28851 ۔۔۔ جس شخص نے کتاب اللہ کی ایک آیت کا علم حاصل کیا وہ آیت قیامت کے دن ہنستے چہرے سے اس استقبال کرے گی ۔ (رواہ الطبرانی عن ابی امامۃ)

28852 ۔۔۔ جس شخص نے علم کا ایک باب سیکھا خواہ اس پر عمل کیا جاتا ہو یا نہ کیا جاتا ہو یہ اس کے لیے ایک ہزار رکعت سے افضل ہے، جب وہ اس پر عمل کرتا ہے یا دوسروں کو اس کی تعلیم دیتا ہے تو اس کو اس کا اپنا ثواب اور عمل کرنے والے کا ثواب ملتا ہے تا قیامت اسے یہ ثواب ملتا رہے گا ۔۔ (رواہ الخطیب وابن النجار عن ابن عباس (رض)) ۔ کلام : ۔۔۔ حدیث ضعیف ہے دیکھئے التنزییہ 278 وذیل اللآلی 41 ۔

28853 ۔۔۔ جس شخص نے اللہ تبارک وتعالیٰ کی رضا جوئی کے لیے چالیس حدیثوں کا علم حاصل کیا تاکہ میری امت کا حلال و حرام کی تعلیم دے قیامت کے دن اللہ تبارک وتعالیٰ اسے عالم بنا کر اٹھائے گا (رواہ ابو نعیم عن علی (رض))

28854 ۔۔۔ جس شخص نے علم حرف بھی سیکھا اللہ تبارک وتعالیٰ یقیناً اس کی مغفرت کردیتا ہے جس شخص نے ج اللہ تبارک وتعالیٰ کی رضا کے لیے کسی شخص کو اپنا دوست بنایا اللہ تبارک وتعالیٰ اس کی مغفرت کردیتا ہے جو شخص باوضو سوتا ہے اللہ تبارک وتعالیٰ اس کی بھی مغفرت کردیتا ہے جو شخص اپنے بھائی کے چہرے پر نظر ڈالتا ہے اللہ تبارک وتعالیٰ اس کی بھی مغفرت کردیتا ہے جو شخص کوئی کام شروع کرتے وقت بسم اللہ پڑھتا ہے اللہ تبارک وتعالیٰ اس کی بھی مغفرت کردیتا ہے۔ (رواہ الرافعی عن علی (رض))

28855 ۔۔۔ جو شخص دین میں سمجھ بوجھ پیدا کرتا ہے اللہ تبارک وتعالیٰ اس کے غم کی کفایت کردیتا ہے اور اسے وہاں سے رزق عطا کرتا ہے جہاں کا اسے گمان بھی نہیں ہوتا ۔ (رواہ الرافعی عن ابی یوسف عن ابی حنیفۃ عن انس الخطیب وابن النجار عن ابی یوسف عن ابی حنیفۃ عن عبداللہ جزء الزبیدی) ۔ کلام :۔۔۔ حدیث ضعیف ہے دیکھئے تذکرۃ الموضوعات111 والتنزیۃ 11 27 ۔

28856 ۔۔۔ جو شخص میری اس مسجد میں داخل ہوا تاکہ علم حاصل کرے یا دوسروں کو اس کی تعلیم دے وہ اللہ تبارک وتعالیٰکی راہ میں جہاد کرنے والے کی طرح ہے اور جو شخٰص اس کے علاہ کسی اور مقصد کے لیے میری مسجد میں داخل ہوا اس کی مثال ایسی ہی ہے جیسے کوئی شخص کسی چیز سے تعجب کررہا ہو حالانکہ وہ چیز کسی اور کی ہو (رواہ والطبرانی فی الاوسط عن سھل بن سعد)

