواہوں میں نے آپ کی اقتداء میں صبح کی نماز مسجد خیف میں ادا کی جب آپ نے اپنی نماز کو مکمل کرلیا اور آپ (صلی اللہ علیہ وآلہ وسلم) نماز پڑھ کر فارغ ہوئے تو وہاں لوگوں کے پیچھے دو آدمی موجود تھے جنہوں نے آپ (صلی اللہ علیہ وآلہ وسلم) کی اقتداء میں نماز ادا نہیں کی تھی، نبی کریم (صلی اللہ علیہ وآلہ وسلم) نے حکم دیا : ان کو میرے پاس لاؤ ان دونوں کو لایا گیا تو دونوں کانپ رہے تھے نبی کریم (صلی اللہ علیہ وآلہ وسلم) نے دریافت کیا تم دونوں نے ہمارے ساتھ نماز ادا کیوں نہیں کی ؟ انھوں نے عرض کیا یارسول اللہ ہم اپنی رہائش گاہ میں نماز ادا کرچکے تھے نبی کریم (صلی اللہ علیہ وآلہ وسلم) نے فرمایا یسانہ کیا کرو جب تم اپنی رہائش گاہ میں نماز ادا کرچکے ہو تو پھر تم مسجد میں آؤ جہاں جماعت کے ساتھ نماز ادا ہورہی ہو تو لوگوں کے ساتھ بھی نماز ادا کریں کرو یہ تمہارے لیے نفل نماز بن جائے گی۔

1516 ۔ یہی روایت بعض دیگراسناد کے ہمراہ منقول ہے تاہم اس میں یہ الفاظ زائد ہیں :

'' ان دونوں میں سے ایک شخص نے عرض کی : یارسول اللہ ! آپ ہمارے لیے دعائے مغفرت کیجئے تو نبی کریم (صلی اللہ علیہ وآلہ وسلم) نے فرمایا اللہ تعالیٰ نے تمہاری مغفرت کردی ہے۔

1517 ۔ جابر بن یزید اپنے والد کا یہ بیان نقل کرتے ہیں : نبی کریم (صلی اللہ علیہ وآلہ وسلم) نے منی میں فجر کی نماز پڑھائی جب آپ نماز پڑھ کر فارغ ہوئے تو آپ نے لوگوں کے پیچھے دو آدمیوں کو دیکھا دونوں کو بلوایا دونوں لائے گئے تو وہ کانپ رہے تھے ، آپ نے دریافت کیا تم نے لوگوں کے ساتھ نماز ادا کیوں نہیں کی۔ ان دونوں نے عرض کی ہم اپنی رہائش گاہ میں نماز ادا کرچکے تھے آپ نے فرمایا تم ایسانہ کرو جب کوئی شخص اپنی رہائش گاہ میں نماز ادا کر چکاہو اور پھر وہ امام کے ساتھ باجماعت نماز کو بھی پالے تو وہ امام کی اقتداء میں بھی اس نماز کو ادا کرے تو یہ اس کے لیے نفل ہوجائے گی۔

1518 ۔ یہی روایت بعض دیگراسناد کے ساتھ بھی منقول ہے تاہم اس میں یہ الفاظ ہیں :

'' تو تم لوگ اس کے ساتھ نماز ادا کرلو اور اسے نفل نماز قرار دو ''

بعض دیگرراویوں نے اس کے برخلاف روایت نقل کی ہے۔