11037 ۔۔۔ فرمایا کہ ” یہ جو مال ہے اس میں سے کچھ لینے والے کے لیے حلال ہے نہ دینے والے کے لیے نہ دھاگہ نہ سوئی “۔ (بیھقی فی شعب الایمان بروایت حضرت ثوبان (رض))

11038 ۔۔۔ فرمایا کہ ” انبیاء کرام میں سے ایک نبی نے ایک شہر والوں سے قتال کیا، جب شہر فتح ہونے والا تھا تو انھیں ڈر ہوا کہ کہیں سورج غروب نہ ہوجائے، تو انھوں نے سورج سے مخاطب ہو کر کہا کہ اے سورج تو بھی مامور ہے اور ہم بھی مامور ہیں تجھے میری عزت کی قسم دن میں کچھ دیر اور ٹھہرارہ، تو اللہ تعالیٰ نے سورج کو اسی جگہ روک دیا یہاں تک کہ شہر فتح ہوگیا اور وہ لوگ جب مال غنیمت حاصل کیا کرتے تھے تو اس کو ایک جگہ جمع کردیا کرتے تھے تو آگ آتی اور اس کو جلا دیتی، چنانچہ اس بار بھی انھوں نے مال غنیمت جمع کرکے رکھ دیا لیکن آگ اس مال کو جلانے نہ آئی، تو ان لوگوں نے نبی سے عرض کیا کہ اے اللہ کے نبی ! کیا ہوا کہ ہماری قربانی قبول نہیں ہوئی، انھوں نے فرمایا کہ تم میں سے کسی نے خیانت کی ہے، عرض کیا کہ ہمیں کیسے معلوم ہوگا کہ ہم میں سے کوئی خائن ہے، وہ بارہ قبیلے تھے تو اس نبی نے فرمایا کہ ہر قبیلے کا سردار میرے ہاتھ پر بیعت کرے گا، چنانچہ تمام قبیلوں کے سرداروں نے بیعت کی تو اس نبی کے ہاتھ میں ایک سردار کا ہاتھ پھسل گیا، تو انھوں نے اس سے فرمایا کہ تیرے پاس خیانت ہے، اس نے عرض کیا کہ مجھے اس شخص کے بارے میں کیسے معلوم ہوگا کہ قبیلے میں سے وہ کون ہے ؟ فرمایا کہ تو اپنے قبیلے کو بلا ہم تمام لوگوں کو فرداً فرداً بیعت کریں گے، ایسا ہی کیا تو ان میں سے ایک شخص کا ہاتھ ان کے ہاتھ میں پھسل گیا تو انھوں نے فرمایا کہ تیرے پاس خیانت ہے، اس نے کہا جی ہاں میرے پاس خیانت ہے، دریافت فرمایا کہ وہ کیا چیز ہے ؟ کہا کہ ایک بیل کا سر ہے جو سونے کا بنا ہوا ہے مجھے اچھا لگا تو میں نے لے لیا ؟ پھر وہ اسے لے آیا اور مال غنیمت میں شامل کردیا، تو آگ آئی اور اس مال کو جلادیا “۔ (مصنف عبدالرزاق، مستدرک حاکم بروایت حضرت ابوھریرۃ (رض))

11039 ۔۔۔ فرمایا کہ ” جس نے ناحق کسی کا اونٹ لیا تو وہ قیامت کے دن آئے گا اور اونٹ اس کی گردن پر سوار ہوگا اور آواز نکالتا ہوگا، اور اگر کسی نے ناحق کسی کی گائے لی تھی تو وہ قیامت کے دن آئے گا اور وہ گائے اس گردن پر سوار ہوگی اور آواز نکالتی ہوگی اور اگر کسی ناحق کسی کی بکری لی ہوگی تو اس کو قیامت کے دن لایا جائے گا اور بکر اس کی گردن پر سوار ہوگی اور آواز نکال رہی ہوگی “۔ (ابن جریر بروایت حضرت ابوھریرۃ (رض))

11040 ۔۔۔ فرمایا کہ ” جب میرے امتی مال غنیمت میں خیانت نہ کریں گے ان کا کوئی دشمن نہ ہوگا “۔ (دیلمی بروایت حضرت ابوذر (رض))

