23701 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ جب رمضان کا مہینہ بہت اچھا مہینہ ہے اس میں بہشت کے دروازے کھول دیئے جاتے ہیں جہنم کے دروازے بند کردیئے جاتے ہیں اور اس مہینہ میں سرکش شیاطین ہتھکڑیوں میں جکڑ دیئے جاتے ہیں اور اس بجز کافر کے ہر شخص کی بخشش کی جاتی ہے (رواہ الخطیب وابن النجار عن ابوہریرہ (رض))

23702 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ جب رمضان کا مہینہ آتا ہے بہشت کے دروازے کھول دیئے جاتے ہیں دوزخ کے دروازے بند کردیئے جاتے ہیں اور شیاطین بیڑیوں میں جکڑ دیئے جاتے ہیں اور ایک پکارنے والا پکارتا ہے کہ اے خیر و بھلائی کے طلبگار دربار خداوندی میں حاضر ہوجا اور اسے شر و برائی کے طالب رک جا پکارنے والا مسلسل پکارتا رہتا ہے حتی کہ یہ مہینہ بیت جائے (رواہ عن عتبۃ بن عبد)

23703 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ جب رمضان کی پہلی رات ہوتی ہے شیاطین بیڑیوں میں جکڑ دیئے جاتے ہیں اور سرکش جنات قید کرلیے جاتے ہیں دوزخ کے دروازے بند کردیئے جاتے ہیں اور اس کا کوئی دروازہ کھلا نہیں رہتا بہشت کے دروازے کھول دیئے جاتے ہیں اور اس کا کوئی دروازہ بند نہیں ہوتا اور ہر رات ایک منادی آواز لگاتا ہے کہ اے خیر کے طلبگار اللہ تعالیٰ کے دربار میں حاضر ہوجا اور اے برائی کے طلبگار رک جا ، اور اللہ تعالیٰ (رمضان المبارک کی) ہر رات جہنم سے بیشمار جہنمیوں کو آزاد کرتے ہیں۔ (رواہ الترمذی وابن ماجہ وابن حبان والحاکم فی المستدرک وابو نعیم فی الحلیۃ شعب الایمان للبیہقی عن ابوہریرہ (رض) ، ) یہ حدیث 23676 نمبر پر گزر چکی ہے۔

23704 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ جب رمضان کی پہلی رات ہوتی ہے بہشتوں کے سب دروازے کھول دیئے جاتے ہیں اور ان کا کوئی دروازہ بند نہیں رہتا ، دوزخ کے دروازے بند کردیئے جاتے ہیں اور اس کا کوئی دروازہ کھلا نہیں رہتا یہ حال پورے رمضان میں رہتا ہے سرکش جنات قید کرلیے جاتے ہیں آسمان دنیا سے ایک پکارنے والا پکارتا ہے رات سے لے کر صبح تک کہ اے خیر و بھلائی کے طلبگار دربار خداوندی میں حاضر ہوجا اور اے شر و برائی کے طلبگار (برائی سے) رک جا کیا یہ کوئی بخشش کا خواستگار کہ اس کی بخشش کی جائے ؟ کیا ہے کوئی توبہ کرنے والا کہ اس کی توبہ قبول کی جائے ؟ کیا کوئی مانگنے والا ہے کہ اس کو عطا کیا جائے ؟ کوئی دعا کرنے والا ہے کہ اس کی دعا قبول کی جائے ؟ اور اللہ تبارک وتعالیٰ افطار کے وقت ہر رات بیشمار جہنمیوں کو جہنم سے آزاد کرتے ہیں۔ (رواہ الخطیب عن ابن عباس (رض))

23705 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ جب رمضان کا مہینہ آتا ہے تو پورا مہینہ بہشتوں کے دروازے کھول دیئے جاتے ہیں اور پورا مہینہ ان میں سے کوئی دروازہ بند نہیں کیا جاتا ، پورا مہینہ دوزخ کے دروازے بند کردیئے جاتے ہیں اور کوئی دروازہ مہینہ بھر کھولا نہیں جاتا سرکش شیاطین قید کرلیے جاتے ہیں ہر رات صبح تک آسمان دنیا سے ایک منادی آواز لگاتا ہے کہ اے بھلائی کے طلبگار بھلائی کو مکمل کرلے اور خوش ہوجا اور اے برائی کے طلبگار رک جا اور بصیرت سے کام لے ۔ کیا کوئی بخشش کا طلبگار ہے کہ اس کی بخشش کی جائے ؟ کیا کوئی مانگنے والا ہے کہ اس کا مطلوب اسے عطا کیا جائے ؟ اللہ تعالیٰ رمضان کے مہینہ میں افطاری کے وقت ہر رات ساٹھ ہزار جہنمیوں کو دوزخ کی آگ سے آزاد کرتے ہیں ، پھر جب رمضان کی آخری افطار کی رات ہوتی ہے تو اس میں اتنے بیشمار لوگوں کو دوزخ کی آگ سے آزاد کرتے ہیں جتنے رمضان بھر میں (ایک ایک رات میں ساٹھ ساٹھ ہزار کو) آزاد کرچکے ہیں۔ (رواہ شعب الایمان للبیہقی عن ابن مسعود (رض))

