21079 ۔۔۔ میری امت کی عیدوں میں سے کوئی عید جمعہ کے دن سے افضل نہیں ہے۔ اور جمعہ کے دن کی دو رکعات جمعہ کے علاوہ دونوں میں ہزار رکعات پڑھنے سے افضل ہے۔ اور جمعہ کے دن ایک تسبیح کرنا اور دنوں میں ہزار تسبیحات سے افضل ہے۔ (الدیلمی ، عن انس (رض))

21080 ۔۔۔ جمعہ کا دن اور جمعہ کی رات میں چوبیس گھڑیاں ہیں اور کوئی گھڑی ایسی نہیں ہے جس میں اللہ کی طرف سے ایسے چھ سو افراد جہنم سے آزاد نہ کیے جاتے ہوں ۔ جنہوں نے اپنے اوپر جہنم واجب کرلی ہوتی ہے۔ (مسند ابی یعلی ، عن انس (رض))

21081 ۔۔۔ جمعہ کی رات (اور دن) میں چوبیس گھڑیاں ہیں اور کوئی گھڑی ایسی نہیں ہے جس میں اللہ کی طرف سے چھ لاکھ افراد جہنم سے آزاد نہ کیے جاتے ہوں جن کے اوپر جہنم واجب ہوچکی ہو۔ (الخلیلی والرافعی عن انس (رض))

21082 ۔۔۔ کوئی جمعہ کا دن ایسا نہیں ہے جس میں چھ لاکھ سے چھ لاکھ بیس ہزار تک ایسے افراد جو مستوجب نار ہیں اللہ کی طرف سے آزاد نہ کیے جاتے ہوں ، (الدیلمی ، عن انس (رض))

21083 ۔۔۔ جو جمعہ کے دن یا جمعہ کی رات میں اس اس دنیا سے کوچ کر گیا عذاب قبر سے محفوظ رہے گا اور اس کے عمل (کا ثواب) جاری رہے گا ۔ (الشیرازی فی الالقاب عن ابن عمر (رض))

21084 ۔۔۔ جو جمعہ کے دن یا جمعہ کی رات میں مرا عذاب قبر سے مامون ہوگیا ، اور وہ قیامت کے دن اس حال میں آئے گا کہ اس پر شہداء کی لگی ہوگی ۔ (حلیۃ الاولیاء عن جابر (رض))

21085 ۔۔۔ کیا میں تم کو اہل جنت کی خبر نہ دوں ؟ وہ لوگ جن کو شدید گرمی ، شدید سردی اور کوئی سخت حاجت بھی جمعہ سے باز نہ رکھ سکے ۔ (الدیلمی ، عن انس (رض))

21086 ۔۔۔ جس نے جمعہ کی نماز ادا کی اس کے لیے مقبول حج کا ثواب لکھ دیا گیا ۔ اگر اس نے عصر کی نماز پڑھی تو اس کے لیے عمرہ کا ثواب ہے اگر عصر کے بعد وہیں بیٹھے ہوئے وہ شام کر دے اور اللہ سے جو سوال بھی کرے گا اللہ پاک اس کو عطا کرے گا ۔ (الدیلمی عن ابی الدرداء (رض))

21087 ۔۔۔ مسلمان جمعہ کے دن (حاجی کی طرح) محرم ہوتا ہے۔ اگر وہ جمعہ پڑھ لیتا ہے تو حلال ہوجاتا ہے ، اگر وہ جمعہ کے بعد عصر تک بیٹھا رہے تو وہ اس شخص کی طرح ہے جس نے گویا حج وعمرہ ادا کرلیا ۔ (ابو اسحاق ابراھیم بن احمد بن سافلافی معجمہ وابن النجار عن ابن عمر (رض))

21088 ۔۔۔ جمعہ اپنے اور پہلے جمعہ کے مابین اور مزید تین ایام کے گناہوں کے لیے کفارہ ہے اور یہ اس لیے کہ فرمان خداوندی ہے۔ ” ماجاء بالحسنۃ فلہ عشر امثالھا “۔ (الانعام 160) جو شخص ایک نیکی لے کر آیا اس کے لیے دس نیکیاں ہیں ، نمازیں درمیانی اوقات کے لیے کفارہ ہیں، کیونکہ اللہ تعالیٰ کا فرمان ہے۔ مآیت)” ان الحسنات یذھبن السیئات “۔ (ھود 114) نیکیاں برائیوں کو مٹا دیتی ہیں۔ (الکبیر للطبرانی ، عن ابی مالک شعری)

21089 ۔۔۔ جمعہ سے جمعہ اور پانچ نمازیں درمیانی اوقات اور دنوں کے لیے کفارہ ہیں اس شخص کے لیے جو کبائر سے اجتناب برتے ۔ (محمد بن نصر عن ابی بکر (رض))

21090 ۔۔۔ جمعہ سے جمعہ اور پانچ نمازیں درمیانی اوقات کے لیے کفارہ ہیں جب تک وہ بڑے گناہوں سے اجتناب کرتا رہے ، جمعہ کو غسل کرنا کفارہ ہے ، جمعہ کے لیے چلنے میں ہر قدم بیس سال کے عمل کے برابر ہے، پس جب وہ جمعہ کی نماز سے فارغ ہوتا ہے تو دو سو سال کے عمل کے برابر ثواب پالیتا ہے۔ (شعب الایمان للبیہقی ، عن ابی بکر (رض))

