٩٤٤۔۔ قریب ہے کہ میرے پاس میرے رب کا قاصد آجائے اور میں اس کی دعوت پر لبیک کہہ دوں تودیکھومیں تمہارے درمیان دوعظیم چیزیں چھوڑے جارہاہوں کتاب اللہ جو اللہ کی رسی ہے آسمان سے زمین تک پھیلی ہوئی ہے دوسرا میرا خاندان یعنی اہل بیت سو خیال رکھنا میرے بعد تم ان کے کیساسلوک کرتے ہو۔ ابن ابی شیبہ، ابن سعد، مسنداحمد، لابی یعلی، بروایت ابی سعید۔

٩٤٥۔۔ میں تم میں ایسی چیز چھوڑے جارہاہوں اگر تم اس کو مضبوطی سے تھام لوتوہرگز کبھی گمراہی میں نہ پڑو گے وہ اللہ کی کتاب اور میرا خاندان یعنی اہل بیت ۔ اور یہ دونوں باہم کبھی جدا نہیں ہوں گے حتی کہ دونوں حوض پر میرے پاس آئیں۔ عبد بن حمید، ابن الانباری، بروایت زید بن ثابت۔

٩٤٦۔۔ میں تمہارے لیے آگے جانے والاہوں، اور تم میرے پاس حوض پرآؤ گے جس کی چوڑائی صنعاء سے بصری تک ہوگی، اس میں ستاروں کی طرح لاتعداد سونے چاندی کے آبخورے ہوں گے پس خیال رکھنا کہ میرے بعد تہارا ان دونوں عظیم چیزوں کے بارے میں کیا رویہ ہے پوچھا گیا وہ دوعظیم چیزیں کیا ہیں یارسول اللہ ؟ فرمایا بڑی تو کتاب اللہ ہے جس کا ایک سر اللہ کے دست قدرت میں ہے تو دوسرا تمہارے ہاتھ میں۔ اس کو مضبوطی سے تھام لو تو ہرگز کبھی لغزش میں مبتلا ہو گے نہ کبھی گمراہی میں پڑو گے ۔ اور اس سے چھوٹی چیز میرا خاندان یعنی اہل بیت۔ اور یہ دونوں باہم کبھی جدا نہ ہوں گے ۔۔ حتی کہ دونوں حوض پر میرے پاس آئیں۔ اور اس چیز کا میں نے ان کے لیے اپنے رب سے سوال کیا تھا، اور تم ان دونوں سے آگے بڑھنے کی کبھی مت سوچنا اور ورنہ ہلاک ہوجاؤ گے۔ اور نہ ان کو کچھ سکھانے کی کوشش کرنا کیونکہ وہ تم سے زیادہ اعلم ہے۔ الطبرانی فی الکبیر، بروایت زید بن ثابت (رض)۔

٩٤٧۔۔ میں تم میں دوخلیفہ چھوڑے جارہاہوں کتاب اللہ جو اللہ کی رسی ہے ، آسمان و زمین کے درمیان پھیلی ہوئی ہے دوسرا میرا خاندان یعنی اہل بیت۔ اور یہ دونوں باہم کبھی جدا نہ ہوں گے۔۔ حتی کہ دونوں حوض پر میرے پاس آئیں۔ مسند احمد الکبیر، للطبرانی (رح) ، السنن لسعید، بروایت زید بن ثابت (رض) ، الکبیر للطبرانی (رح) بروایت زید بن ارقم۔

948 ۔۔ میں تم میں ایسی چیزیں چھوڑے جا رہا ہوں اگر تم اس کو مضبوطی سے تھام لو تو ہرگز کبھی گمراہی میں نہ پڑو گے ، وہ اللہ کی کتاب اور میرا خاندان یعنی اہل بیت ۔ ابن ابی شیبہ الخطیب فی المتفق والمفترق بروایت جابر (رض)۔

949 ۔۔ میں تم میں دو چیزیں چھوڑے جارہاہوں تم جب تک ان دونوں کو مضبوطی سے تھامے رہو گے ہرگز گمراہ نہ ہوں گے یا سیکھتے رہو گے اللہ تعالیٰ کی کتاب اور میری سنت دونوں جدا نہ ہوں گی حتی کہ دونوں میرے پاس حوض کوثر پر پہنچ جائیں۔ بیہقی عن ابوہریرہ (رض)۔

