24738 ۔۔۔ وہ مسلمان جو لوگوں سے میل جول رکھتا ہو اور ان کی اذیتوں پر صبر کرتا ہو وہ اس مسلمان سے بہتر و افضل ہے جو لوگوں سے میل جول نہ رکھتا ہو اور نہ ہی ان کی اذیتوں پر صبر کرسکتا ہو۔ ( رواہ ابوداؤد الطیالسی واحمد بن حنبل الترمذی وابن ماجہ)

24739 ۔۔۔ روحیں جمع شدہ لشکر ہیں جن کی آپس میں جان پہچان ہوجاتی ہے وہ ایک دوسرے سے محبت کرنے لگتی ہیں اور جو روحیں ایک دوسرے سے اجنبیت اختیار کریں ان کا آپس میں اختلاف ہوجاتا ہے۔ (رواہ ابن عساکر عن سلمان)

24740 ۔۔۔ روحیں جمع شدہ لشکر ہیں جن کی آپس میں جان پہچان ہوجاتی ہے وہ آپس میں محبت کرنے لگتی ہیں اور جو آپس میں اجنبیت محسوس کریں ان کا آپس میں اختلاف ہوجاتا ہے جب نری باتوں کا ظہور ہونے لگے عمل کرنا مشکل ہوجائے زبانیں آپس میں ملی ہوئی ہوں دل ایک دوسرے سے بغض رکھتے ہوں اور ہر رشتہ دار سے قطع تعلقی کی جائے اس وقت اللہ تعالیٰ ان پر لعنت کرتا ہے اور انھیں بہرا اندھا کردیتا ہے۔ (رواہ الحسن بن سفیان والطبرانی وابن عساکر عن سلمان)

24741 ۔۔۔ روحیں جمع شدہ لشکر ہیں وہ آپس میں ملاقات کرتی ہیں جن کی آپس میں جان پہچان ہوجائے وہ آپس میں محبت کرتی ہیں اور جو ایک دوسرے سے اجنبیت محسوس کریں وہ الگ الگ ہوجاتی ہیں۔ ( راہ الدیلمی عن علی)

24742 ۔۔۔ اپنے دوست سے اتنی ٹوٹ کر محبت نہ کرو ہوسکتا ہے ایک دن وہ تمہارا دشمن بن جائے، اپنے دشمن سے بغض کم رکھو ہوسکتا ہے ایک وہ تمہارا دوست بن جائے۔ ( رواہ الترمذی والبیھقی فی شعب الایمان عن ابوہریرہ والطبرانی عن ابی عمرو عن ابن عمر والدار قطنی فی الافراد وابن عدی والبیھقی فی شعب الایمان عن علی موقوفا)

24743 ۔۔۔ جب کوئی شخص کسی دوسرے شخص سے دوستی قائم کرنا چاہے اسے چاہیے کہ وہ اس کا نام اس کے باپ کا نام اور اس کے قبیلے کا نام دریافت کرلے چونکہ یہ چیز محبت کو زیادہ عروج بخشی ہے۔ ( رواہ ابن سعد والبخاری فی تاریخہ والترمذی عن یزید بن نعامۃ الضبی) ۔ کلام : ۔۔۔ حدیث ضعیف ہے دیکھئے اسنی المطالب 95، والتمیز 13 ۔

24744 ۔۔۔ جب تم کسی کو اپنا دوست بناؤ اس سے اس کا نام اور اس کے باپ کا نام دریافت کرلو اگر وہ تمہارے پاس سے غائب ہوگیا تم اسے یاد رکھو گے اگر بیمار پڑگیا اس کی عیادت کرو گے اگر مرگیا تم اس کے پاس حاضر ہو جاؤ گے۔ ( رواہ البیھقی فی شعب الایمان عن ابن عمر ) ۔ کلام : ۔۔۔ حدیث ضعیف ہے دیکھئے ضعیف الجامع 270 والضعیفۃ 1725 ۔

24745 ۔۔۔ جب تم میں سے کوئی شخص اپنے بھائی سے محبت کرتا ہو اسے چاہیے کہ وہ اپنے بھائی کو بتادے کہ وہ اسے سے محبت کرتا ہے۔ (رواہ احمد بن حبنل والبخاری فی الادب المفرد وابو داؤد والترمذی وابن حبان والحاکم عن المقدام بن معدیکرب وابن حبان عن انس والبخاری فی الادب المفرد عن اجل من الصحابۃ)

24746 ۔۔۔ جب تم میں سے کوئی شخص اپنے دوست سے محبت کرتا ہو اسے چاہیے کہ وہ اس کے گھر آئے اور اسے بتائے کہ وہ محض اللہ تعالیٰ کی رضا کے لیے اس سے محبت کرتا ہے۔ ( رواہ احمد بن حنبل والضیاء عن ابی ذر)