23706 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ جب رمضان کی پہلی رات ہوتی ہے آسمان کے دروازے کھول دیئے جاتے ہیں اور کوئی دروازہ بند نہیں ہوتا حتی کہ رمضان کی آخری رات تک آسمان کے دروازے کھلے رہتے ہیں جو بندہ مومن رمضان کی کسی رات میں نماز پڑھتا ہے اللہ تعالیٰ اس کے ہر سجدہ کے بدلہ میں پندرہ سو (1500) نیکیاں لکھ دیتے ہیں (اللہ تعالیٰ جنت میں سرخ یا قوت سے علیشان مکان اس کے لیے بناتے ہیں اس کے ساٹھ ہزار دروازے ہوتے ہیں ، اس میں ایک عالیشان سونے کا محل ہوتا ہے جو سرخ یاقوت سے مزین ہوتا ہے چنانچہ جب وہ رمضان کے پہلے دن کا روزہ رکھتا ہے اس کے گزشتہ تمام گناہ معاف کردیئے جاتے ہیں اور ہر دن صبح کی نماز سے شام تک اس کے لیے ستر ہزار فرشتے استغفار کرتے رہتے ہیں اور ماہ رمضان میں وہ جو سجدہ بھی کرتا ہے خواہ دن کو یا رات کو اس کے ہر سجدہ کے بدلہ میں جنت میں ایک درخت لگا دیا جاتا ہے جو اتنا بڑا ہوتا ہے کہ سوار اس کے سائے تلے پانچ سو سال تک چلتا رہے (رواہ البیھقی فی شعب الایمان عن ابی سعید)

23707 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ جب رمضان کی پہلی رات ہوتی ہے اللہ تبارک وتعالیٰ اپنی مخلوق کی طرف نظر رحمت سے دیکھتے ہیں اور جب اللہ تبارک وتعالیٰ اپنے کسی بندہ کی طرف نظر رحمت سے دیکھ لیتے ہیں پھر اسے کبھی عذاب نہیں دیتے حق اللہ تبارک وتعالیٰ رمضان شریف میں روزانہ افطار کے وقت ایسے دن لاکھ آدمیوں کو جہنم سے خلاصی مرحمت فرماتے ہیں جو جہنم کے مستحق ہوچکے تھے جب رمضان کا آخری دن ہوتا ہے (انیسویں شب یا دتیسویں شب ) تو یکم رمضان سے آن تک جس قدر لوگ جہنم سے آزاد کیے گئے تھے ان کے برابر اس ایک دن میں آزاد فرماتے ہیں جب عیدالفطر کی رات ہوتی ہے فرشتے حرکت میں آجاتے ہیں اللہ تبارک وتعالیٰ اپنے نور کے ساتھ جلوہ افردز ہوتے ہیں باوجود اس کے کہ اللہ تبارک وتعالیٰ کا وصف بیان کرنے والے اس کا وصف نہیں بیان کرسکتے چنانچہ اللہ تبارک وتعالیٰ فرشتوں سے فرماتے ہیں درحالی کہ لوگ صبح کو اپنی عید منا رہے ہوئے ہیں : اے فرشتوں کی جماعت مزدور جب اپنی کام پورا کرلیتا ہے اس کی کیا مزدوری ہونی چاہیے ؟ فرشتے عرض کرتے ہیں اسے پوری پوری اجرت مل جانی چاہے اللہ تبارک وتعالیٰ فرماتے ہیں میں تمہیں گواہ بناتا ہوں کہ میں نے روزہ داروں کی بخشش کردی ۔ مرواہ ابن صصری فی امالیہ عن ابوہریرہ (رض))