950 ۔۔ اے لوگو میں تم میں دو ایسی چیزیں چھوڑے جا رہاہوں اگر تم میرے بعد ان کو مضبوط پکڑو گے تو ہرگز گمراہ نہ ہو گے ایک دوسری سے بڑھی ہوئی ہے ایک اللہ کی کتاب جو ایک رسی کی مانند ہے جو کہ آسمان اور زمین کے درمیان پھیلی ہوئی ہے دوسرا میرا خاندان اور اہل بیت یہ دونوں چیزیں جدا نہ ہوں گی حتی کہ میرے پاس حوض کوثر پر آجائیں۔ عبدالرزاق طبرانی عن ابی سعید۔

٩٥١۔۔ میں تم میں ایسی چیز چھوڑے جارہاہوں اگر تم اس کو مضبوطی سے تھام لوتوہرگز کبھی گمراہی میں نہ پڑو گے وہ اللہ کی کتاب ہے اور میرا خاندان یعنی اہل یت ۔ ابن ابی شیبہ ، الخطیب فی المتفق ، والمتفرق بروایت جابر (رض)۔

٩٥٢۔۔ گویا میرا بلاوا آگیا ہے اور میں نے اس کی دعوت کو قبول کرلیا ہے میں تم میں دوعظیم چیزیں چھوڑ کر جارہاہوں کتاب اللہ جو اللہ کی رسی ہے آسمان و زمین کے درمیان پھیلی ہوئی ہے ، دوسرا میرا خاندان یعنی اہل بیت ۔ اور یہ یہ دونوں باہم کبھی جدا نہ ہوں گے حتی کہ دونوں حوض پر میرے پاس آئیں ، پس خیال رکھنا کہ میرے بعد تمہارا ان دونوں کے بارے میں کیا رویہ ہے۔ المسند لابی یعلی ، الطبرانی فی الکبیر، ابی سعید۔

٩٥٣۔۔ گویا میرا بلاوا آگیا ہے اور میں نے اس کی دعوت کو قبول کرلیا ہے میں تم میں دوعظیم چیزیں چھوڑ کر جارہاہوں ایک کا مرتبہ دوسرے سے بڑھا ہوا ہے کتاب اللہ اور میرا گھرانہ اہل بیت۔ پس خیال رکھنا کہ میرے بعد تمہارا ان دونوں کے بارے میں کیا رویہ ہے، اور یہ دونوں باہم کبھی جدا نہ ہوں گے حتی کہ دونوں حوض پر میرے پاس آئیں اللہ میرا مولی ہے اور میں ہر مومن کا ولی ہوں، اور جس کا میں مولی علی بھی اس کے مولی۔ اے اللہ جو ان سے محبت رکھے آپ بھی اس سے محبت رکھے اور جو ان سے دشمنی رکھے آپ بھی اس سے دشمنی رکھئے۔ الکبیر للطبرانی ، المستدرک للحاکم، بروایت ابی الطفیل ، عن زید بن ارقم۔

٩٥٤۔۔ اے لوگو ! میں تم میں ایسی چیز چھوڑے جارہاہوں اگر تم اس کو مضبوطی سے تھام لوتوہرگز کبھی گمراہی میں نہ پڑو گے وہ اللہ کی کتاب، اور اس کے نبی کی سنت ہے۔ بخاری مسلم ، بروایت ابن عباس (رض)۔

٩٥٥۔۔ اللہ کی کتاب ، اور میری سنت دونوں باہم کبھی جدا نہ ہوں گے۔۔ حتی کہ دونوں حوض پر میرے پاس آئیں۔ ابونصر السجزی ، فی الابانہ، بروایت ابوہریرہ (رض)۔ لیکن صاحب کتاب فرماتے ہیں کہ یہ حدیث ضعیف ہے۔

٩٥٦۔۔ کتاب اللہ اللہ کی رسی ہے ہے جو آسمان و زمین کے درمیان پھیلی ہوئی ہے۔ ابن ابی شبیہ، ابن جریر بروایت ابی سعید۔

