27497 ۔۔۔ حضرت عبداللہ بن عمرو (رض) کی روایت ہے کہ نبی کریم (صلی اللہ علیہ وآلہ وسلم) سے ایک پانی کے متعلق سوال کیا گیا جو بیابان میں واقع تھا اور اس پر چوپائے اور درندے بار بار وارد ہوتے تھے ۔ نبی کریم (صلی اللہ علیہ وآلہ وسلم) نے فرمایا : جب پانی دو قلوں (مٹکوں) تک پہنچ جائے نجاست کا متحمل نہیں ہوتا ۔ (رواہ سعید بن المنصور)

27498 ۔۔۔ حضرت عبداللہ بن مسعود (رض) ۔ روایت کی ہے کہ نبی کریم (صلی اللہ علیہ وآلہ وسلم) نے لیلۃ الجن کے موقع پر فرمایا : کیا تمہارے پاس پانی ہے ؟ حضرت عبداللہ بن مسعود (رض) نے عرض کیا : میرے پاس پانی نہیں البتہ برتن میں تھوڑی سی نبیذ ہے۔ آپ (صلی اللہ علیہ وآلہ وسلم) نے فرمایا : کھجوریں پاک ہیں اور پانی بھی پاک ہے۔ (رواہ ابن ابی شیبۃ)

27499 ۔۔۔ ” مسند علی “ کمیل کی روایت ہے کہ میں نے سیدنا حضرت علی المرتضی (رض) کو بارش کے پانی میں گھسے دیکھا پھر آپ (رض) مسجد میں داخل ہوئے نماز پڑھی اور پاؤں نہیں دھوئے ۔ (رواہ سعید بن المنصور)

27500 ۔۔۔ سیدنا حضرت علی المرتضی (رض) کی روایت ہے کہ آپ (رض) فرماتے ہیں : جب چوہا کنویں میں گرجائے پھر (پھول کر) پھٹ جائے (تو چوہا کنویں سے نکالنے کے بعد) کنویں سے نو (9) ڈول نکال لیے جائیں اور اگر چوہا جوں کا توں ہو اور پھٹ کر ٹکڑے ٹکڑے نہ ہوا ہو تو کنویں سے ایک یا دو ڈول پانی نکال لیا جائے ۔ اگر پانی بدبودار ہوجائے جو اس سے کہیں زیادہ ہو تو کنویں سے اتنی مقدار میں پانی نکالا جائے جو بدبو کو ختم کر دے ۔ (رواہ عبدالرزاق)

27501 ۔۔۔ معاذ بن علاء (عمرو بن علاء کے بھائی) عن ابیہ عن جدہ کی سند سے روایت نقل کرتے ہیں کہ میں سیدنا حضرت علی المرتضی (رض) کے ساتھ جمعہ کے لیے گیا آپ (صلی اللہ علیہ وآلہ وسلم) پیدل چل رہے تھے راستہ میں آپ کے اور مسجد کے درمیان حوض حائل تھا جو پانی اور گارے سے اٹا پڑا تھا، آپ (رض) نے جوتے اور شلوار اتاری اور حوض میں گھس گئے جب حوض پار کرلیا تو آپ (رض) نے شلوار اور جوتے پہن لیے پھر لوگوں کو نماز پڑھائی اور پاؤں نہیں دھوئے ۔ (رواہ البیہقی)

27502 ۔۔۔ سیدنا حضرت علی المرتضی (رض) نبیذ سے وضو کرنے میں کوئی حرج نہیں سمجھتے تھے ۔ (رواہ الدارقطنی)

27503 ۔۔۔ ” مسند ابوہریرہ “ حضرت ابوہریرہ (رض) کی روایت ہے کہ ان سے عورت کے بچے ہوئے پانی کے متعلق دریافت کیا گیا کہ کیا اس سے پانی حاصل کی جاسکتی ہے ؟ آپ (رض) نے فرمایا : ہم (میاں بیوی) لگن کے اردگرد جھگڑتے تھے اور پھر دونوں اس سے غسل کرلیتے تھے ۔ (رواہ ابن ابی شیبۃ)

27504 ۔۔۔ ” مسند حضرت عبداللہ بن عباس (رض) “ حضرت عبداللہ بن عباس (رض) روایت کی ہے کہ نبی کریم (صلی اللہ علیہ وآلہ وسلم) کی ایک بیوی نے لگن میں پانی لے کر غسل کیا پھر رسول اللہ (صلی اللہ علیہ وآلہ وسلم) آئے تاکہ اسی لگن سے غسل یا وضو کریں بیوی نے عرض کیا : یارسول اللہ (صلی اللہ علیہ وآلہ وسلم) میں حالت جنابت میں تھی (اور اسی لگن سے غسل کیا ہے) آپ نے فرمایا : پانی میں جنابت سرایت نہیں کرتی ۔ (رواہ ابن ابی شیبۃ)