11041 ۔۔۔ فرمایا کہ ” اگر میرے امتی مال غنیمت میں خیانت نہ کرے تو اس کا کبھی کوئی دشمن نہ ہوگا “۔ (دیلمی بروایت حضرت ابوذر (رض))

11042 ۔۔۔ رسول اللہ (صلی اللہ علیہ وآلہ وسلم) نے حضرت سعد بن عبادۃ (رض) کو صدقہ وصول کرنے بھیجا تو فرمایا کہ اے سعد ! اس سے بچو کہ تم قیامت کے دن اس حال میں آؤ کہ اونٹ تمہاری گردن پر سوار ہو اور آواز نکال رہا ہو “۔ (ابن عساکر بروایت حضرت ابن عمر (رض))

11043 ۔۔۔ فرمایا کہ ” تمہارے ذمہ لازم ہے کہ تم مال غنیمت میں خیانت سے بچو، کوئی شخص کسی عورت پر قبضہ کرلیتا ہے مال تقسیم ہونے سے پہلے اور پھر تقسیم کرنے والے کو واپس کردیتا ہے “۔ (حسن بن سفیان اور ابن مندہ اور ابن السکن اور ابو نعیم فی المعرفہ بروایت حضرت ثابت بن رفیع الانصاری (رض))

11044 ۔۔۔ فرمایا کہ ” تم لوگوں کے لیے ضروری ہے کہ مال غنیمت میں خیانت سے بچو، ایک شخص کسی عورت سے نکاح کرلیتا ہے یا خمس نکالنے سے پہلے کسی جانور پر سوار ہوجاتا ہے “۔ (بخاری فی التاریخ اور بغوی اور باوردی اور ابن مندہ اور ابن السکن اور ابن قانع بروایت حضرت ثابت بن رفیع (رض) )

اور یہ بھی کہا گیا کہ یہ روایت ابن رویفع الانصاری (رض) سے ہے۔

11045 ۔۔۔ فرمایا کہ ” مال غنیمت میں خیانت سے بچو، کوئی شخص مال فے تقسیم ہونے سے پہلے کسی عورت سے نکاح کرلیتا ہے اور پھر اسے تقسیم کار کے حوالے کردیتا ہے اور پھر ایک کپڑا پہن لیتا ہے اور پرانا کردیتا ہے اور پھر تقسیم کار کو واپس کردیتا ہے “۔ (طبرانی بروایت حضرت رویفع بن ثابت (رض))

11046 ۔۔۔ فرمایا کہ ” ایک شخص ایک چوپائے پر سوار ہوجاتا ہے یہاں تک کہ واپس کرنے سے پہلے اس جانور کو چلاچلا کر تھکا دیتا ہے یا کوئی کپڑا پہن لیتا ہے اور واپس کرنے سے پہلے پرانا کردیتا ہے “۔ (مصنف ابن ابی شیبہ بروایت اوزاعن بعض الصحابہ)

11047 ۔۔۔ فرمایا کہ ” اے لوگو ! اگر کسی کے پاس کوئی چیز ہو تو واپس کردے اور یہ نہ کہے کہ دنیا کی شرمندگی، سنو ! دنیا کی شرمندگی آخرت کی شرمندگی سے زیادہ آسان ہے “۔ (طبرانی بروایت حضرت فضل بن عباس (رض))

11048 ۔۔۔ فرمایا کہ ” اگر تم کسی کو پاؤ کہ اس نے مال غنیمت میں خیانت کی ہے تو اس کی پٹائی کرو اور اس کا سامان جلادو (مسند احمد عدنی، دارمی، ابن حبان، ابی یعلی، شاشی، مستدرک حاکم، سعید بن منصور بروایت سالم بن عبداللہ بن عرض جدہ (رض))

11049 ۔۔۔ فرمایا کہ ” اور مال غنیمت میں خیانت نہ کرو اور جس نے خیانت کی اس کو قیمت کے دن (اس چیز کے ساتھ لایا جائے گا) ۔ (طبرانی بروایت کثیر بن عبداللہ عن ابیہ عن جدہ (رض))