٩٥٧۔۔ قریب ہے کہ میرے پاس میرے رب کا قاصد آجائے اور میں اس کی دعوت پر لبیک کہہ دوں، تو تمہارا میرے متعلق کیا خیال ہے صحابہ کرام نے عرض کیا آپ مکمل طور پر ہمارے ساتھ خیرخواہی فرماچکے ہیں۔ کیا تم شہادت نہیں دیتے اللہ کے سوا کوئی معبود نہیں اور میں اللہ کا بندہ ہوں اور اس کا رسول ہوں۔ اور یہ کہ جنت حق ہے۔ جہنم حق ہے دوبارہ اٹھایاجانا حق ہے صحابہ کرام رضوان اللہ نے عرض کیا ہم ضرور اس کی شہادت دیتے ہیں۔ آپ نے فرمایا، اور میں بھی تمہارے ساتھ شہادت دیتاہوں۔

توجہ سے میری بات سنو۔۔ میں تمہارے لیے آگے جانے والاہوں اور تم میرے پاس حوض کوثر پرآؤ گے جس کی چوڑائی صنعاء سے بصری تک ہوگی اس میں ستاروں کی طرح لاتعداد سونے چاندی کے آبخورے ہوں گے پس خیال رکھنا کہ میرے بعد تمہارا ن دونوں عظیم چیزوں کے بارے میں کیا رویہ ہے۔ پوچھا گیا وہ دوعظیم چیزیں کیا ہیں یارسول اللہ فرمایا بڑی تو کتاب اللہ ہے جس کا ایک سر اللہ کے دست قدرت میں ہے تودوسراسرا تمہارے ہاتھ میں اس کو مضبوطی سے تھام لوتوہرگز کبھی لغزش میں مبتلا نہیں ہوں گے نہ کبھی گمراہی میں پڑو گے دوسرا میرا خاندان۔ اور مجھے لطیف وخبیرذات نے خبر دی ہے کہ یہ دونوں کبھی باہم جدا نہ ہوں گے حتی کہ یہ حوض پر میرے پاس آجائیں اور اس چیز کا میں نے ان کے لیے اپنے پروردگار سے سوال کیا تھا، سو تم ان دونوں سے آگے بڑھنے کی کبھی سوچنا مت، ورنہ ہلاک ہوجاؤ گے نہ ان کی متعلق کوتاہی کرنا، نہ ان کو کچھ سکھانے کی کوشش کرنا، کیونکہ وہ تم سے زیادہ علم والا ہے۔ اور میں ہر مومن کا ولی ہوں، اور جس کا میں مولی علی بھی اس کامولی ہے ، اے اللہ جو ان سے محبت رکھے آپ بھی اس سے محبت رکھئے۔ اور جو ان سے دشمنی رکھے آپ بھی اس سے دشمنی رکھئے۔ الکبیر للطبرانی (رح) ، بروایت ابی الطفیل، بروایت زید بن ارقم۔

٩٥٨۔۔ اے لوگو مجھے لطیف وخبیر ذات نے خبر دی کہ کسی نبی نے اپنے سے پہلے نبی کی نصف عمر جتنی زندگی سے زیادہ زندگی نہیں پائی سو قریب ہے کہ میرے پاس میرے رب کا قاصد آجائے اور میں اس کی دعوت پر لبئیک کہہ دوں، اور مجھ سے بھی سوال ہوگا اور تم سے بھی سوال ہوگا تو تم کیا کہو گے صحابہ کرام نے عرض کیا ہم شہادت دیں گے کہ آپ نے حق تبلیغ ادا کردیا۔ آپ نے فرمایا، کیا تم شہادت نہیں دیتے ہو کہ اللہ کے سوا کوئی معبود نہیں اور میں اللہ کا بندہ ہوں اور اس کا رسول ہوں ، اور یہ کہ جنت حق ہے جہنم حق ہے موت کے بعد دوبارہ اٹھایاجانا حق ہے اور یہ کہ اللہ تعالیٰ قبروں کے مردوں کو دوبارہ اٹھائیں گے اے انسانو، اللہ میرا مولا ہے ، اور میں مومنین کامولی ہوں، ان کے نفوس سے زیادہ ان پرولایت رکھتا ہوں پس جس کا میں مولی ہوں علی بھی اس کے مولی ہیں اے اللہ جو انھیں دوست رکھے آپ بھی ان کو دوست رکھئے۔ اور جو ان سے دشمنی رکھے آپ بھی اس سے دشمنی رکھو۔ میں تمہارے لیے آگے جانے والا اور تم میرے پاس حوض کوثر پرآؤ گے جس کی چوڑائی صنعاء سے بصری تک ہوگی۔ اس میں ستاروں کی تعداد سے زیادہ سونے چاندی کے آبخورے ہوں گے اور جب تم میرے پاس آؤ گے تو میں تم سے ان دو چیزوں عظیم کے بارے میں سوال کروں گا، کہ ان کے بارے میں تمہارا کیا رویہ ہے ان میں سے بڑی اللہ کی کتاب ہے جس کا ایک سرا اللہ کے دست قدرت میں ہے تو دوسرا سرا تمہارے ہاتھ میں۔ اس کو مضبوطی سے تھام لو تو ہرگز گمراہ نہ ہو گے اور دوسرا میرا خاندان اہل بیت ہے اور مجھے لطیف وخبیر ذات نے خبر دی کہ یہ دونوں کبھی ختم نہ ہوں گے حتی کہ میرے پاس حوض پر آجائیں۔ الحکیم الطبرانی فی الکبیر، بروایت ابی الطفیل ، عن حذیفہ بن اسید۔

