18107 ۔۔۔ عیدین کے لیے کوئی اذان نہ دی جاتی تھی ۔ (مسلم ابو داؤد ، ترمذی عن جابر بن سمرۃ (رض))

18108 ۔۔۔ حضور اکرم (صلی اللہ علیہ وآلہ وسلم) رمی جمار (شیطانوں کو کنکری مارنے) کے لیے پیدل آتے جاتے تھے ۔ (ترمذی عن ابن عمرو (رض))

18109 ۔۔۔ حضور اکرم (صلی اللہ علیہ وآلہ وسلم) جمرہ عقبہ کی رمی فرماتے ہوئے ٹھہرتے نہ تھے بلکہ گزرتے چلے جاتے تھے ۔ (ابن ماجۃ عن ابن عباس (رض))

18110 ۔۔۔ حضور اکرم (صلی اللہ علیہ وآلہ وسلم) تلبیہ سے فارغ ہو کر اللہ سے اس کی رضا اور مغفرت کا سوال کرتے تھے ۔ اور اللہ کی رحمت کے طفیل جہنم سے پناہ مانگتے تھے ۔

18111 ۔۔۔ یوم الترویہ سے ایک دن پہلے (یعنی سات ذی الحجہ کو) حضور اکرم (صلی اللہ علیہ وآلہ وسلم) لوگوں کو خطبہ دیتے اور حج کے احکام سے روشناس کراتے تھے ۔ (مستدرک الحاکم ، السنن للبیھقی عن ابن عمرو (رض))

18112 ۔۔۔ حضور اکرم (صلی اللہ علیہ وآلہ وسلم) بیت اللہ کی طرف نظر ڈالتے تو یہ دعا فرماتے اللہم ذدبیتک ھذا تشریفا وتعظیما وتکریما وبرا ومھابۃ ے اللہ اپنے اس گھر کو زیادہ سے زیادہ شرف ، عظمت ، کرامت بزرگی اور دبدبہ عطا فرما ۔ (الکبیر للطبرانی عن حذیفہ بن اسید (رض))

18113 ۔۔۔ عرفہ کے روز آپ (صلی اللہ علیہ وآلہ وسلم) کی اکثر دعا یہ ہوتی تھی : ” لا الہ الا اللہ وحدہ لا شریک لہ ، لہ الملک ولہ الحمد بیدہ الخیر وھو علی کل شیء قدیر “۔ (عن ابن عمرو (رض))

18114 ۔۔۔ حضور اکرم (صلی اللہ علیہ وآلہ وسلم) استلام (بوسہ) صرف حجر اسود اور رکن یمانی کا فرماتے تھے ۔ (نسائی عن ابن عمرو (رض))

18115 ۔۔۔ حضور اکرم (صلی اللہ علیہ وآلہ وسلم) اپنی قربانی اپنے ہاتھ سے ذبح فرمایا کرتے تھے ۔ (مسند احمد عن انس (رض))

18116 ۔۔۔ حضور اکرم (صلی اللہ علیہ وآلہ وسلم) دو سینگوں والے خوبصورت مینڈھوں کی قربانی دیا کرتے تھے اور ذبح کے وقت ان پر اللہ کا نام لیتے اور تکبیر کہتے ۔ (مسند احمد ، بخاری ، مسلم ، نسائی ، ابن ماجہ عن انس (رض))

18117 ۔۔۔ حضور اکرم (صلی اللہ علیہ وآلہ وسلم) ایک بکری اپنے تمام اہل خانہ کی طرف سے ذبح کردیا کرتے تھے ۔ (مستدرک الحاکم عن عبداللہ بن ہشام)

18118 ۔۔۔ حضور اکرم (صلی اللہ علیہ وآلہ وسلم) محرم ہونے کی حالت میں اپنی بیوی کا بوسہ لے لیتے تھے ۔ (الخطیب فی : التاریخ عن عائشۃ (رض))

18119 ۔۔۔ حضور اکرم (صلی اللہ علیہ وآلہ وسلم) احرام باندھنے کا ارادہ فرماتے تو اپنے پاس موجود سب سے اچھی خوشبو لگا لیتے تھے ۔ (مسلم عن عائشۃ (رض))

18120 ۔۔۔ حضور اکرم (صلی اللہ علیہ وآلہ وسلم) رکن کا استلام کرتے تو اس کو چومتے تھے اور اپنا دایاں رخسار اس پر رکھ دیتے تھے ۔ (السنن للبیھقی عن ابن عباس (رض))

18121 ۔۔۔ حضور اکرم (صلی اللہ علیہ وآلہ وسلم) عرفہ کے روز فجر کی نماز سے ایام تشریق کے آخری دن کی نماز عصر تک تکبیر تشریق پڑھا کرتے تھے ۔ (السنن اللبیھقی عن جابر (رض))

18122 ۔۔۔ حضور اکرم (صلی اللہ علیہ وآلہ وسلم) ملتزم کے ساتھ اپنے چہرے اور سینے کو چمٹا لیا کرتے تھے ۔ (السنن للبیھقی عن ابن عمرو (رض))

18123 ۔۔۔ حضور اکرم (صلی اللہ علیہ وآلہ وسلم) اپنی قربانی عید گاہ میں ذبح کیا کرتے تھے ۔ (بخاری ، ابو داؤد نسائی ، ابن ماجۃ عن ابن عمرو (رض))

18124 ۔۔۔ حضور اکرم (صلی اللہ علیہ وآلہ وسلم) جب بیت اللہ کا طواف فرماتے تو ہر چکر میں حجر اسود اور رکن یمانی کا استلام کرتے (یعنی بوسہ لیتے) (مستدرک الحاکم عن ابن عمرو (رض))

18125 ۔۔۔ حضور اکرم (صلی اللہ علیہ وآلہ وسلم) جب کسی سریہ یا جیش کو روانہ فرماتے تو دن کے شروع میں روانہ فرماتے ۔ (ابو داؤد ترمذی ، ابن ماجۃ عن صخر)

18126 ۔۔۔ حضور اکرم (صلی اللہ علیہ وآلہ وسلم) جب کسی کو امیر بنا کر بھیجتے تو اس کو ارشاد فرماتے خطبہ مختصر رکھنا اور سحر انگیز کلام تھوڑا کرنا۔ (الکبیر للطبرانی عن ابی امامۃ (رض))