28857 ۔۔۔ جو شخٰص ہماری اس مسجد میں داخل ہوا تاکہ خیر کا علم حاصل کرے یا اس کی تعلیم دے وہ اللہ تبارک وتعالیٰ کی راہ میں جہاد کرنے والے کی طرح ہے۔ اور جو شخص ہماری مسجد میں اس کے علاوہ کسی اور غرض کے لیے داخل ہوا وہ اس شخص کی طرح ہے جو ایسی چیز کی طرف دیکھ رہا ہو جو کسی اور کی ملکیت ہو (رواہ احمد بن حنبل وابن حبان عن ابوہریرہ (رض))

28858 ۔۔۔ جو شخص علم حاصل کرنے کے لیے گھر سے نکلتا ہے اس کے لیے جنت کا دروازہ کھول دیا جاتا ہے فرشتے اس کے لیے پر بچھاتے ہیں اس کے لیے آسمانوں کے فرشتے دعائے رحمت کرتے ہیں اور سمندر کی مچھلیاں اس کے لیے استغفار کرتی ہیں عالم کی عابد پر ایسی فضلیت ہے جیسے چودھویں رات کے چمکتے ہوئے چاند کی فضیلت چھونے سے آسمانی ستارے پر علماء انبیاء کے ورثہ ہیں۔ انبیاء دینار و درہم وارثت میں نہیں چھوڑتے البتہ انبیاء وراثت میں علم چھوڑتے ہیں جو شخص علم حاصل کرے وہ وافر مقدار میں حاصل کرے عالم کی موت ایک مصیبت ہے جس کا جبیرہ ناممکن ہوتا ہے اور اس کی موت ایک دراڑ ہے جو بند نہیں ہونے پاتی عالم چمکتا ہوا ستارہ ہوتا ہے جو ماند پڑجاتا ہے پورے قبیلے کا مرجانا عالم کی موت کے مقابلہ میں کوئی حیثیت نہیں رکھتا (رواہ الطبرانی والبیھقی فی شعب فی شعب الایمان عن ابی الدرداء)

28859 ۔۔۔ جو شخص صبح کو مسجد کی طرف حصول علم کے لیے یا تعلیم دینے کے لیے گھر سے نکلا اس کے لیے عمرہ کا ثواب ہے جو شخص شام کے وقت مسجد کی طرف حصول علم یا تعلیم دینے کے لیے نکلا اس کے لیے حج کا ثواب ہے۔ (رواہ الطبرانی والحاکم وابو نعیم فی الحلیۃ وابن عساکر و سعید بن المنصودر عن ابی امامۃ)

28860 ۔۔۔ اللہ تبارک وتعالیٰ اس شخص پر رحم فرمائے جو ایک فریضہ یا دو فریضوں کا علم حاصل کرے اور پھر اس پر عمل کرے یا کسی دوسرے شخص کو سکھا دے جو اس پر عمل کرے (رواہ ابو الشیخ عن ابوہریرہ )

28861 ۔۔۔ جو شخص بھی علم کا ایک کلمہ (مسئلہ) یا دو کلمے یا تین کلمے یا چار کلمے یا پانچ کلمے اللہ تبارک وتعالیٰ اور اس کے رسول کے فرض کردہ احکام میں سے سیکھے اور پھر دوسروں کو سکھائے وہ جنت میں داخل ہوگا ۔ (رواہ ابن النجار عن ابوہریرہ (رض))

28862 ۔۔۔ فرائض (علم میراث) سیکھو اور دوسروں کو سکھاؤ چونکہ فرائض نصف علم ہے علم فرائض بھلا دیا جائے گا اور یہ پہلی چیز ہے جو میری امت سے چھین لی جائے گی (رواہ الشیرازی فی الالقاب والبیھقی عن ابوہریرہ (رض)) ۔ کلام :۔۔۔ حدیث ضعیف ہے دیکھئے اسنی المطالب 497 والتمییز 59 ۔

28863 ۔۔۔ علم سیکھو اور دوسروں کو سکھاؤ فرائض سیکھو اور دوسروں کو سکھاؤ (رواہ الدار قطنی عن ابی سعید)