23708 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ میری امت کو رمضان شریف کے بارے میں بارے میں پانچ چیزیں مخصوص طور پر عطا کی گئی ہیں جو پہلی امتوں کو نہیں ملی ہیں۔ ا :۔۔۔ یہ کہ ان کے منہ کی بو اللہ تبارک وتعالیٰ کے نزدیک مشک سے زیادہ پسندیدہ ہے۔ 2:۔۔۔ یہ کہ ان کے لیے فرتے استغفار کرتے رہتے ہیں اور افطار کے وقت تک کرتے رہتے ہیں۔ 3:۔۔۔ جنت ہر روز ان کے لیے آراستہ کی جاتی ہے پھر اللہ تبارک وتعالیٰ فرماتے ہیں کہ قریب ہے کہ میرے نیک بندے (دنیا کی ) مشقتیں اور اذیتیں اپنے اوپر سے پھینک کر تیری طرف آئیں ۔ 4:۔۔۔ اس میں سرکش شیاطین قید کردیئے جاتے ہیں کہ وہ رمضان میں ان برائیوں کی طرف نہیں پہنچ سکتے جن کی طرف غیر رمضان میں پہنچ سکتے ہیں۔ 5:۔۔۔ رمضان کی آخری رات میں روزہ داروں کے لیے مغفرت کی جاتی ہے صحابہ کرام (رض) نے عرض کیا : حضور اکرم (صلی اللہ علیہ وآلہ وسلم) مغٖفرت کی یہ رات شب قدر ہے ؟ فرمایا : نہیں بلکہ طریقہ یہ ہے کہ جب مزدور کام ختم کرلیتا ہے تو اسے مزدوری دے دے جاتی ہے مرواہ احمد بن حنبل ومحمد بن نصر والبیھقی فی شعب الایمان عن ابوہریرہ (رض))

23709 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ میری امت کو رمضان کے متعلق پانچ مخصوص چیزیں عطا کی گئی ہیں جو مجھ سے پہلے کسی نبی کو نہیں ملی ہیں : 1 ۔۔۔ یہ کہ جب رمضان شریف کی پہلی رات ہوتی ہے اللہ تبارک وتعالیٰ اپنے روزہ دار بندوں کی طرف نظر رحمت سے دیکھتے ہیں اور جس کی طرف اللہ تبارک وتعالیٰ نظر رحمت سے دیکھ لیتے ہیں اسے کبھی عذاب نہیں دیتے ۔ 2 ۔۔۔ یہ کہ روزہ داروں کے منہ کی بو اللہ تبارک وتعالیٰ کے نزدیک مشک سے بھی زیادہ پسندیدہ ہے۔ 3 ۔۔۔ یہ کہ روزہ داروں کے لیے فرشتے ہر دن و رات استغفار کرتے رہتے ہیں۔ 4 ۔۔۔ یہ کہ اللہ تبارک وتعالیٰ اپنی جنت کو حکم دیتے ہیں کہ تیار رہ اور آراستہ ہوجا قریب ہے کہ میرے نیک بندے دنیا کی تھکاوٹوں سے آکر تجھ میں آرام کریں تو میرا عزت والا گھر ہے۔ 5ـ۔۔۔ کہ جب رمضان شریف کی آخر رات ہوتی ہے حق تعالیٰ شانہ سب کی مغفرت کردیتے ہیں صحابہ کرام رضوان اللہ تعالیٰ عنہم اجمعین میں سے ایک آدمی نے عرض کیا : یہ مغفرت والی رات شب قدر ہے ؟ فرمایا نہیں کیا تم نہیں دیکھتے ہو کہ مزدور اپنے کاموں میں مشغول رہتے ہیں اور جب اپنے کاموں سے فارغ ہوجاتے ہیں انھیں اجرت مل جاتی ہے۔ (رواہ شعب الایمان للبیہقی عن جابر (رض)) کلام : ۔۔۔ یہ حدیث ہیثمی نے مجمع الزوائد میں (1403) ذکر کی ہے اور لکھا ہے کہ یہ حدیث احمد وبزار نے بھی روایت کی ہے اور اس میں ہشام بن زیاد ابو مقدام راوی ضعیف ہے۔

