(٣٧٢٢٢) حضرت جابر سے روایت ہے کہ نبی پاک (صلی اللہ علیہ وآلہ وسلم) نے ایک مدبر غلام کو بیچا۔

اور (امام) ابوحنیفہ کا قول یہ ذکر کیا گیا ہے کہ : مُدَبَّر غلام نہیں بیچا جاسکتا۔

(٣٧٢٢٣) حضرت ابن عباس سے روایت ہے کہ نبی پاک (صلی اللہ علیہ وآلہ وسلم) نے تدفین کے بعد قبر پر نماز جنازہ پڑھا ۔

(٣٧٢٢٤) حضرت خارجہ بن زید اپنے تایا یزید بن ثابت سے روایت کرتے ہیں کہ نبی پاک (صلی اللہ علیہ وآلہ وسلم) نے ایک عورت کی تدفین کے بعد اس کا جنازہ پڑھا اور آپ (صلی اللہ علیہ وآلہ وسلم) نے اس پر چار تکبیریں کہیں۔

(٣٧٢٢٥) حضرت امامہ بن سہل اپنے والد سے روایت کرتے ہیں کہ انھوں نے فرمایا : آپ (صلی اللہ علیہ وآلہ وسلم) فقراء مدینہ کی عیادت کرتے تھے اور جب وہ مرتے تو ان کے جنازہ میں حاضر ہوتے تھے۔ راوی کہتے ہیں : اہل عوالی میں سے ایک عورت نے وفات پائی، راوی کہتے ہیں : آپ (صلی اللہ علیہ وآلہ وسلم) اس عورت کی قبر کی طرف تشریف لے گئے اور آپ نے چار تکبیرات کہیں۔

(٣٧٢٢٦) حضرت عمران بن حصین روایت کرتے ہیں کہ آپ (صلی اللہ علیہ وآلہ وسلم) نے فرمایا : تمہارا ایک بھائی وفات پا گیا ہے پس تم اس کا جنازہ پڑھو، اس سے نجاشی مراد ہے۔

(٣٧٢٢٧) حضرت ابوہریرہ روایت کرتے ہیں کہ آپ (صلی اللہ علیہ وآلہ وسلم) نے نجاشی کا جنازہ پڑھایا اور آپ نے اس میں چار تکبیریں کہیں۔

(٣٧٢٢٨) حضرت ابن عباس روایت کرتے ہیں کہ نبی پاک نے ایک میت پر تدفین ہوجانے کے بعد جنازہ پڑھایا۔

(٣٧٢٢٩) حضرت جابر روایت کرتے ہیں کہ نبی پاک (صلی اللہ علیہ وآلہ وسلم) نے اصحمہ پر جنازہ پڑھایا اور چار تکبیریں کہیں۔

اور (امام) ابوحنیفہ کا قول یہ ذکر کیا گیا ہے کہ ایک میت پر دو مرتبہ جنازہ نہیں ہوتا۔

(٣٧٢٣٠) حضرت ابن عباس روایت کرتے ہیں کہ نبی پاک (صلی اللہ علیہ وآلہ وسلم) نے (ہدی کو) دائیں جانب سے اشعار (زخم زدہ) فرمایا اور اپنے دست مبارک سے اس پر خون ملا۔

(٣٧٢٣١) حضرت مسور بن مخرمہ اور مروان روایت کرتے ہیں کہ نبی پاک (صلی اللہ علیہ وآلہ وسلم) حدیبیہ کے سال اپنے ایک ہزار کے قریب صحابہ کے ہمراہ نکلے پس جب آپ ذوالحلیفہ میں پہنچے تو آپ نے ہدی کو قلادہ پہنایا اور اس کو زخم زدہ فرمایا اور احرام باندھا۔

(٣٧٢٣٢) حضرت عائشہ روایت کرتی ہیں کہ نبی پاک (صلی اللہ علیہ وآلہ وسلم) نے اشعار فرمایا۔

اور (امام) ابوحنیفہ کا قول یہ ذکر کیا گیا ہے کہ : زخم زدہ کرنا مثلہ ہے۔

(٣٧٢٣٣) حضرت ہلال بن یساف سے منقول ہے کہ زیاد بن ابی الجعد نے میرا ہاتھ پکڑا اور مجھے رق میں ایک استاد کے پاس ٹھہرا دیا جن کو وابصہ بن معبد کہا جاتا تھا، انھوں نے فرمایا کہ ایک آدمی نے صف کے پیچھے اکیلے نماز پڑھی تو نبی پاک (صلی اللہ علیہ وآلہ وسلم) نے اس کو نماز کے اعادہ کا حکم دیا۔