24747 ۔۔۔ جب تم میں سے کوئی شخص اللہ تعالیٰ کی رضا کے لیے بھائی سے محبت کرتا ہو اسے چاہیے کہ وہ اپنے بھائی کو بتادے چونکہ یہ چیز محبت کو زیادہ پختہ اور ثابت بناتی ہے۔ ( رواہ ابن ابی الدنیا فی کتاب الاخوان عن مجاہد مرسلا)

24748 ۔۔۔ جس شخص کے دل میں اپنے بھائی کی محبت ہو اور وہ اسے محبت کی اطلاع نہ کرے گویا اس نے اپنے بھائی سے خیانت کی۔ (راہ ابن ابی الدنیا عن مکحول مرسلا) ۔ کلام : ۔۔۔ حدیث ضعیف ہے دیکھئے ضعیف الجامع 5798 ۔

24749 ۔۔۔ جب تم میں سے کوئی شخص کسی بندے سے محبت کرتا ہو وہ اسے خبر کر دے چونکہ جس طرح وہ اس کے لیے نرم گوشہ رکھتا ہے اسی طرح وہ بھی اس کے لیے نرم گوشہ رکھتا ہے۔ ( رواہ البیھقی فی شعب الایمان عن ابن عمر) ۔ کلام : ۔۔۔ حدیث ضعیف ہے دیکھئے ضعیف الجامع 294 ۔

24750 ۔۔۔ جب تم کسی شخص سے محبت کرو تو اسے دھوکا مت دو اور نہ ہی شر و فساد کے لیے اس سے محبت کرو اس کے متعلق کسی سے سوال بھی مت کرو۔ ہوسکتا ہے تم اس کے دشمن سے سوال کر بیٹھو جو تمہیں اس کے متعلق غلط خبر دے بیٹھے اور یوں تمہارے اور اس کے درمیان ہونے والی محبت جدائی میں بدل جائے۔ ( رواہ ابو نعیم فی الحلیۃ عن معاذ) ۔ کلام : ۔۔۔ حدیث ضعیف ہے دیکھئے ضعیف الجامع 300 والضعیفۃ۔

24751 ۔۔۔ جب تم میں سے کوئی شخص اپنے بھائی کی کوئی بری چیز دیکھے اسے چاہیے کہ وہ چیز اسے دکھا دے۔ ( رواہ ابوداؤد فی مراسیلہ عن ابن شھاب والدار قطنی فی الافراد عنہ عن انس بلفظ اذا نزع ) ۔ کلام : ۔۔۔ حدیث ضعیف ہے دیکھئے ضعیف الجامع 439 ۔۔ فائدہ۔۔۔ مناوی نے فیض القدیر میں ذکر کیا ہے کہ حدیث ضعیف الاسناد ہے لیکن حدیث مرسل حدیث مسند سے قوی ہوجاتی ہے دیکھئے فیض القدیر 3201 ۔

24752 ۔۔۔ تم اپنے بھائی کے لیے آئینہ ہو لہٰذا جب اس میں کوئی بری چیز دیکھے اسے دور کر دے۔ ( رواہ الترمذی عن ابوہریرہ ) ۔ کلام : ۔۔۔ حدیث ضعیف ہے دیکھئے ضعیف الترمذی 327 و ضعیف الجامع 1371 ۔

24753 ۔۔۔ تم میں سے جب کوئی شخص مجلس میں آیا اس کے بھائی نے اس کے لیے مجلس میں گنجائش پیدا کردی یہ اس کا اکرام ہے جس سے اللہ تعالیٰ نے اس کی عزت افزائی کی ہے۔ ( رواہ البخاری فی تاریخ والبیھقی فی شعب الایمان عن مصعب بن شیبۃ)

24754 ۔۔۔ جب تم میں سے کسی کے پاس کوئی ملاقات کرنے آئے تو اس کا اکرام کرو۔ ( رواہ الخرائطی فی مکارم الاخلاق والدیلمی فی الفردوس عن انس)

24755 ۔۔۔ جب تم اپنے دوست میں تین خصلتیں دیکھو تو اس سے بھلائی کی امید رکھو حیا، امانت اور سچائی جب یہ خصلتیں اس میں نہ دیکھو تو اس سے بھلائی کی امید نہ رکھو۔ ( رواہ ابن عدی والدیلمی عن ابن عباس) ۔ کلام : ۔۔۔ حدیث ضعیف ہے دیکھئے ذخیرۃ الحفاظ 303 و ضعیف الجامع 516 ۔

24756 ۔۔۔ تم میں سے جب کوئی شخص اپنے دوست کی زیارت کے لیے جائے پھر اس کے پاس سے اس وقت تک نہ اٹھے جب تک اس سے اجازت نہ لے لے۔ ( رواہ الدیلمی فی الفردوس عن ابن عمر)

24757 ۔۔۔ جب تم میں سے کوئی شخص اپنے دوست کی زیارت کو جائے اور اس نے اسے خاک آلود سے بچانے کے لیے زمین پر کوئی چیز ( کپڑا چٹائی وغیرہ) بچھائی اللہ تعالیٰ اسے عذاب آتش سے بچائے گا۔ ( رواہ الطبرانی عن سلیمان)