25298 ۔۔۔ جب تم میں سے کوئی شخص اپنے بھائی سے ملاقات کرے وہ اسے سلام کرے اگر ان دونوں کے درمیان درخت یا دیوار یا پتھر حائل ہوجائے اور ان کی پھر ملاقات ہو تو وہ دوبارہ سلام کرے ۔ (رواہ ابوداؤد وابن ماجہ ، وٍالبیہقی فی شعب الایمان، عن ابو ہریرہ (رض))

25299 ۔۔۔ جب کچھ لوگ کسی قوم کے پاس سے گزریں، گزرنے والوں میں سے ایک شخص نے بیٹھے ہوؤں کو سلام کردیا اور ان میں سے ایک نے سلام کا جواب دیا تو یہ سلام اور جواب دونوں جماعتوں کی طرف سے کافی ہوجائے گا ۔ (رواہ ابو نعیم فی الحلیۃ عن ابی سعید)

25300 ۔۔۔ سلام میں ابتداء کرنے والا تکبر سے پاک ہوتا ہے۔ (رواہ البیہقی فی شعب الایمان، والخطیب فی الجامع عن ابن مسعود) ۔ کلام : ۔۔۔ حدیث ضعیف ہے دیکھئے الجامع 2365 ۔

25301 ۔۔۔ سلام میں ابتدا کرنے والا قطع کلامی سے بری ہوجاتا ہے۔ (رواہ ابونعیم فی الحلیۃ ، عن ابن مسعود (رض)) ۔ کلام : ۔۔۔ حدیث ضعیف ہے دیکھئے ضعیف الجامع 2364 والضعیفۃ 1751 ۔

25302 ۔۔۔ جو شخص مجلس سے اٹھ کھڑا ہو اس کا حق ہے کہ اہل مجلس کو سلام کرے اور جو شخص مجلس میں آئے اس کا بھی حق ہے کہ اہل مجلس کو سلام کرے ۔ (رواہ الطبرانی وٍالبیہقی فی شعب الایمان، عن معاذ بن انس (رض)) ۔ کلام : ۔۔۔ حدیث ضعیف ہے دیکھئے ضعیف الجامع 52735 ۔

25303 ۔۔۔ سلام کا جواب دو اور چھینکنے والے کو بھی جواب دو ، (رواہ ابن عساکر عن ابن مسعود (رض)) ۔ کلام : ۔۔۔ حدیث ضعیف ہے دیکھئے ضعیف الجامع 32813 ۔

25304 ۔۔۔ سوار پیادہ کو سلام کرے ، چلنے والا بیٹھے ہوئے کو سلام کرے تھوڑے زیادہ کو سلام کریں ، جس نے سلام کا جواب دیا اس کا اجرو ثواب اس کے لیے ہوگا اور جو سلام کا جواب نہ دے اس کے لیے کچھ نہیں ہوگا ۔ (رواہ احمد بن حنبل وابوداؤد عن عبدالرحمن بن شبل (رض))

25305 ۔۔۔ سوار پیدل چلنے والے کو سلام کرے ، پیدل چلنے ولا بیٹھے ہوئے کو سلام کرے تھوڑے زیادہ کو سلام کریں ۔ (رواہ احمد بن حنبل والبخاری ومسلم وابوداؤد والترمذی ، عن ابو ہریرہ (رض))

25306 ۔۔۔ سوال پیادہ کو سلام کرے پیدل چلنے والا کھڑے کو سلام کرے تھوڑے زیادہ کو سلام کریں ۔ (رواہ الترمذی عن فضالۃ بن عبید (رض))

25307 ۔۔۔ جب تم میں سے کوئی شخص سلام کرنے کا ارادہ کرے وہ یوں کہے : ” السلام علیکم “ چونکہ اللہ ہی سلام ہے اللہ سے پہلے کسی چیز سے ابتدا نہ کرو ۔ (رواہ ابن اسنی فی عمل یوم ولیلۃ ، عن ابو ہریرہ (رض)) ۔ کلام : ۔۔۔ حدیث ضعیف ہے دیکھئے ضعیف الجامع 317 والضعیفۃ 2319 ۔

25308 ۔۔۔ جب تم مجھے اس حالت میں یعنی پیشاب وغیرہ کے لیے بیٹھے ہوئے دیکھو مجھے سلام مت کرو چونکہ اگر تم نے سلام کیا میں تمہیں جواب نہیں دوں گا ۔ (رواہ ابن ماجہ عن جابر (رض))

25309 ۔۔۔ یہودی جب تمہیں سلام کریں گے یوں کہیں گے ۔ السام علیکم تم جو میں وعلیک کہہ دو ۔ (رواہ مالک واحمد بن حنبل والبخاری ومسلم ، عن ابن عمرو (رض))

25310 ۔۔۔ جب کوئی یہودی تمہیں سلام کرتا ہے وہ یوں کہتا ہے ’ السلام علیکم “ تم جواب میں وعلیکم کہہ دو ۔ (رواہ ابوداؤد والترمذی عن ابن عمرو (رض))

25311 ۔۔۔ اہل کتاب کو سلام کا جواب دیتے ہوئے ” وعلیکم “ سے زیادہ مت کہو ۔ (رواہ ابو عوانہ عن انس) ۔ کلام : ۔۔۔ حدیث ضعیف ہے دیکھئے ضعیف الجامع 6217 ۔

25312 ۔۔۔ کل میں یہودیوں کے پاس جاؤں گا تم میں سے جو بھی میرے ساتھ جائے انھیں سلام کرنے میں ابتداء نہ کرے ، اگر وہ تمہیں سلام کریں تو جواب میں صرف ” وعلیکم “ کہہ دو ۔ (رواہ احمد بن حنبل وابن ماجہ عن ابی عبدالرحمن الجھنی داحمد بن حنبل والنسائی والضیاء عن ابی بصرۃ)

25313 ۔۔۔ یہودی سلام اور آمین کہنے کی وجہ سے تمہارے اوپر حسد کرتے ہیں۔ (رواہ الخطیب والضیاء عن انس (رض))

25314 ۔۔۔ جب تم راستے میں مشرکوں سے ملو سلام میں ابتدا مت کرو بلکہ انھیں تنگ را سے میں چلنے پر مجبور کرو ۔ (رواہ ابن اسنی ، عن ابو ہریرہ (رض)) ۔ کلام : ۔۔۔ حدیث ضعیف ہے دیکھئے ذخیرۃ الحفاظ 413 و ضعیف الادب 174 ۔

25315 ۔۔۔ جب کوئی شخص اپنے مسلمان بھائی سے ملاقات کرے وہ یوں کہے : ” السلام علیکم و رحمۃ اللہ وبرکاتہ “۔ (رواہ الترمذی عن رجل من الصحابۃ)

25316 ۔۔۔ مجھے کسی چیز نے تمہیں سلام کا جواب دینے سے نہیں روکا البتہ اس وقت مجھے وضو نہیں تھا۔ (رواہ احمد بن حنبل وابن ماجہ ع المھاجر بن قنفذ)

25317 ۔۔۔ مجھے کسی چیز نے تمہیں سلام کا جواب دینے سے نہیں روکا البتہ اس وقت میں نماز پڑھ رہا تھا ۔ (رواہ مسلم عن جابر)