11050 ۔۔۔ فرمایا کہ ” میں ہرگز تم میں سے کسی ایسے شخص کو نہ پہچانوں گا کہ جو قیامت کے دن آئے گا اور بکری اس کے کندھوں پر سوار ہوگی اور آواز نکال رہی ہوگی اور وہ شخص پکار رہا ہوگا یا محمد یامحمد، تو میں اس سے کہوں گا کہ میں اللہ تعالیٰ سے تیرے لیے بالکل کچھ نہیں کروا سکتا میں نے تو تجھے بتادیا تھا اور میں ہرگز تم میں سے کسی ایسے شخص کو نہ پہچانوں گا جو قیامت کے دن اونٹ اٹھائے ہوئے آئے گا اور وہ آواز نکال رہا ہوگا اور وہ شخص پکار رہا ہوگا یا محمد یامحمد تو میں اس سے کہوں گا کہ میں اللہ تعالیٰ سے تیرے لیے بالکل کچھ نہیں کروسکتا میں نے تجھے بتادیا تھا، اور نہ میں تم میں سے ایسے کسی شخص کو پہچانوں گا جو قیامت کے دن گھوڑا اٹھائے ہوئے آئے گا وہ گھوڑا آواز نکال رہا ہوگا اور وہ شخص پکار رہا ہوگا یامحمد یامحمد تو میں اس سے کہوں گا کہ میں اللہ تعالیٰ سے تیرے لیے بالکل کچھ نہیں کرواسکتا میں نے تو تجھے بتادیا تھا، اور میں ہرگز اس شخص کو بھی نہ پہچانوں گا جو قیامت کے دن چمڑے کا پرانا ٹکڑا اٹھائے ہوئے آئے گا اور پکارے گایامحمد یا محمد تو اس سے کہوں گا کہ میں اللہ تعالیٰ سے تیرے لیے بالکل کچھ نہیں کرواسکتا، میں نے تجھ کو بتادیا تھا “۔ (ابن جریر بروایت حضرت ابن عباس (رض))

11051 ۔۔۔ فرمایا کہ ” میں نے ۔۔۔ کو آگ کی چادر میں لیٹے ہوئے دیکھا وہ کالی چادر مراد ہے جو خیبر کے دن مال غنیمت میں سے خیانت کرکے حاصل کی تھی “۔ (ابن ابی عاصم اور ابو نعیم فی المعرفۃ بروایت خالد بن مغیث (رض))

11052 ۔۔۔ فرمایا کہ ” اے سعد ! بچو اس سے کہ قیامت کے دن اونٹ اٹھائے ہوئے آؤ اور وہ آواز نکال رہا ہو “۔ (ابن جریر، مستدرک حاکم بروایت حضرت ابن عمر (رض))

11053 ۔۔۔ ایک شخص نے رسول اللہ (صلی اللہ علیہ وآلہ وسلم) سے مال غنیمت میں سے ایک رسی کے بارے میں پوچھا تو آپ (صلی اللہ علیہ وآلہ وسلم) نے فرمایا کہ تجھے اس رسی کے بدلے آگ سے کون بچائے گا ؟ (ابن عساکر بروایت حضرت ابوھریرۃ (رض))

11054 ۔۔۔ فرمایا کہ ” اے لوگو ! تم میں سے ہمارے لیے اگر کسی نے کچھ کام کیا اور ہم نے اس میں سے سوئی یا اس سے بڑی کوئی چیز چھپالی تو یہ خیانت ہوگی جو قیامت کے دن لائی جائے گی، تم میں سے اگر کسی کو ہم کسی کام پر مقرر کریں توا سے چاہیے کہ کم زیادہ پورا کرے، سو جو اسے دیا جائے لے لے اور جس سے منع کیا جائے باز آجائے “۔ (مسند احمد، مسند ابی یعلی، متفق علیہ، بروایت حضرت عدی بن عمرۃ (رض) )

فائدہ :۔۔۔ مال غنیمت اس کو مال کو کہتے ہیں جو جنگ لڑ کر اور دشمن کو شکست دے کر حاصل کیا جائے اور مال فے اس مال کو کہتے ہیں جو دشمن سے جنگ کئے بغیر ان سے وصول کرلیا جائے۔ واللہ اعلم بالصواب۔ (مترجم)

11055 ۔۔۔ فرمایا کہ ” نقب زنی یقیناً حلال نہیں ہے “۔ (ابن ماجہ، ابن حبان، مستدرک حاکم بروایت حضرت ثعلبہ بن الحکم)

11056 ۔۔۔ فرمایا کہ ” بیشک نقب زنی مردار سے زیادہ حلال نہیں “۔ (سنن ابی داؤد عن رجل)