(٣٧٢٣٤) حضرت عبد الرحمن بن علی بن شیبان، اپنے والد علی بن شیبان سے، جو کہ وفد کا ایک حصہ تھے، سے روایت کرتے ہیں کہ ہم نکلے یہاں تک کہ نبی پاک (صلی اللہ علیہ وآلہ وسلم) کی خدمت میں حاضر ہوئے۔ پس ہم نے آپ (صلی اللہ علیہ وآلہ وسلم) کی بیعت کی، اور ہم نے آپ کے پیچھے نماز پڑھی، آپ (صلی اللہ علیہ وآلہ وسلم) نے ایک شخص کو دیکھا جو صف کے پیچھے نماز پڑھ رہا تھا، راوی کہتے ہیں : نبی پاک (صلی اللہ علیہ وآلہ وسلم) اس کے پاس کھڑے ہوگئے یہاں تک کہ وہ نماز سے فارغ ہوگیا تو آپ (صلی اللہ علیہ وآلہ وسلم) نے فرمایا : تم اپنی نماز دوبارہ پڑھو، اس لیے کہ صف کے پیچھے کھڑے ہونے والے کی نماز نہیں ہوتی۔

اور (امام) ابوحنیفہ کا قول یہ ذکر کیا گیا ہے کہ : اس کی یہ نماز جائز ہے۔

(٣٧٢٣٥) حضرت عبداللہ سے روایت ہے کہ نبی پاک (صلی اللہ علیہ وآلہ وسلم) نے ایک مرد اور اس کی عورت کے درمیان لعان کروایا اور فرمایا، امید ہے کہ اس عورت کا سیاہ رنگ بچہ پیدا ہو۔ پس اس عورت کا سیاہ رنگ بچہ پیدا ہوا۔

(٣٧٢٣٦) حضرت ابن عباس روایت کرتے ہیں کہ نبی پاک (صلی اللہ علیہ وآلہ وسلم) نے حمل کی بنیاد پر لعان کروایا۔

(٣٧٢٣٧) حضرت شعبی سے اس آدمی کے بارے میں یہ فتویٰ منقول ہے جو اپنی عورت کے حمل سے برأت کا اظہار کرے ، کہ ایسا آدمی عورت سے لعان کرے گا۔

اور (امام) ابوحنیفہ کا قول یہ ذکر کیا گیا ہے کہ : وہ حمل (کے انکار کی بنیاد) پر لعان کے قائل نہ تھے۔

(٣٧٢٣٨) حضرت عمران بن حصین روایت کرتے ہیں کہ ایک آدمی کے پاس چھ غلام تھے، اس نے انھیں اپنی موت کے وقت آزاد کردیا تو آپ (صلی اللہ علیہ وآلہ وسلم) نے ان میں قرعہ اندازی کی اور ان میں سے دو کو آزاد ‘ اور چار کو غلام قرار دے دیا۔

(٣٧٢٣٩) حضرت ابوہریرہ نے بھی نبی پاک (صلی اللہ علیہ وآلہ وسلم) سے ایسی روایت نقل کی ہے۔

اور (امام) ابوحنیفہ کا قول یہ ذکر کیا گیا کہ : ایسی آزادی کا کوئی اعتبار نہیں اور وہ قرعہ اندازی کے بھی قائل نہیں ہیں۔

(٣٧٢٤٠) حضرت زید بن خالد، شبل اور ابوہریرہ روایت کرتے ہیں کہ ہم نبی پاک (صلی اللہ علیہ وآلہ وسلم) کے پاس حاضر تھے ، کہ ایک آدمی آپ (صلی اللہ علیہ وآلہ وسلم) کے پاس حاضر ہوا اور اس نے آپ سے محصن زانیہ لونڈی کے بارے میں سوال کیا تو آپ (صلی اللہ علیہ وآلہ وسلم) نے فرمایا : اس کو کوڑے مارو، پھر اگر وہ دوبارہ گناہ کرے تو پھر کوڑے مارو، راوی کہتے ہیں کہ پھر آپ (صلی اللہ علیہ وآلہ وسلم) نے تیسری اور چوتھی مرتبہ میں فرمایا، پھر اس کو بیچ دو اگرچہ ایک رسی کے بدلہ میں ہو۔

(٣٧٢٤١) حضرت علی سے روایت ہے کہ رسول اللہ (صلی اللہ علیہ وآلہ وسلم) نے ارشاد فرمایا : اپنے غلاموں اور باندیوں پر حُدُود قائم کرو۔