24341 ۔۔۔ حضرت عبداللہ ابن عمرو (رض) اپنے والد محترم سے روایت نقل کرتے ہیں کہ میں رسول کریم (صلی اللہ علیہ وآلہ وسلم) کے ساتھ رمضان کی اٹھارھویں تاریخ کو نکلا ، اچانک ایک آدمی سینگی لگوا رہا تھا ، جب حضور اکرم (صلی اللہ علیہ وآلہ وسلم) نے اسے دیکھا تو فرمایا : سینگی لگانے والے اور لگوانے والے کا روزہ افطار ہوچکا ہے۔ میں نے عرض کیا : یا رسول اللہ (صلی اللہ علیہ وآلہ وسلم) ! اللہ تبارک وتعالیٰ آپ پر رحمت نازل کرے ! میں اس کی گردن پکڑ کر توڑ نہ دوں ؟ آپ (صلی اللہ علیہ وآلہ وسلم) نے فرمایا : اسے چھوڑو تمہارے چاہنے سے زیادہ کفارہ اسے لازم نہیں ہوتا ، میں نے عرض کیا : یا رسول اللہ ! اس کا کفارہ کیا ہے ؟ فرمایا : اس دن کی جگہ ایک دن اور روزہ رکھنا میں نے عرض کیا : جب یہ نہ پائے تو ؟ فرمایا : تب مجھے کچھ پروا نہیں ۔ (رواہ ابن جریر) کلام : ۔۔۔ ابن جریر کہتے ہیں : یہ حدیث باطل ہے اور دین میں اس حدیث سے حجت پکڑنا کسی طرح جائز نہیں ہے چونکہ سیدنا حضرت عمر ابن خطاب (رض) کا حضور اکرم (صلی اللہ علیہ وآلہ وسلم) سے روایت کرنے کا مخرج غیر معروف ہے اور صرف اسی طریق سے یہ معروف ہے نیز اس کی سند میں ابوبکر عبسی نامی راوی ہے اور اس کی روایات پر کسی طرح بھی اعتماد نہیں کیا جاسکتا نیز اس حدیث کو نقل کرنے سے حجت لازم نہیں ہوتی ۔ نیز ذہبی (رح) کہتے ہیں ابوبکر عبسی عن عمر مجہول سند ہے دیکھئے میزان الاعتدال 4994 ۔

24342 ۔۔۔ ثوبان کہتے ہیں کہ وہ رمضان کی اٹھارھویں تاریخ کو حضور اکرم (صلی اللہ علیہ وآلہ وسلم) کے ساتھ بقیع کی طرف نکلے چنانچہ آپ (صلی اللہ علیہ وآلہ وسلم) نے ایک شخص کو سینگی لگواتے ہوئے دیکھا آپ (صلی اللہ علیہ وآلہ وسلم) نے فرمایا : سینگی لگانے والے اور لگوانے والے کا روزہ افطار ہوچکا ہے۔ (رواہ ابن جریر وابن عساکر)

24343 ۔۔۔ روایت ہے کہ حضرت ابوسعید (رض) روزہ دار کے سینگی لگوانے میں کوئی حرج نہیں سمجھتے تھے اور فرمایا کرتے تھے کہ اندیشہ ضعف کی وجہ سے روزہ دار کے لیے سینگی لگوانا مکروہ سمجھا گیا ہے۔ (رواہ ابن جریر)

24344 ۔۔۔ حضرت ابو سعید خدری (رض) کہتے ہیں کہ حضور اکرم (صلی اللہ علیہ وآلہ وسلم) نے روزہ دار کو بوسہ لینے اور سینگی لگوانے میں رخصت عنایت فرمائی ہے ۔۔ (رواہ ابن جریر)

24345 ۔۔۔ ابو رافع (رض) روایت کرتے ہیں کہ ایک رات میں حضرت ابو موسیٰ (رض) کے پاس گیا اس وقت وہ سینگی لگوا رہے تھے میں نے کہا : اگر یہ کام دن کے وقت ہو ؟ جواب دیا : کیا تم مجھے بحالت روزہ خون بہانے کا حکم دیتے ہو ؟ حالانکہ میں نے حضور اکرم (صلی اللہ علیہ وآلہ وسلم) کو ارشاد فرماتے ہوئے سنا ہے کہ سینگی لگانے والے اور سینگی لگوانے والے کا روزہ افطار ہوچکا ہے۔ (رواہ ابن جریر)

24346 ۔۔۔ حضرت عبداللہ ابن عباس (رض) کی روایت ہے کہ ایک مرتبہ حضور اکرم (صلی اللہ علیہ وآلہ وسلم) نے سینگی لگوائی حالانکہ آپ (صلی اللہ علیہ وآلہ وسلم) روزہ میں تھے ۔۔ (رواہ ابن النجار)

24347 ۔۔۔ حضرت عبداللہ ابن عباس (رض) کی روایت ہے کہ ایک مرتبہ رسول کریم (صلی اللہ علیہ وآلہ وسلم) نے مقام قاحہ جو کہ مکہ مکرمہ اور مدینہ منورہ کے درمیان واقعہ ہے میں سینگی لگوائی حالانکہ آپ (صلی اللہ علیہ وآلہ وسلم) روزہ میں تھے اور احرام بھی باندھ رکھا تھا ۔ (رواہ ابن جریر)