٩٥٩۔۔ اے لوگو۔ کوئی نبی مبعوث نہیں ہوئے مگر انھوں نے اپنے سے پہلے نبی کی نصف عمر جتنی زندگی پائی سو قریب ہے کہ میرے پاس میرے رب کا قاصد آجائے اور میں اس کی دعوت پر لبیک کہہ دوں میں تم میں ایسی چیز چھوڑے جارہاہوں کہ تم اس کے بعد ہرگز کبھی گمراہی نہ پڑو گے وہ اللہ کی کتاب ہے۔ الکبیر للطبرانی (رح) بروایت زید ن ارقم۔

٩٦٠۔۔ جب تک میں تمہارے درمیان ہوں ، میری اطاعت کرتے رہو، اور جب گزرجاؤں تو کتاب اللہ کی لازمی طور پر تھام لینا، اس کے حلال کو حال اور حرام کو حرام قرار دینا، عنقریب قرآن پر ایک زمانہ آئے گا کہ وہ ایک رات میں مصاحف اور قلوب سے نکل جائے گا۔ الفردوس دیلمی، بروایت معاذ (رض)۔

٩٦١۔۔ میں محمد امی پیغمبر ہوں میں محمدامی پیغمبر ہوں، میں محمد امی پیغمبر ہوں ، میرے بعد کوئی پیغمبر نہیں آئے گا، مجھے ابتدائی کلمات اختتامی کلمات اور جامع کلمات دیے گئے اور مجھے معلوم ہے کہ جہنم کے کتنے داروغے ہیں اور حاملین عرش کی کیا تعداد ہے اور میرے رب میں اپنے لیے اور اپنی امت کے لیے عافیت کا طلب گار ہوں سو جب تک میں تمہارے درمیان ہوں مجھ سے سن سن کر اطاعت کرتے رہو، جب مجھے اٹھالیا جائے گا تو کتاب اللہ کو لازم پکڑو۔ اس کے حلال کو حلال سمجھو اور حرام کو حرام۔ مسنداحمد، بروایت ابن عمر (رض)۔

٩٦٢۔۔ سب سے افضل بات کتاب اللہ کی ہے ، اور سب سے اچھا طریقہ محمد کا طریقہ ہے اور سب سے بدترامردین میں نئی بات پیدا کرنا ہے اور ہر بدعت گمراہی ہے جس نے مال چھورا اس کے اہل و عیال کے لیے اور جس نے قرض یا بےآسرا اہل وغیرہ چھوڑے اس کا بوجھ میرے ذمہ ہے۔ الاوسط للطبرانی (رح) بروایت جابر (رض)۔

٩٦٣۔۔ سب سے سچی بات کتاب اللہ کی ہے سب سے عمدہ طریقہ محمد کا طریقہ ہے اور سب سے بدترین امردین میں نئی پیدا کردہ باتیں ہیں اور ہر بدعت گمراہی ہے۔ مسنداحمد، بروایت ابن مسعود۔