9290 ۔۔۔ فرمایا کہ ” شاید تجھے اسی کی وجہ سے رزق دیا جاتا ہو۔ (ترمذی، مستدرک حاکم بروایت حضرت انس (رض))

فائدہ :۔۔۔ اس روایت کا پس منظر یہ ہے کہ، دو بھائی تھے، ایک ہر وقت جناب نبی کریم (صلی اللہ علیہ وآلہ وسلم) کی خدمت میں موجود

رہتا اور عبادات وغیرہ میں مشغول رہتا، جبکہ دوسرا کمانے کی فکر میں لگا رہتا، ایک مرتبہ کمانے والے بھائی نے جناب نبی کریم (صلی اللہ علیہ وآلہ وسلم) کی خدمت میں حاضر ہو کر عبادت گزار بھائی کی شکایت کی کہ میں اکیلا محنت کر کے کماتا ہوں جبکہ یہ ہر وقت عبادت میں مشغول رہتا ہے اور کام کاج بالکل نہیں کرتا، تو آپ (صلی اللہ علیہ وآلہ وسلم) نے جواب میں فرمایا کہ شاید تجھے اسی کی وجہ سے رزق دیا جاتا ہو “۔

یعنی اگر کوئی شخص محنت کر کے حلال مال بھی کماتا ہے تو اسے یہ نہ سمجھنا چاہیے کہ میں جو کچھ حاصل کررہا ہوں اپنی محنت سے حاصل کررہا ہوں، بلکہ جو کچھ بھی مل رہا ہے اسے اللہ تعالیٰ کا دین سمجھنا چاہیے۔

اور یہ بھی معلوم ہوا کہ اللہ تعالیٰ کی عبادت اور فرمان برداری سے رزق میں اضافہ ہوتا ہے کمی نہیں، اس لیے اس میں کمی نہیں کرنی چاہیے بلکہ عبادات وغیرہ کا زیادہ اہتمام کرنا چاہیے اور یہ بھی معلوم ہوا کہ رزق بعض اوقات صرف محنت سے نہیں بلکہ نیک لوگوں کی برکت سے بھی ملتا ہے خواہ وہ نیک لوگ مدرسوں میں ہوں یا خانقاہوں میں ہوں یا گھروں میں۔ (مترجم)

9291 ۔۔۔ فرمایا کہ ” اللہ تعالیٰ فرماتے ہیں کہ میں دو شریکوں میں سے تیسرا ہوتا ہوں جب تک ایک دوسرے کے ساتھ خیانت نہ کرے، سوجی سے ہی ایک دوسرے کے ساتھ خیانت کرتا ہے میں بیچ سے نکل جاتا ہوں “۔ (سنن ابی داؤد، مستدرک حاکم بروایت حضرت ابوھریرہ (رض) )

فائدہ :۔۔۔ یہاں شریکوں سے مراد شراکت دار ہیں یعنی جب دو آدمی آپس میں مل کر کاروبار کرتے ہیں تو ساتھ اللہ تعالیٰ بھی شریک ہوجاتے ہیں، اور اللہ تعالیٰ کی شرکت کا مطلب رحمتوں اور برکتوں کی فراوانی ہے لہٰذا جب دونوں میں سے کوئی ایک دوسرے کو دھوکا دینے لگتا ہے یا خیانت کرتا ہے تو اللہ تعالیٰ ان کے درمیان سے نکل جاتے ہیں یعنی ان کے کاروبار سے رحمت اور برکت ختم ہوجاتی ہے۔ (مترجم)

9292 ۔۔۔ فرمایا کہ ” صبح صبح شیاطین اپنے جھنڈے لے کر بازاروں کی طرف جاتے ہیں اور جو شخص سب سے پہلے بازار میں داخل ہوتا ہے اس کے ساتھ یہ بھی داخل ہوجاتے ہیں اور جو شخص سب سے آخر میں بازار سے نکلتا ہے اس کے ساتھ یہ بھی نکل آتے ہیں “۔ (طبرانی بہ بروایت حضرت ابو اسامہ (رض))

9293 ۔۔۔ فرمایا کہ ” وہ شخص ہم میں سے نہیں جو دھوکا کرتا ہے “۔ (مسند احمد، سنن ابی داؤد، ابن ماجہ، مستدرک حاکم بروایت حضرت ابوھریرہ (رض))

9294 ۔۔۔ فرمایا کہ ” کسی شہر کے بازار اس شہر کا بدترین حصہ ہوا کرتے ہیں “۔ (مستدرک حکم بروایت حضرت جبیر بن مطعم (رض))

9295 ۔۔۔ فرمایا کہ ” جب تم فجر کی نماز پڑھ لو تو رزق تلاش کرنے کے بجائے سو مت جایا کرو “۔ (طبرانی بروایت حضرت ابن عباس (رض))