24348 ۔۔۔ حضرت عائشۃ صدیقہ (رض) کی روایت ہے کہ ایک مرتبہ رسول کریم (صلی اللہ علیہ وآلہ وسلم) ایک شخص کے پاس سے گزرے وہ سینگی لگوا رہا تھا (اسے دیکھ کر) آپ (صلی اللہ علیہ وآلہ وسلم) نے فرمایا : سینگی لگانے والے اور لگوانے والے کا روزہ افطار ہوچکا ہے۔ (رواہ ابن جریر)

24349 ۔۔۔ حضرت عبداللہ ابن عمرو (رض) کی روایت ہے کہ حضور اکرم (صلی اللہ علیہ وآلہ وسلم) نے مکہ مکرمہ اور مدینہ منورہ کے درمیان سینگی لگوائی حالانکہ آپ (صلی اللہ علیہ وآلہ وسلم) نے احرام باندھ رکھا تھا اور بحالت روزہ تھے ۔ (رواہ ابن جریر)

24350 ۔۔۔ حسن بصری (رح) کی روایت ہے کہ حضور اکرم (صلی اللہ علیہ وآلہ وسلم) نے ایک سینگی لگانے والے کو بلایا حالانکہ آپ (صلی اللہ علیہ وآلہ وسلم) روزہ میں تھے آپ (صلی اللہ علیہ وآلہ وسلم) نے فرمایا : تھوڑی دیر انتظار کرو تاکہ سورج غروب ہوجائے نیز آپ (صلی اللہ علیہ وآلہ وسلم) نے یہ بھی فرمایا ہے کہ سینگی لگانے والے اور لگوانے والے کا روزہ ٹوٹ جاتا ہے ۔۔ (رواہ ابن جریر)

24351 ۔۔۔ عطاء (رح) کی روایت ہے کہ ایک مرتبہ حضور اکرم (صلی اللہ علیہ وآلہ وسلم) نے مقام قاحہ میں سینگی لگوائی جس کی وجہ سے آپ (صلی اللہ علیہ وآلہ وسلم) پر کچھ غشی طاری ہوگئی تاہم آپ (صلی اللہ علیہ وآلہ وسلم) نے روزہ دار کو سینگی لگوانے سے منع فرمایا : (رواہ ابن جریر و سعید بن المنصور فی سننہ)

24352 ۔۔۔ سیدنا حضرت علی المرتضی (رض) کی روایت ہے کہ رمضان کی اٹھارہویں تاریخ کو حضور اکرم (صلی اللہ علیہ وآلہ وسلم) ایک شخص کے پاس سے گزرے وہ سینگی لگوا رہا تھا آپ (صلی اللہ علیہ وآلہ وسلم) نے فرمایا : سینگی لگانے والے اور لگوانے والے کا روزہ افطار ہوگیا۔ (رواہ ابن جریر، وصححہ)

24353 ۔۔۔ سیدنا حضرت علی المرتضی (رض) نے فرمایا : سینگی لگانے والے اور لگوانے والے کا روزہ افطار ہوجاتا ہے۔ (رواہ ابن جریر)

24354 ۔۔۔ ” مسند علی (رض) “ حارث روایت نقل کرتے ہیں کہ سیدنا حضرت علی المرتضی (رض) مکروہ سمجھتے تھے کہ کوئی شخص بحالت روزہ حمام میں داخل ہو یا سینگی لگوائے ۔ (رواہ ابن جریر)

24355 ۔۔۔ ” مسند علی (رض) “ حارث بن عبداللہ کہتے ہیں مجھے سیدنا حضرت علی المرتضی (رض) نے بحالت روزہ سینگی لگوانے سے منع فرمایا ہے ۔۔ (رواہ ابن جریر)

24356 ۔۔۔ سیدنا حضرت علی المرتضی (رض) نے فرمایا : روزہ کی حالت میں سینگی نہ لگواؤ اور بحالت روزہ حمام میں بھی داخل نہ وہ ۔ (رواہ ابن جریر)

24357 ۔۔۔ حضرت علی (رض) سے مروی ہے کہ حاجم اومحجوم کا روزہ افطار ہوجاتا ہے۔ (رواہ مسدد) فائدہ : ۔۔۔ حاجم سینگی لگانے والا اور محجوم سینگی لگوانے والا ۔ حجامہ کو پچھنے سے بھی تفسیر کیا جاتا ہے۔

24358 ۔۔۔ حضرت انس بن مالک (رض) فرماتے ہیں : اندیشہ ضعف کی وجہ سے روزہ دار کے لیے سینگی لگوانا مکروہ سمجھا گیا ہے۔ (رواہ ابن جریر)

24359 ۔۔۔ حضرت انس بن مالک (رض) کی روایت ہے کہ حضور اکرم (صلی اللہ علیہ وآلہ وسلم) نے رمضان میں سینگی لگوائی حالانکہ آپ (صلی اللہ علیہ وآلہ وسلم) قبل ازیں فرما چکے تھے کہ حاجم اور محجوم کا روزہ افطار ہوجاتا ہے۔ (رواہ ابونعیم)

24360 ۔۔۔ حضرت انس بن مالک (رض) کی روایت ہے کہ ایک مرتبہ حضور اکرم (صلی اللہ علیہ وآلہ وسلم) ایک شخص کے پاس سے گزرے وہ پچھنے لگوا رہا تھا اور یہ رمضان کا مہینہ تھا ۔ آپ (صلی اللہ علیہ وآلہ وسلم) نے فرمایا : حاجم اور محجوم کا روزہ افطار ہوجاتا ہے۔ (رواہ ابن جریر)