28864 ۔۔۔ علم حاصل کرو اور لوگوں کو تعلیم دو (رواہ البیھقی عن ابی بکر (رض))

28865 ۔۔۔ علم اٹھ جانے سے پہلے پہلے سیکھ لو چونکہ تم میں سے کسی شخص کو معلوم نہیں کہ وہ کب علم کا محتاج ہوگا لہٰذا علم حاصل کرو تکلف بدعت اور غلو سے بچتے رہو اور معاملہ کی آسانی کے در پے رہو (رواہ الدیلمی عن ابن عباس (رض))

28866 ۔۔۔ علم اٹھ جانے سے پہلے پہلے حاصل کرلو چونکہ تم میں سے کسی شخص کو یہ نہیں معلوم کہ وہ کب علم کا محتاج ہوگا۔ (رواہ الدیلمی عن ابوہریرہ (رض))

28867 ۔۔۔ علم حاصل کرو چونکہ علم کو سکھانا خوف خدا ہے علم کی طلب عبادت ہے علم کا مذاکرۃ تسبیح ہے اور علم میں بحث و مباحثہ کرنا جہاد ہے۔ (رواہ الخطیب فی المتفق والمتفرق عن معاذ وفیہ کنانۃ بن جبلۃ) ۔ کلام : ۔۔۔ کنانہ بن حبلہ کے متعلق ابن معین کہتے ہیں کہ وہ کذاب ہے وقال ابو حاتم محلہ الصدق وقال السعدی ضعیف جذا اور دیلمی نے اس روایت میں اتنا اضافہ کیا ہے کہ علم کا دوسرے کو سکھانا صدقہ ہے جو علم کا اہل ہو اسے علم کی دولت سے نوازنا تقرب الہی کا ذریعہ ہے علم حلال و حرام میں تمیز کراتا ہے جنت کی راہ کا روشن مینارہ ہے وحشتوں میں انس فراہم کرتا ہے تنہائی کا رفیق ہے خلوت کا ہمنشین ہے تنگدستی اور خوشحالی میں چراغ راہ دشمن پر چلتا اسلحہ اور تیغ براں ہے دوستوں کی زینت اجنبی لوگوں میں قربت پیدا کرنے والا ، اسی علم کی بدولت اللہ تعالیٰ کچھ لوگوں کو عظمت عطا کرتا ہے اور انھیں جنت میں قائد اور راہنما بناتا ہے۔ (رواہ بطولہ ابن لال وابو نعیم عن معاذ موقوفا)

28868 ۔۔۔ لوگ دو طرح کے ہوتے ہیں عالم یا متعلم یہ دونوں اجر وثوب میں دونوں شریک ہوتے ہیں ، ان کے علاوہ باقی لوگوں میں کوئی بھلائی نہیں ہے۔ (رواہ الطبرانی والخطیب عن ابی امامۃ)

28869 ۔۔۔ اے لوگو ! علم اٹھ جانے سے پہلے پہلے حاصل کرلو ، عرض کیا گیا یا رسول اللہ ! علم کیسے اٹھ جائے گا حالانکہ یہ قرآن ہمارے پاس موجود ہے ؟ فرمایا : تیری ماں تجھے گم پائے یہ یہود ہیں اور آسمانی صحیفے ان کے پاس موجود تھے چنانچہ ان کے انبیاء جو صحیفے لائے تھے وہ اصلی حالت پر باقی نہیں رہے خبردار حاملین علم (علماء) کے اٹھ جانے سے علم اٹھ جاتا ہے۔ (رواہ احمد بن حنبل والدارمی والطبرانی وابو الشیخ فی تفسیرہ وابن مردویہ عن ابی امامۃ)

28870 ۔۔۔ لوگ دو طرح کے ہوتے ہیں عالم یا متعلم یہ دونوں اجر وثوب میں برابر ہوتے ہیں ، ان کے علاوہ باقی لوگوں میں کوئی بھلائی نہیں ہے۔ (رواہ الطبرانی فی الاوسط عن ابن مسعود (رض))