9296 ۔۔۔ فرمایا کہ ” جب اللہ تعالیٰ کسی رزق کے اسباب مہیا کردیں توا سے نہ چھوڑے حتی کہ وہ اسباب ختم ہوجائیں “۔ (مسند احمد، ابن ماجہ بروایت ام المومنین حضرت عائشہ صدیقہ (رض)

9297 ۔۔۔ فرمایا کہ ” جب اللہ تعالیٰ تم میں سے کسی کے لیے رزق کا دروازہ کھولیں توا سے چاہیے کہ اس کو لازم پکڑے “ (شعب الایمان للبیھقی بروایت ام المومنین حضرت عائشہ صدیقہ (رض))

9298 ۔۔۔ فرمایا کہ ” زمین کے پوشیدہ حصوں سے بھی رزق تلاش کرو “۔ (مسند ابی یعلی، طبرانی، شعب الایمان بیھقی بروایت ام المومنین حضرت عائشہ صدیقہ (رض))

9299 ۔۔۔ فرمایا کہ ” زمین کے پوشیدہ حصوں سے بھی رزق ڈھونڈو “۔ (دارقطنی فی الافراد، شعب الایمان للبیھقی بروایت ام المومنین حضرت عائشہ، (رض) )

فائدہ :۔۔۔ ان روایات سے معلوم ہوا کہ رزق حلال جہاں سے بھی ملے اس کو حاصل کرنا چاہیے خواہ اس کے لیے اپنے ملک سے باہر ہی کیوں نہ جاناپڑے۔ (مترجم)

9300 ۔۔۔ فرمایا کہ ” جس کے لیے تجارت مشکل ہوجائے تو اس کو چاہیے کہ وہ عمان چلا جائے “۔ (طبرانی بروایت شرحبیل بن سلمہ (رض))

9301 ۔۔۔ فرمایا کہ جسے کمائی نے تھکا دیا ہوا سے چاہیے کہ وہ مصر چلا جائے اور پھر مصر میں بھی مغربی جانب “۔ (ابن عساکر بروایت حضرت ابن عمر (رض))

9302 ۔۔۔ فرمایا کہ ” دنیا کی طلب میں میانہ روی اختیار کرو، بیشک اللہ تعالیٰ نے تمہارے رزق کی ذمہ داری لی ہے، اپنے کاموں میں اللہ تعالیٰ سے مدد مانگا کرو، کیونکہ وہ جو چاہتا ہے مٹا دیتا ہے اور جو چاہتا ہے باقی رکھتا ہے اور لوح محفوظ (بھی) اسی کے پاس ہے “۔ (متفق علیہ مستدرک حاکم بروایت حضرت عمر (رض))

9303 ۔۔۔ فرمایا کہ ” رزق کے راستے میں پردے ہوتے ہیں لہٰذا جو چاہے اپنی حیا کی کمی کی بناء پر ان پردوں کو ہٹادے اور اپنا رزق حاصل کرلے اور جو چاہے اپنی حیا کو باقی رکھے اور رزق کو پردوں میں چھپا رہنے دے، جب تک رزق اللہ تعالیٰ کی لکھی ہوئی تقدیر کے مطابق خود اس تک نہ پہنچے۔ (دیلمی بروایت حضرت جابر (رض))

فائدہ :۔۔۔ اس روایت میں جس حیا کا ذکر ہے اس کی تشریح پہلے ہوچکی ہے وہیں دیکھ لی جائے، اور تقدیر کے مطابق ملنے سے مراد کمیت و کیفیت ہے۔

اس سے یہ بھی معلوم ہوا کہ ہر شخص کو جتنا رزق ملنا ہے وہ تقدیر میں لکھا جا چکا ہے لیکن تقدیر مبرم میں۔ تقدیر معلق میں لکھے جانے کا یہ مطلب ہے کہ اس شخص کے بارے میں تقدیر میں لکھا جا چکا ہوتا ہے کہ اگر یہ محنت مزدوری کرے اور حیا (یعنی عار) سے کام نہ لے تو اس کو اتنا اتنا رزق ملے گا ورنہ اتنا لہٰذا جو شخص حیا کو بالائے طاق رکھ کر رزق کے پردے ہٹادے گا وہ بڑی مقدار میں حصہ پالے گا اور جو شرم وحیا، مروت، یا کام کو عار سمجھنے کی وجہ سے رزق کے ان پردوں کو نہیں ہٹائے گا اس کو وہی ملے گا جو اس کے لیے لکھا جا چکا ہے واللہ اعلم بالصواب۔ (مترجم)