23710 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا جب رمضان شریف کا پہلا دن ہوتا ہے تو حق تعالیٰ شانہ اپنے منادی فرشتہ رضوان جو کہ بہشتوں کا خازن ہے سے فرماتے ہیں : اے رضوان ! فرشتہ کہتا ہے اے میرے آقا میں حاضر ہوں حکم ہوتا ہے کہ امت محمد (صلی اللہ علیہ وآلہ وسلم) کے روزہ داروں اور قیام کرنے والوں کے لیے بہشتوں کو آراستہ کرو اور رمضان کا مہینہ ختم ہونے تک اسے بند مت کرو جب رمضان کا دوسرا دن ہوتا ہے تو حق تعالیٰ شانہ دوزخ کے داروغہ فرشتہ مالک کو حکم دیتے ہیں کہ اے مالک دوزخ کے دروازے امت محمد (صلی اللہ علیہ وآلہ وسلم) کے روزہ داروں اور قیام کرنے والوں پر بند کر دو پھر دوزخ کے دروازے آخر رمضان تک بند کردیتے ہیں رمضان شریف کا جب تیسرا دن ہوتا ہے تو حق تعالیٰ شانہ جبرائیل (علیہ السلام) کو حکم دیتے ہیں کہ زمین پر جاؤ اور سرکش شیاطین کو قید کرو اور گلے میں طوق ڈالو اور سرکش جنات کو بھی قید کر دو تاکہ میرے روزہ دار بندوں میں فساد نہ پھیلا سکیں نیز اللہ تبارک وتعالیٰ کا ایک مقرب فرشتہ ہے جس کا سر عرش کے نیچے اور پاؤں سات زمینوں کے نیچے ہوتے ہیں اس کے دو پر ہوتے ہیں ایک مشرق میں پھیلا ہوتا ہے اور دوسرا مغرب میں ایک سرخ یاقوت کا ہوتا ہے اور دوسرا سبز زبرجدکا رمضان کی ہر رات وہ اعلان کرتا ہے کہ ہے کوئی توبہ کرنے والا کہ اس کی توبہ قبول کی جائے ؟ـ ہے کوئی استغفار کرنے والا کہ اس کی مغفرت کی جائے ؟ ہے کوئی حاجتمند کہ اس کی حاجت پوری کی جائے ؟ اے خیر کے طلبگار خوش ہوجا اے شر کا ارادہ کرنے والے رک جا اور بصیرت سے کام لے حضور اکرم (صلی اللہ علیہ وآلہ وسلم) نے فرمایا کہ حق تعالیٰ شانہ رمضان شریف میں روزہ افطار اور سحری کے وقت ایسے سات ہزار آدمیوں کو جہنم سے خلاصی رحمت فرماتے ہیں جو جہنم کے مستحق ہوچکے تھے اور جس رات شب قدر ہوتی ہے تو حق تعالیٰ شانہ حضرت جبرائیل امین (علیہ السلام) کو حکم فرماتے ہیں وہ فرشتوں کے ایک بڑے لشکر کے ساتھ زمین پر اترتے ہیں ان کے ایسے سبز رنگ کے دو پر ہیں جو موتیوں اور یاقوت سے مزین وآراستہ ہوتے ہیں اور ان دو پروں کو صرف اسی رات میں کھول لیتے ہیں چنانچہ حق تعالیٰ شانہ کا فرمان ہے (آیت)” تنزل الملائکۃ والروح فیھا باذن ربھم “ ۔ فرشتے اور روح الامین (حضرت جبرائیل امین علیہ السلام) اپنے رب کے حکم سے اترتے ہیں۔ فرشتے سدرۃ المنتہی کے نیچے ہوتے ہیں اور روح سے مراد حضرت جبرائیل امین (علیہ السلام) ہیں چنانچہ حضرت جبرائیل امین (علیہ السلام) ہر روزہ دار کھڑے اور خشکی وتری میں نماز پڑھنے والے کو سلام کرتے ہیں ” السلام علیک یا مومن السلام علیک یامؤمن “۔ حتی کہ جب طلوع فجر ہوتا ہے حضرت جبرائیل امین (علیہ السلام) اور دوسرے فرشتے واپس آسمانوں پر چلے جاتے ہیں اہل آسمان حضرت جبرائیل امین (علیہ السلام) سے پوچھتے ہیں اے جبرائیل ! حق تعالیٰ شانہ نے ” لا الہ الا اللہ “ کے وارثوں کے ساتھ کیا کیا ؟ حضرت جبرائیل امین (علیہ السلام) فرماتے ہیں ، اللہ تعالیٰ نے ان کے ساتھ خیروبھلائی کا معاملہ کیا ہے پھر اللہ تبارک وتعالیٰ کے مقرب فرشتے کروبین حضرت جبرائیل امین (علیہ السلام) سے ملاقات کرتے ہیں اور کہتے ہیں حق تعالیٰ شانہ نے ماہ رمضان میں روزہ رکھنے والوں کے ساتھ کیا معاملہ کیا ہے ؟ حضرت جبرائیل امین (علیہ السلام) فرماتے ہیں حق تعالیٰ شانہ نے ان کے ساتھ خیر و بھلائی کا معاملہ کیا ہے پھر حضرت جبرائیل امین (علیہ السلام) کے ساتھ دوسرے فرشتے بھی حق تعالیٰ شانہ کے دربار میں سجدہ ریز ہوجاتے ہیں حق تعالیٰ شانہ فرماتے ہیں : اے میرے فرشتو ! تم گواہ رہو میں نے رمضان شریف کے روزہ داروں کی مغفرت کردی بجز اس آدمی کے جس پر حضرت جبرائیل امین (علیہ السلام) نے سلام نہیں کیا چنانچہ حضرت جبرائیل امین (علیہ السلام) اس رات ان لوگوں پر سلام نہیں کرتے ۔ 1 ۔۔۔” شراب کا عادی “ 2 ۔۔۔ ’ جادو گر ۔ 3 ۔۔۔ شطرنج کھیلنے والا اور طبلہ بجانے والا ۔۔۔ والدین کا نافرمان۔ پھر جب عید الفطر ہوتی ہے فرشتے نازل ہوتے ہیں اور راستوں کے سروں پر کھڑے ہوجاتے ہیں اور کہتے ہیں : اے امت محمد رسول اللہ (صلی اللہ علیہ وآلہ وسلم) رب تعالیٰ (کے دربار) کی طرف چلو پر جب مومنین عید گاہ میں پہنچ جاتے ہیں تو حق تعالیٰ شانہ پکارتے ہیں کہ اے میرے فرشتوں ! بتاؤ کیا بدلہ ہے اس مزدور کا جو اپنا کام پورا کرچکا ہو ؟ فرشتے عرض کرتے ہیں : ہمارے معبود اس کا بدلہ یہی ہے کہ اس کی مزدوری پوری پوری دے دی جائے حق تعالیٰ شانہ فرماتے ہیں ! یہ میرے نیک بندے ہیں اور میرے نیک بندوں کی اولاد ہیں میں نے انھیں روزوں کا حکم دیا سو انھوں نے روزے رکھے انھوں نے میری اطاعت کی اور میرے فریضہ کو پورا کیا ایک منادی فرشتہ اعلان کرتا ہے اے امت محمد (صلی اللہ علیہ وآلہ وسلم) کامیاب وکامران واپس لوٹ جاؤ تمہاری مغفرت ہوچکی ہے (رواہ ابن شاھین فی الترغیب عن انس (رض) اس حدیث کی سند میں عباد بن عبدالصمد راوی ہے ذھبی کہتے ہیں یہ حدیث قصہ خوانوں کی وضع کردہ حدیث کے مشابہ ہے بیہقی شعب الاایمان میں کہتے ہیں کہ یہ حدیث حضرت انس (رض) سے بھی مروی ہے اور اس کے عام حصے منکر ہیں البتہ حضرت انس (رض) سے ایک اور طریق مروی ہے اسے ابن حبان نے ” ضعفاء “ میں روایت کیا ہے لیکن اس سند میں اصرم بن حوشب ایک کذاب راوی ہے جب کہ ابن حوزی نے اس طریق کو موجوعات میں ذکر کیا ہے اس حدیث کا ایک تیسرا طریق بھی ہے جو حضرت انس (رض) سے مروی ہے اور اسے دیلمی نے روایت کیا ہے لیکن اس کی سند میں بھی ابان متروک راوی ہے) ۔

