18959 ۔۔۔ جس نے وضو مکمل کیا جس طرح اللہ نے حکم دیا ہے تو فرض نمازیں درمیانی اوقات کے لیے کفارہ بن جاتی ہیں۔ (مسلم ، نسائی ، ابن ماجۃ عن عثمان (رض))

18960 ۔۔۔ جس نے اپنے گھر میں طہارت حاصل کی پر اللہ کے گھروں میں سے کسی گھر میں گیا تاکہ اللہ کے فرائض میں سے ایک فرض کو ادا کرے تو اس کے قدموں میں سے ہر ایک قدم ایک خطاء کو معاف کرتا ہے اور دوسرا قدم درجہ بلند کرتا ہے۔ (مسلم عن ابوہریرہ (رض))

18961 ۔۔۔ جو اپنے گھر سے طہارت حاصل کرکے فرض نماز کے لیے نکلا تو اس کا اجر احرام باندھنے والے حاجی کی طرح ہے۔ اور جو شخص چاشت کی نماز کے لیے نکلا اور اس کا مقصد صرف یہی تھا تو اس اجر عمرہ کرنے والے کی طرح ہے۔ اور نماز جبکہ دونوں کے درمیان کوئی لغو کام نہ ہو علیین میں لکھی جاتی ہے۔ (ابوداؤد عن ابی امامۃ) کلام : ۔۔۔ علامہ منذری فرماتے ہیں اس حدیث کا ایک راوی قاسم ابو عبدالرحمن میں کچھ کلام ہے۔ عون المعبود 2 ۔ 265)

18962 ۔۔۔ جس نے نماز پڑھی اور نماز کے انتظار می بیٹھ گیا تو وہ مسلسل نماز میں رہے گا حتی کہ وہ نماز آجائے جس کا انتظار ہے (نسائی ، الضعفاء للعقیلی عبداللہ بن سلام و ابوہریرہ (رض))

18963 ۔۔۔ کوئی بندہ وضو کرتا ہے اور اچھی طرح وضو کرتا ہے پھر نماز پڑھتا ہے تو اس کے اندر نماز اور آئندہ نماز کے درمیان کے گناہ معاف کردیئے جاتے ہیں۔ (بخاری ، مسلم عن عثمان (رض))

18964 ۔۔۔ بندہ مسلسل نماز میں رہتا ہے جب تک وہ مسجد میں بیٹھا نماز کا انتظار کرتا رہتا ہے جب تک بےوضو نہ ہوجائے۔ (بخاری ، مسلم ابو داؤد ، نسائی عن ابوہریرہ (رض))

18965 ۔۔۔ بندہ مستقل نماز میں رہتا ہے جب تک نماز اس کو روکے رکھتی ہے اس کو گھر واپس آنے سے صرف نماز ہی روکے رکھتی ہے۔ (مسند احمد ، مسلم ابو داؤد عن ابوہریرہ (رض))

18966 ۔۔۔ خوشخبری لو ، یہ تمہارا ربے جس نے آسمان سے دروازہ کھول دیا ہے۔ اور ملائکہ کے سامنے تم پر فخر کررہا ہے کہ دیکھو میرے بندوں کو جو ایک فرض پورا کرکے دوسرے فرض کے منتظر ہیں۔ (مسند احمد ، ابن ماجۃ عن ابن عمرو)

18967 ۔۔۔ بندہ جب نماز کے لیے کھڑا ہوتا ہے تو جنت کے دروازے اس کے لیے کھول دیئے جاتے ہیں اور پروردگار کے اور اس کے بیچ سے پردے اٹھ جاتے ہیں اور حورعین اس کا استقبال کرتی ہے جب تک کہ وہ ناک کی ریزش صاف نہ کرے یا کھانسے نہیں ۔ (الکبیر اللطبرانی عن ابی امامہ)

18968 ۔۔۔ بندہ مؤمن جب نماز کے لیے کھڑا ہوتا ہے تو اس کے گناہ اس کے سر پر لاد دیئے جاتے ہیں پس وہ اپنی نماز سے نہیں ہٹتا مگر وہ سب گناہ اس طرح جھڑ جاتے ہیں جس طرح کھجور کے خوشے دائیں بائیں گرجاتے ہیں۔ (الکبیر للطبرانی عن سلمان ، الجامع لعبد الرزاق عن سلمان موقوفا) کلام : ۔۔۔ اس روایت کرو علامہ ہیثمی (رح) نے مجمع الزوائد 1 ۔ 300 پر نقل فرمایا اور فرمایا کہ اس میں ابان بن ابی عباس ایک روای ہے جس کو شعبہ اور احمد وغیرہما نے ضعیف قرار دیا ہے۔

