12181 جس شخص کے پاس قربانی کے لیے جانور ہو، جب وہ ماہ ذی الحج کا چاند دیکھے تو جب تک قربانی نہ کرلے ہرگز اپنے بال اور ناخنوں کو نہ تراشے۔ رواہ مسلم وابوداؤد عن ام سلمہ (رض) ۔

12182 جس شخص نے نماز عید سے قبل قربانی کی تو اس نے اپنے لیے قربانی کی (اللہ کے لیے نہیں) اور جس شخص نے نماز عید کے بعد قربانی کی تو اس کی قربانی مکمل ہوگئی، اور وہ مسلمانوں کے طریقے پر چلا۔ رواہ البخاری ومسلم عن البراء (رض) ۔

12183 تم میں سے کوئی شخص قربانی اس وقت تک نہ کرے جب تک کہ نماز نہ پڑھے۔ (یعنی نماز عید پڑھنے کے بعد قربانی کرے) ۔ رواہ الترمذی عن البراء (رض) ۔

12184 تمہارے اس دن (دسویں ذی الحجہ کو) قربانی کی پہلی رسم نماز عید ہے۔

رواہ الطبرانی فی الکبیر عن البراء (رض) ۔

12185 ہمارے اس آج کے دن (دسویں ذی الحجہ کو) ہمارا سب سے پہلا کام یہ ہے کہ ہم نماز عید ادا کریں، پھر لوٹیں، تو قربانی کریں۔ لہٰذا جس شخص نے اس طرح یہ کام انجام دیا تو اس نے ہماری سنت کے مطابق عمل کیا، اور جس نے اس سے پہلے (یعنی نماز عید سے قبل) قربانی کی تو گویا اس کی وہ قربانی اس گوشت کی مانند ہے کہ جس کو اس نے اپنے گھر والوں کے سامنے پیش کیا، لیکن قربانی میں سے (اس کا یہ عمل) کسی کھاتے میں نہیں۔

رواہ احمد فی مسندہ والبخاری ومسلم، ابوداؤد، الترمذی، النسائی عنالبراء (رض) ۔

12186 جس شخص نے نماز عید کے بعد قربانی کی تو اس کی قربانی پوری ہوگئی، اور اس نے مسلمانوں کے طریقے کو پالیا۔ رواہ البخاری عن البراء (رض) ۔

12187 (نبی کریم (صلی اللہ علیہ وآلہ وسلم) نے) رات میں قربانی کرنے سے منع فرمایا ہے۔

رواہ الطبرانی فی الکبیر عن ابن عباس (رض) ۔

کلام : ضعیف الجامع 6017 ۔

12188 جس شخص نے نماز عید سے قبل قربانی کرلی تو وہ قربانی اس نے اپنے لیے کی (اللہ کے لیے نہیں کی) اور جس شخص نے نماز عید کے بعد قربانی کی تو اس کی قربانی کامل ہوگئی اور اس نے مسلمانوں کے طریقے کو پالیا۔ البخاری عن انس (رض) ۔

12189 جس شخص نے ہماری نماز عید پڑھی (پھر اس کے بعد) ہماری (یہ) قربانی کی تو اس نے قربانی کی رسموں کو درست انجام دیا، اور جس شخص نے نماز عید سے قبل ہی قربانی کرڈالی تو اس کی قربانی نماز عید سے پہلے تھی، لہٰذا اس کی قربانی نہیں ہوئی۔

رواہ البخاری ومسلم وابوداؤد عن البراء (رض) ۔

12190 جس شخص نے نماز عید پڑھنے سے پہلے ہی اپنی قربانی ذبح کردی تو اسے چاہیے کہ (نماز عید کے بعد) اس کی جگہ دوسرا جانور قربان کرے اور جس شخص نے (نماز عید سے قبل) ذبح نہ کی تو اسے چاہیے کہ (نماز عید کے بعد) اللہ کا نام لے کر (اپنی قربانی) ذبح کرے۔