23711 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ جنت کو شروع سال سے آخر سال تک آراستہ کیا جاتا ہے پس جب رمضان المبارک کی پہلی رات ہوتی ہے تو عرش کے نیچے سے ایک ہوا چلتی ہے جس کے جھونکوں سے جنت کے درختوں کے پتے بجنے لگتے ہیں (جس سے دلکش آواز نکلتی ہے اس آواز کو سن کر) خوشنما آنکھوں والی حوریں کھڑی ہوجاتی ہیں اور کہتی ہیں۔ اے ہمارے پروردگار اپنے نیک بندوں کو ہمارے شوہر بنا دے تاکہ وہ ہماری آنکھیں ٹھنڈی کریں اور ہم ان کی آنکھیں ٹھنڈی کریں ۔ (رواہ الطبرانی وابو نعیم فی الحلیۃ والدارقنی فی الافراد شعب الایمان للبیہقی وابوداؤد والنسائی وابن عساکر عن ابن عمرو (رض)) لیکن طریق بالا میں ولید دمشقی ایک راوی ہے اس کے بارے میں ابو حاتم کہتے ہیں یہ راوی صدوق ہے جب کہ دارقطنی اس کو متروک کہا ہے۔ یہ حدیث ایک طویل حدیث کا حصہ ہے دیکھئے ، التنزیہ 542 اولضعیفہ 1325 ۔