9304 ۔۔۔ فرمایا کہ ” بیشک کوئی انسان اس وقت تک نہیں مرے گا جب تک اپنا رزق مکمل نہ کرلے اور یہ نہ سمجھو کہ رزق ملنے میں تاخیر ہورہی ہے اور اے لوگو ! اللہ سے ڈرو، اور تلاش رزق میں میانہ روی اختیار کرو اور جو حلال ہے وہ لو اور حرام کو چھوڑ دو “۔ (مستدرک حاکم، ابن الجارود بروایت حضرت جابر (رض))

9305 ۔۔۔ فرمایا کہ ” میں نے تمہیں ذرائع معاش اختیار کرتے ہوئے دیکھا، یہ تمام جہانوں کے رب کے بھیجے ہوئے نمائندے حضرت جبرائیل (علیہ السلام) ہیں جنہوں نے میرے دل میں یہ بات ڈالی ہے کہ کوئی شخص اس وقت تک نہ مرے گا جب تک اپنا رزق نہ مکمل کرلے اگرچہ کچھ تاخیر سے ہی کیوں نہ ہو، لہٰذا اے لوگو ! اللہ سے ڈرو اور تلاش رزق میں میانہ روی اختیار کرو، اور رزق ملنے میں دیر ہونے کی وجہ سے کہیں جلد (بازی میں) گناہ کا راستہ اختیارمت کرلینا کیونکہ اللہ تعالیٰ کے پاس جو کچھ ہے وہ اس کی فرمان برداری کرنے سے ہی ملتا ہے نافرمانی سے نہیں “۔ (حکیم بروایت حضرت حذیفہ اور حضرت ابن مسعود (رض))

9306 ۔۔۔ فرمایا کہ ” روح امین نے میرے دل میں یہ بات ڈالی ہے کہ کوئی شخص اس وقت تک نہیں مرے گا جب تک اپنا رزق پورا پورا حاصل نہ کرلے، لہٰذا تلاش رزق میں میانہ روی سے کام لو “۔ (عسکری فی الامثال بروایت حضرت ابن مسعود (رض))

9307 ۔۔۔ فرمایا کہ ” روح القدس نے میرے دل میں یہ ڈالی ہے کہ کون انسان دنیا سے اس وقت تک نہیں نکلے گا جب تک اپنی زندگی کی مقررہ مقدار پوری نہ کرلے اور اپنا رزق پورا حاصل نہ کرلے لہٰذا تلاش رزق میں میانہ روی سے کام لو، اور دیر ہونے کی وجہ سے کہیں گناہ کا راستہ مت اختیار کرلینا، کیونکہ اللہ تعالیٰ کے پاس جو کچھ ہے وہ اس کی فرمان برداری سے ملتا ہے نافرمانی سے نہیں “۔ (طبرانی بروایت حضرت ابو امامۃ (رض))

9308 ۔۔۔ فرمایا کہ ” روح القدس نے میرے دل میں یہ بات ڈالی ہے کہ کوئی شخص اس وقت نہ مرے گا جب تک اپنا رزق مکمل نہ کرلے لہٰذا طلب رزق میں میانہ روی سے کام لو، اور رزق ملنے میں دیر ہونے کی وجہ سے کہیں ایسا نہ ہو کہ تم اللہ کا فضل (رزق) گناہ کے راستے سے حاصل کرنے لگو، کیونکہ اللہ تعالیٰ کے پاس جو کچھ ہے وہ اس کی فرمان برداری سے ہی مل سکتا ہے نافرمانی سے نہیں “۔ (العسکری فی الامثال بروایت حضرت ابن مسعود (رض))

9309 ۔۔۔ فرمایا کہ ” اے لوگو ! خدا کی قسم میں تم کو اسی بات کا حکم دیتا ہوں جس کا حکم اللہ تعالیٰ نے تمہیں دیا ہے اور اسی بات سے روکتا ہوں جس سے اللہ نے تمہیں روکا ہے، لہٰذا طلب رزق میں میانہ روی اختیار کرو قسم ہے اس ذات کی جس کے قبضے میں میری جان ہے اس کی موت اس کو تلاش کرتی ہے، لہٰذا اگر رزق میں سے کچھ حاصل کرنا (کبھی) مشکل ہو تو اللہ عزوجل کی اطاعت سے حاصل کرو “۔ (طبرانی بروایت حضرت حسن بن علی (رض))

فائدہ :۔۔۔ باقی مضامین تو یکساں ہیں البتہ یہ جو کہا کہ اللہ کی اطاعت سے حاصل کروتویہ وہی مضمون ہے جو آیت :

” واستعینوا بالصبر والصلوٰۃ “ الایۃ

یعنی اللہ سے مدد مانگو صبر اور نماز کے ذریعے۔ میں سمجھایا گیا ہے۔

ابو القاسم جناب نبی کریم (صلی اللہ علیہ وآلہ وسلم) کی کنیت مبارکہ ہے۔ (مترجم)