رواہ احمد فی مسندہ والبخاری ومسلم والنسائی وابن ماجہ عن جندب (رض) ۔

12191 جس شخص نے نماز عید سے قبل ہی قربانی کرڈالی تو اسے چاہیے کہ دوبارہ قربانی کرے (نماز عید کے بعد) ۔ رواہ احمد فی مسندہ والبخاری ومسلم والنسائی وابن ماجہ عن انس (رض) ۔

12192 جانوروں کی قربانی محرم کی شروع تاریخ تک کی جاسکتی ہیں ان لوگوں کے لیے جن سے (بوجہ مجبوری) تاخیر ہوجائے۔

ابوداؤد فی مراسیلہ، السنن للبیہقی عن ابی سلمۃ و سلیمان بن یسار بلاغاً ۔

کلام : روایت ضعیف ہے : ضعیف الجامع 3595 ۔

12193 جانور ذبح کرو چاہے کسی بھی مہینہ میں ہو، اور اللہ رب العزت کی اطاعت و فرمان برداری کرو، اور (فقراء محتاجین کو) کھانا کھلاؤ۔ ابوداؤد ، النسائی ، مستدرک الحاکم عن نبی شۃ۔

12194 میں نے یہاں قربانی کی ہے ، اور مقام منی سارے کا سارا قربان گاہ ہے، پس اپنی قیام گاہوں پر قربانی کرو، اور میں نے یہاں وقوف کیا ہے اور مقام عرفہ سارے کا سارا موقف (ٹھہرنے کی جگہ) ہے، اور مزدلفہ سارے کا سارا موقف (ٹھہرنے کی جگہ) ہے۔

رواہ ابوداؤد عن جابر (رض)۔

12195 جب تم میں سے کوئی شخص قربانی کرے، تو اسے چاہیے کہ اپنی قربانی کے گوشت میں سے ضرور کچھ کھائے۔ رواہ احمد فی مسندہ عن ابوہریرہ (رض) ۔

کلام : ذخیرۃ الحفاظ 341، ضعیف الجامع 581 ۔

12196 قربانی کا گوشت کھاؤ اور ذخیرہ کرو۔

رواہ احمد فی مسندہ والحاکم عن ابی سعید وقتادۃ بن النعمان۔

12197 ہر شخص کو چاہیے کہ وہ اپنی قربانی کے گوشت میں سے کچھ کھائے۔

رواہ الطبرانی فی الکبیر و ابونعیم فی الحلیہ عن ابن عباس (رض) ۔

12198 میں نے (ابتداء میں) تین دن سے زیادہ قربانوں کا گوشت کھانے سے تمہیں منع کیا تھا تاکہ غنی شخص، فقیر پر وسعت وسخاوت کرے (اب چونکہ اللہ نے وسعت پیدا فرمادی ہے) لہٰذا اب جس طرح چاہو کھاؤ اور دوسروں کو کھلاؤ اور ذخیرہ اندوزی کرو (اب کوئی حرج نہیں) ۔

رواہ الترمذی عن سلیمان بن بریدۃ (رض) ۔

12199 تم میں سے کوئی شخص تین دنوں سے زیادہ اپنی قربانی کا گوشت نہ کھائے۔

رواہ احمد فی مسندہ ومسلم والترمذی عن ابن عمر (رض) ۔

12200 ہم نے (ابتداء میں) تین دنوں سے زیادہ قربانی کا گوشت کھانے سے تمہیں منع کیا تھا تاکہ تم لوگ اپنے اوپر کشادگی کرو (یعنی تم لوگوں میں جو غنی ہیں وہ مالداروں کو کھلائیں تاکہ سب میں کشادگی و وسعت پھیلے) لہٰذا (اب قربانی کا گوشت) کھاؤ ، جمع کرکے رکھو اور (اس کی) تجارت کرو، آگاہ رہو ! کہ یہ دن کھانے پینے اور اللہ کا ذکر کرنے کے دن ہیں۔

رواہ ابوداؤد عن نبی شۃ (رض) ۔