23712 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ جنت شروع سال سے آخر سال تک ماہ رمضان کے لیے آراستہ کی جاتی ہے اور خوشنما آنکھوں والی حوریں پورا سال رمضان کے روزہ داروں کے لیے مزین ہوتی رہتی ہیں چنانچہ جب رمضان کا مہینہ آتا ہے جنت کہتی ہے : اے میرے پروردگار مجھے اپنے نیک بندوں کا ٹھکانا بنا دے خوشنما آنکھوں والی حوریں کہتی ہیں : یا اللہ ! اس مہینہ میں اپنے نیک بندوں کو ہمارے شوہر بنا دے چنانچہ اس مہینہ میں جو شخص اپنے کسی بھائی پر بہتان نہ باندھے اور شراب نہ پیئے اللہ تبارک وتعالیٰ اس کے گناہوں کو معاف کردیتے ہیں اور جس شخص نے کسی مسلمان پر بہتان باندھا یا شراب پی لی اللہ تبارک وتعالیٰ اس کے ایک سال کے عمل کو ضائع کردیتے ہیں ، رمضان کے مہینہ سے ڈرو یہ ایک مہینہ اللہ تبارک وتعالیٰ نے تمہارے لیے مقرر کیا ہے جب کہ بقیہ گیارہ مہینے تم کھاتے پیتے ہو اور لذات سے لطف اندوز ہوتے ہو یہ ایک مہینہ اللہ تبارک وتعالیٰ نے اپنے لیے رکھا ہے اور یہ رمضان کا بابرکت مہینہ ہے۔ (رواہ البیہقی وابن عساکر عن ابن عباس (رض)) کلام : ۔۔۔ یہ حدیث ہیثمی نے مجمع الزوائد (3 ۔ 141، 142) میں ذکر کی ہے اور طبرانی نے بھی اسے کبیر میں روایت کیا ہے اس حدیث کی سند میں میباح بن بصطام ہے اور یہ ضعیف راوی ہے۔

23713 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا شروع سال سے آخر سال تک رمضان شریف کے لیے جنت آراستہ کی جاتی ہے جس شخص نے رمضان شریف میں اپنے آپ کو اور اپنے دن کو محفوظ رکھا اللہ تعالیٰ خوشنما آنکھوں والی حوروں سے اس کی شادی کرا دیتے ہیں اور اسے جنت کے عالیشان محلات میں سے ایک محل عطا فرماتے ہیں جس شخص نے اس مہینہ میں کوئی برائی کی یا کسی مومن پر بےجا تہمت لگائی یا شراب پی اللہ تعالیٰ اس کے ایک سال کے اعمال کو اکارت کردیتے ہیں ماہ رمضان سے ڈرو چونکہ یہ اللہ تبارک وتعالیٰ کا مہینہ ہے اور بقیہ گیارہ مہینے تمہارے لیے ہیں جس میں تم کھاتے ہو اور سیراب ہوتے ہو ۔ ماہ رمضان اللہ تعالیٰ کا مہینہ ہے اس میں تم اپنی حفاظت کرو ۔ (رواہ ابن صصری فی امالیہ عن ابی امامۃ واثلہ وعداللہ بن بسر معا)