21091 ۔۔۔ اللہ تبارک وتعالیٰ نے تم پر جمعہ لکھا ہے اس جگہ میں ، اس گھڑی میں ، اس مہینے میں ، اس سال میں ، قیامت تک ، جس نے اس کو امام عادل یا امام ظالم کے ساتھ بغیر کسی عذر کے چھوڑ دیا تو اس کا کام جمع ہوگا اور نہ اس کے کسی کام میں برکت ہوگی ، خبردار ! ایسے شخص کی کوئی نماز نہیں ، خبردار ایسے شخص کا کوئی حج نہیں ، خبردار ! ایسے شخص کی کوئی نیکی نہیں ، خبردار ! ایسے شخص کا کوئی صدقہ نہیں ۔ (الاوسط للطبرانی ، عن ابی سعید (رض))

21092 ۔۔۔ اے لوگو ! اپنے رب سے توبہ کرلو قبل اس سے کہ موت (کی نیند) میں چلے جاؤ ، آج نیک اعمال میں مشغول ہوجاؤ قبل اس سے کہ کسی مشغولیت میں پھنس جاؤ ، اور اس شخص کے ساتھ صلح رحمی برتو جو تمہارے اور تمہارے پروردگار کے درمیان واسطہ ہے ، پروردگار کا کثرت کے ساتھ ذکر اور سرا وعلانیۃ کثرت کے ساتھ صدقہ کرو ، تم کو اجر ملے گا ، تمہارے عمل کی قدر ہوگی ، تمہارے رزق میں برکت ہوگی ، تمہاری نصرت ومدد ہوگی اور تمہاری کمزوری کا مداوا ہوگا ، جان لو ! اللہ نے تم پر اس جگہ میں ، اس دن میں ، اس مہینے میں ، اس سال میں قیامت تک کے لیے جمعہ کو فرض کیا ہے جو جمعہ میں آسکتا ہو وہ میری زندگی میں اس کا انکار کردے یا اس کو بےوقعت جانے اور اس کو ترک کر دے حالانکہ اس کا کوئی امام عادل یا امام ظالم ہو تو اس کا کام جمع ہوگا اور نہ اس کے کسی کام میں کوئی برکت ہوگی ، خبردار ! اس کی کوئی نماز نہیں خبردار ! اس کی کوئی وضو نہیں ، خبردار ! اس کا کوئی حج نہیں ، خبردار ! اس کی کوئی نیکی نہیں جب تک کہ وہ توبہ نہ کرے ۔ ہاں جس نے توبہ کی اللہ اسی کی توبہ قبول کرے گا ، آگاہ رہو ! کوئی عورت کسی مرد کو امانت نہ دے ، کوئی دیہاتی کسی ہجرت کرنے والے کو امانت نہ دے ، کوئی فاسق کسی مؤمن کو امانت نہ دے مگر یہ کہ سلطان اس پر زور زبردستی کرے اور وہ اس کے ظلم وستم سے ڈرتا ہو ۔ (ابن ماجہ ، السنن للبیہقی عن جابر (رض))

21093 ۔۔۔ جمعہ ہر مسلمان پر جماعت کے ساتھ واجبی حق ہے ، سوائے چار لوگوں کے ، مملوک غلام ، عورت ، بچے اور مریض کے ۔ (ابو داؤد ، مستدرک الحاکم ، عن طارق بن شھاب)

21094 ۔۔۔ جمعہ اس شخص پر ہے جس کو رات اپنے گھر میں بسر کرنا نصیب ہو ، (الترمذی ، عن ابوہریرہ (رض))

21095 ۔۔۔ جمعہ واجب ہے مگر عورت ، بچے ، مریض ، غلام اور مسافر پر نہیں ۔ (الکبیر للطبرانی ، عن تمیم الداری) فائدہ : ۔۔۔ لیکن اگر ان میں کوئی بھی فرد جمعہ ادا کرلے تو اس سے ظہر کی نماز ساقط ہوجائے گی ۔

21096 ۔۔۔ پانچ افراد ہیں جن پر جمعہ واجب نہیں ، عورت ، مسافر ، غلام ، بچہ اور اہل دیہات ، (الاوسط للطبرانی ، عن ابوہریرہ (رض)) فائدہ : ۔۔۔ اہل دیہات پر جمعہ نہیں ہے ، لیکن اگر دیہات قصبہ کی شکل میں ہو اور وہاں کی مسجد میں پنج وقتہ نماز قائم ہو ، نیز ان کی مسجد اہل دیہات کو جمع کرسکتی ہو یعنی جامع مسجد ہو اور اہل دیہات کو اپنی روز مرہ کی ضروریات زندگی کے لیے کسی اور جگہ نہ جانا پڑتا ہو تو ان پر بھی جمعہ واجب ہے۔ (مزید تفصیل کتب فقہیہ میں ملاحظہ کریں ۔

21097 ۔۔۔ جمعہ پچاس افراد پر واجب ہے اور پچاس سے کم پر واجب نہیں ۔ (الکبیر للطبرانی عن ابی امامۃ (رض)) فائدہ : ۔۔۔ یعنی جس دیہات کے بابسیوں کی تعداد پچاس یا اس سے اوپر ہوں ان پر جمعہ واجب ہے کیونکہ وہ دیہات گاؤں نہیں بلکہ قریہ (بڑی بستی) ہے۔ اس سے یہ مراد ہرگز نہیں ہے کہ اگر مسجد میں پچاس سے کم افراد ہوں تو ان پر جمعہ نہیں ہے۔

21098 ۔۔۔ جب ہم میں سے ستر افراد جمعہ کی طرف نکلیں گے تو وہ موسیٰ (علیہ السلام) کے ساتھ جانے والے ستر افراد کے مانند ہوں گے جو اپنے پروردگار کے پاس بصورت وفد گئے تھے ، یا ان سے بھی افضل ہوں گے ۔ (الاوسط للطبرانی ، عن انس (رض))