18969 ۔۔۔ مسلمان بندہ نماز پڑھتا ہے اور اس کے گناہ اس کے سر پر اکٹھے ہوجاتے ہیں جب بھی وہ سجدہ کرتا ہے تو وہ گناہ اس سے جھڑتے رہتے ہیں حتی کہ جب وہ نماز سے فارغ ہوتا ہے تو اس سے اس کے گناہ کرچکے ہوتے ہیں۔ (الکبیر للطبرانی ، شعب الایمان للبیہقی عن سلمان (رض)) کلام : ۔۔۔ علامہ ہیثمی (رح) نے مجمع میں 1 ۔ 300 پر اس کو نقل فرمایا کہ اس میں اشعث بن اشعث سعدانی (متکلم فیہ) راوی ہے۔

18970 ۔۔۔ نمازی بادشاہ کا دروازہ کھٹکھٹاتا ہے اور جو ہمیشہ اور مسلسل دروازہ کھٹکھٹاتا رہتا ہے بالآخر اس کے دروازہ کھول دیا جاتا ہے۔ (الدیلمی عن عمر (رض))

18971 ۔۔۔ جس نے نماز پر محافظت کی نماز اس کے لیے قیامت کے دن نور اور برہان ہوگی ، اور اس کی نجات کا ذریعہ ہوگی ۔ اور جس نے نماز پر محافظت نہیں کی اس کے لیے کوئی نور ہوگا اور نہ برہان اور نہ کوئی نجات کو سبب ۔ اور وہ قیامت کے روز قارون ، فرعون ، ہامان اور ابی بن خلف کے ساتھ ہوگا ۔ (مسند احمد ، الکبیر للطبرانی، شعب الایمان للبیہقیعن ابن عمرو)

18972 ۔۔۔ دین میں نماز کا مقام ایسا ہے جیسے بدن میں سر کا مقام (الدیلمی عن ابن عمر (رض))

18973 ۔۔۔ آدمی کی نماز اس کے دل میں نور پیدا کرتی ہے پس جو چاہے اپنے دل کو (زیادہ سے زیادہ) منور کرلے ۔ (الدیلمی عن ابوہریرہ (رض))

18974 ۔۔۔ اے ابوذر ! مسلمان بندہ جب اللہ عزوجل کی رضاء کے لیے نماز پڑھتا ہے تو اس کے گناہ اس سے یوں جھڑ جاتے ہیں جس طرح یہ پتے اس درخت سے گر رہے ہیں (خزاں کے موسم میں) ۔ (مسنداحمد ، الرؤیانی ، السنن لسعید بن منصور عن ابی ذر (رض))

18975 ۔۔۔ مجھے تمہاری دنیا میں سے عورتیں اور خوشبو پسند ہیں اور میری آنکھوں کی ٹھنڈک نماز میں رکھی گئی ہے۔ (السنن للبیہقی عن انس (رض))

18976 ۔۔۔ زمین کے جس ٹکڑے پر نماز کے ساتھ ذکر کیا جاتا ہے وہ قطعہ زمین اپنے گردوپیش کے زمینی حصوں پر فخر کرتا ہے اور اللہ کے ذکر سے وہ حصہ زمین ساتویں زمین تک خوش ہوجاتا ہے۔ (الکبیر للطبرانی عن ابن عباس (رض))

18977 ۔۔۔ نماز کے بعد اگلی نماز ادا کرنا جبکہ درمیان میں کوئی لغو کام نہ ہو علیین میں لکھا جاتا ہے۔ (ابوداؤد ، الکبیر للطبرانی ، شعب الایمان للبیہقی ، عن ابی امامۃ (رض))

18978 ۔۔۔ کوئی مسلمان ایسا نہیں ہے جو وضو کرے اور اچھی طرح وضو کرے پھر کھڑے ہو کر دو رکعت نماز ادا کرے اور اپنے دل اور چہرے کے ساتھ (ہمہ تن) نماز میں متوجہ رہے مگر اس کے لیے جنت واجب ہوجاتی ہے۔ (مسلم ، ابو داؤد عن عقبۃ بن عامر)