23714 ۔۔۔ حضور اکرم (صلی اللہ علیہ وآلہ وسلم) نے ایک مرتبہ صحابہ کرام رضوان اللہ تعالیٰ عنہم اجمعین کو وعظ کرتے ہوئے فرمایا : اے لوگو ! تمہارے اوپر ایک مہینہ آرہا ہے جو بہت بڑا مہینہ ہے بہت مبارک مہینہ ہے ، اس میں ایک رات ہے جو ہزار مہینوں سے بڑھ کر ہے اللہ تعالیٰ نے اس کے روزہ کو فرض فرمایا ہے اور اس کے رات کے قیام (یعنی تراویح) کو ثواب کی چیز بنایا ہے جو شخص اس مہینہ میں کسی نیکی کے ساتھ اللہ کا قرب حاصل کرے ایسا ہے جیسا کہ غیر رمضان میں فرض کو ادا کیا اور جو شخص اس مہینہ میں فرض کو ادا کرے وہ ایسا ہے جیسا کہ غیر رمضان میں ستر فرض ادا کرے یہ مہینہ صبر کا ہے اور صبر کا بدلہ جنت ہے اور یہ مہینہ لوگوں کے ساتھ غمخواری کرنے کا ہے اس مہینہ میں مومن کا رزق بڑھا دیا جاتا ہے جو شخص کسی روزہ دار کو روزہ افطار کرائے اس کے لیے گناہوں کے معاف ہونے اور آگ سے خلاصی کا سبب ہوگا اور وزہ دار کے ثواب کی مانند اس کا ثواب ہوگا مگر اس روزہ دار کے ثواب میں سے کچھ کمی نہیں کی جائے گی آپ (صلی اللہ علیہ وآلہ وسلم) نے فرمایا : یہ ثواب اللہ تبارک وتعالیٰ ایک کھجور سے کوئی افطار کرائے یا ایک گھونٹ پانی پلا دے اس پر بھی رحمت فرما دیتے ہیں اور جس شخص نے روزہ دار کو پیٹ بھر کر کھانا کھلایا اللہ تبارک وتعالیٰ (قیامت کے دن ) میرے خوض سے اس کو ایسا پانی پلائیں گے جس کے بعد جنت میں داخل ہونے تک پیاس نہیں لگے گی یہ ایسا مہینہ ہے کہ اس کا اول حصہ اللہ کی رحمت ہے درمیانی حصہ مغفرت ہے اور آخری حصہ آگ سے آزدای ہے اور چار چیزوں کی اس میں کثرت رکھا کرو جن میں سے دو چیزیں اللہ تبارک وتعالیٰ کی رضا کے واسطے اور دو چیزیں ایسی ہیں جن سے تمہیں چارہ کار نہیں پہلی دو چیزیں جن سے تم اپنے اللہ تبارک وتعالیٰ کو راضی کرو کلمہ طیبہ استغفار کی کثرت ہے اور دوسری دو چیزیں یہ ہیں کہ جنت ی طلب کرو اور آگ سے پناہ مانگو۔ مرواہ ابن خزیمہ والبیھقی فی شعب الایمان والاصبھانی فی الترغیب عن سلمان ) کلام :۔۔۔ حافظ ابن حجر (رح) کہتے ہیں اس حدیث کا دارومدار علی بن زید بن جدعان پر ہے اور ضعیف راوی ہے اور اس سے یوسف بن زیاد روایت کرتا ہے اور یہ بہت ضعیفہ راوی ہے گو کہ اس کا متابع بھی ہے کہ ایاس بن عبدالغفار نے علی بن زید سے روایت کی ہے لیکن ابن حجر (رح) کہتے ہیں ایاس بن عبدالغفار کو نہیں جانتا ۔