27505 ۔۔۔ ” ایضاء “ نبی کریم (صلی اللہ علیہ وآلہ وسلم) کی ایک زوجہ مطہرہ نے غسل جنابت کیا اتنے میں نبی کریم (صلی اللہ علیہ وآلہ وسلم) تشریف لائے اور اس کے بچے ہوئے پانی سے وضو کرنا چاہا ، بیوی نے عرض کیا : اس پانی سے میں نے غسل کیا ہے۔ آپ نے فرمایا : پانی کو کوئی چیز نجس نہیں کرتی ۔ (رواہ عبدالرزاق)

27506 ۔۔۔ ” ایضا “ نبی کریم (صلی اللہ علیہ وآلہ وسلم) حضرت میمونہ (رض) کے بچے ہوئے پانی سے غسل کرلیتے تھے ۔ (رواہ عبدالرزاق)

27507 ۔۔۔ سلیمان تیمی کہتے ہیں : مجھے ابو حاجب نے بنی غفار کے ایک شخص سے جو کہ اصحاب نبی کریم (صلی اللہ علیہ وآلہ وسلم) میں سے ہے مروی حدیث سنائی کہ نبی کریم (صلی اللہ علیہ وآلہ وسلم) نے عورت کے بچے ہوئے پانی سے وضو کرنے سے منع فرمایا : (رواہ سعید بن المنصور)

27508 ۔۔۔ جابر بن یزید جعفی ، جویرہ (رض) زوجہ نبی کریم (صلی اللہ علیہ وآلہ وسلم) کے ایک قرابتدار سے روایت نقل کرتے ہیں کہ جویریہ (رض) نے فرمایا : میرے وضو کے بچے ہوئے پانی سے وضو نہ کیا جائے ۔ (رواہ عبدالرزاق)

27509 ۔۔۔ ” مسند عائشہ “ حضرت عائشۃ صدیقہ (رض) روایت کی ہے کہ نبی کریم (صلی اللہ علیہ وآلہ وسلم) جب وضو کرتے اپنا ہاتھ پانی میں رکھتے اللہ کا نام لیتے وضو کرتے اور پورا وضو کرتے تھے ۔ (رواہ ابن ابن ابی شیبۃ ضعیف)

27510 ۔۔۔ ایضاً حضرت عائشہ (رض) کی روایت ہے کہ رسول کریم (صلی اللہ علیہ وآلہ وسلم) فرق سے غسل کرتے تھے جو کہ بڑا پیالہ ہوتا ہے۔ اور میں اور آپ (صلی اللہ علیہ وآلہ وسلم) ایک برتن سے غسل کرتے تھے۔ رواہ عبدالرزاق وابن ابی شیبہ و سعید ابن منصور۔

27511:

” ایضاء “ حضرت عائشۃ صدیقہ (رض) روایت کی ہے کہ میں اور نبی کریم (صلی اللہ علیہ وآلہ وسلم) ایک ہی برتن سے غسل کرتے تھے جبکہ ہم حالت جنابت میں ہوتے تھے میں رسول اللہ (صلی اللہ علیہ وآلہ وسلم) کے سر مبارک سے جوئیں نکالتی تھیں جبکہ آپ مسجد میں اعتکاف میں بیٹھے ہونے اور میں حالت حیض میں ہوتی ، جب میں حیض میں ہوتی آپ مجھے تہبند باندھنے کا حکم دیتے پھر میرے ساتھ مباشرت (صرف لیٹ کر سونا مراد ہے) کرتے ۔۔ (رواہ عبدالرزاق، وابن ابی شیبۃ)

27512 ۔۔۔ ” ایضا “ میں اور نبی کریم (صلی اللہ علیہ وآلہ وسلم) ایک ہی برتن سے غسل کرلیتے تھے اور ہم اکٹھے برتن میں ہاتھ رکھتے تھے ۔۔ (رواہ عبدالرزاق، وابن ابی شیبۃ)

27513 ۔۔۔ ” ایضا ٗ ‘ میں اور نبی کریم (صلی اللہ علیہ وآلہ وسلم) اکٹھے غسل کرتے تھے ایک ہی برتن سے البتہ آپ غسل میں پہل کرتے تھے ۔ (رواہ ابن ابی شیبۃ)

27514 ۔۔۔ ” مسند عبداللہ بن عمر “ ہم اور عورتیں اکٹھے وضو کرتے تھے ۔ (رواہ عبدالرزاق)

27515 ۔۔۔ رسول اللہ (صلی اللہ علیہ وآلہ وسلم) کے زمانے میں ہم اور عورتیں ایک ہی برتن سے وضو کرتے تھے ۔ (رواہ عبدالرزاق)

27516 ۔۔۔ حضرت عبداللہ بن عمرو (رض) روایت کی ہے کہ میں نے نبی کریم (صلی اللہ علیہ وآلہ وسلم) کے زمانے میں ایک ہی برتن سے مردوں اور عورتوں کو وضو کرتے دیکھا ہے۔ (رواہ سعید بن المنصور)