23715 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا ہے کہ اگر لوگوں کو علم ہوتا کہ رمضان میں کیا ہے تو میری امت تمنا کرتی کہ سال بھر رمضان ہی رہے چنانچہ شروع سال سے آخر سال تک رمضان شریف کے لیے جنت کو آراستہ کیا جاتا ہے جب رمضان المبارک کا پہلا دن ہوتا ہے عرش عظٰم کے نیچے دلکش ہوا چلتی ہے جس سے جنت کے درختوں کے پتے ہلتے ہیں اور ان سے سریلی آواز پیدا ہوتی ہے خوشمنا آنکھوں والی حوریں اس منظر کو دیکھ کر کہتی ہیں : اے ہمارے پروردگار اپنے نیک بندوں میں سے اس مہینہ میں ہمارے شوہر ہمیں نصیب فرما تاکہ ان کے ذریعہ ہمری آنکھیں ٹھنڈی ہوں اور ہمارے ذریعے ان کی آنکھیں ٹھنڈی ہوں جو بندہ بھی رمضان کے ایک دن کو روزہ رکھتا ہے تو اللہ تعالیٰ خوشنما موتی کے بنے ہوئے خیمہ میں حورعین کے ساتھ اس کی شادی کرا دیتے ہیں چنانچہ فرمان باری تعالیٰ ہے (وحور مقصورات فی الخیام) (یعنی خیموں میں نظریں جھکائی ہوئی حوریں بیٹھی ہیں ) جنت کی ہر عورت کے بدن پر ستر جوڑے ہوتے ہیں جن میں سے ہرجوڑے کا رنگ الگ اور جدا ہے ہر عورت کے پاس ستر قسم کی خوشبو ہوتی ہیں جو ایک دوسرے سے جدا جدا ہوتی ہیں جنت کی ہر عورت کے پاس ستر ہزار (70000) خادمائیں ہوتی ہیں ہو خادمہ کے پاس ایک برتن ہوتا ہے جس میں رنگا رنگ کھانے سجے ہوتے ہیں ہر لقمہ کی لذت الگ اور جدا ہوتی ہے جنت کی ہر عورت کے پاس سرخ یاقوت کے بنے ہوئے ستر تخت ہوں گے ہر تخت پر ستر بچھونے بچھے ہوتے ہیں جو دبیز ریشم کے بنے ہوئے ہوتے ہیں ہو بچھونے پر ستر مسہریاں ہوتی ہیں جنتی عورت (حورعین ) کے شوہر کو بھی اسی جیسا تخت عطا کیا جاتا ہے جو سرخ یاقوت سے بنا ہوتا ہے اور خوشنما موتیوں سے سجا ہوتا ہے اس کے ہاتھوں پر سونے کے دو خوبصورت کنگن چڑھے ہوئے ہوتے ہیں یہ سب انعامات رمضان شریف کے ہر ایک دن کے بدلہ میں ہیں اور اس کی دوسری نیکیوں حساب اس کے علاوہ ہے۔ مرواہ ابن خزیمۃ وابو یعلی والطبرانی والبیھقی فی شعب الایمان عن ابی مسعود الغفاری ) کلام :۔۔۔ ابن خزیمہ نے اس حدیث کو ضعیف قرار دیا ہے حتی کہ ابن جوزی (رح) نے یہ حدیث موضوعاتا میں شمار کی ہے گو کہ ان کی ہر رائے صواب نہیں مزید دیکھے التنزیہ 1541532 والموضوعات 1892

23716 ۔۔۔ حضور اکرم (صلی اللہ علیہ وآلہ وسلم) نے ارشاد فرمایا کہ جب رمضان شریف کا مہینہ آتا ہے تو اللہ تبارک وتعالیٰ حاملین عرش کو حکم دیتے ہیں کہ تسبیح کرنے سے رک جاؤ اور حضور اکرم (صلی اللہ علیہ وآلہ وسلم) کی امت کے لیے استغفار کرو (رواہ الدیلمی عن علی (رض))

23717 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ اللہ تباوک وتعالیٰرمضان المبارک کی پہلی رات میں کل اہل قبلہ کی مغفرت فرما دیتے ہیں۔ مرواہ ابو یعلی وابن خزیمۃ والضیاء المقدسی عن انس )

23718 ۔۔۔ حضور اکرم (صلی اللہ علیہ وآلہ وسلم) کا ارشاد ہے : سبحان اللہ ! کس چیز کا تم استقبال کر رہے ہو اور کون سی چیز تمہارا استقبال کر رہی ہے ؟ وہ رمضان کا بابرکت مہینہ ہے اس کے پہلی رات میں اللہ تبارک وتعالیٰ اسن قبلہ والوں کی مغفرت فرما دیتے ہیں صحابہ (رض) نے عرض کیا : حضور اکرم (صلی اللہ علیہ وآلہ وسلم) منافق کی مغفرت بھی ہوجاتی ہے ؟ فرمایا منافق تو کافر ہے اور اس انعام میں کافر کا کچھ حصہ نہیں (رواہ البیھقفی فی شعب الایمان عن انس)

23719 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ اللہ تبارک وتعالیٰ رمضان شریف کی ہر رات چھ لاکھ انسانوں کو دوزخ کی آگ سے خلاصی مرحمت فرماتے ہیں اور جب رمضان کی آخری رات ہوتی ہے تو اس رات میں اتنی مقدار میں انسان آگ سے خلاص ہودتے ہیں جتنوں کو اس سے پہلے خلاصی مل چکی ہوتی ہے (رواہ البیھقی فی شعبن الایمان عن الحسن مرسلا)

23720 ۔۔۔ حضور اکرم (صلی اللہ علیہ وآلہ وسلم) کا ارشاد ہے کہ ہر روز افطار کے وقت بیشمار لوگوں کو دوزخ کی آگ سے آزادی ملتی ہے اور یہ امر رمضان کی ہر رات میں ہوتا ہے (رواہ ابن ماجہ عن جابر واحمد بن حنبل والطبرانی والضیاء المقدسی والبیھقی فی شعب الایمان عن ابی امامہ )