27637 ۔۔۔ حذیفہ بن یمان روایت کی ہے کہ میں نے نبی کریم (صلی اللہ علیہ وآلہ وسلم) کو دیکھا آپ ایک قوم کی کوڑے پر آئے اور کھڑے ہو کر پیشاب کیا میں نے ایک طرف ہوجانے کا ارادہ کیا آپ نے مجھے بلایا میں آپ کے قریب ہوگیا پھر آپ دور ہٹ گئے میں آپ کے پاس پانی لایا آپ نے وضو کیا اور موزوں پر مسح کیا (رواہ عبدالرزاق، وابن ابی شیبۃ و سعید بن المنصور) فائدہ : ۔۔۔ آپ (رض) نے عذر کی وجہ سے کھڑے ہو کر پیشاب کیا جیسا کہ دوسری احادیث میں آیا ہے کہ آپ کی کمر میں درد تھا بیٹھنے سے تکلیف ہوتی تھی آپ نے کھڑے ہو کر پیشاب کیا ۔

27638 ۔۔۔ ” ایضا “ ابراہیم کی روایت ہے کہ حضرت عبداللہ بن مسعود (رض) اور حضرت حذیفہ بن یمان (رض) فرمایا کرتے تھے ، مسافر موزوں پر تین دن رات تک مسح کرسکتا ہے اور مقیم ایک دن ایک رات تک مسح کرسکتا ہے۔ (رواہ عبدالرزاق)

27639 ۔۔۔ عوف بن مالک (رض) روایت کی ہے کہ نبی کریم (صلی اللہ علیہ وآلہ وسلم) نے غزوہ تبوک کے موقع پر ہمیں موزوں پر مسح کرنے کا حکم دیا نیز فرمایا : کہ مسافر تین دن تین رات تک مسح کرے اور مقیم ایک دن ایک رات ۔ (رواہ ابن ابی شیبۃ اخرج فی تاریخہ وقال ان کان ھذا محفوظا فھو حسن)

27640 ۔۔۔ ابو علاء یریم بن اسعد کی روایت ہے کہ میں نے قیس بن سعد بن عبادہ (رض) کو دیکھا انھوں نے دس سال تک نبی کریم (صلی اللہ علیہ وآلہ وسلم) کی خدمت کی چنانچہ قیس (رض) نے پیشاب کیا پھر دریائے دجلہ پر آئے اور موزوں پر مسح کیا اور انگلیاں کھول کر موزوں پر مسح کیا ، میں نے موزوں پر انگلیوں کے نشانات دیکھے ۔ (رواہ عبدالرزاق و سعید بن المنصور والبخاری فی تاریخہ وابن جریر وابن عساکر)

27641 ۔۔۔ اسماعیل بن ابراہیم انصاری کی روایت ہے کہ ان کے والد نے حدیث سنائی کہ انھوں نے سلمہ بن مخلد کو دیکھا انھوں نے پیشاب کیا پھر وضو کیا اور موزوں پر مسح کیا ۔ (رواہ الضیاء)

27642 ۔۔۔ ” مسند حصین بن عوف “ حصین بن عوف (رض) کہتے ہیں میں نے نبی کریم (صلی اللہ علیہ وآلہ وسلم) کو وضو کرایا آپ نے موزوں پر مسح کیا جبکہ سورت مائدہ نازل ہوچکی تھی ۔ (رواہ الطبرانی)

27643 ۔۔۔ جریر (رض) روایت کی ہے کہ حضرت مغیرہ (رض) کہتے ہیں نبی کریم (صلی اللہ علیہ وآلہ وسلم) نے وضو کیا پھر پیشانی پر مسح کیا اور عمامے پر بھی مسح کی ۔ (رواہ ابن ابی شیبۃ)

27644 ۔۔۔ حضرت مغیرہ (رض) روایت کی ہے کہ ایک سفر میں نبی کریم (صلی اللہ علیہ وآلہ وسلم) کے ساتھ تھا آپ نے فرمایا : اے مغیرہ ! برتن پکڑو ، میں نے برتن پکڑ لیا پھر میں آپ کے ساتھ نکل پڑا نبی کریم (صلی اللہ علیہ وآلہ وسلم) آگے بڑھتے گئے حتی کہ مجھ سے پوشیدہ ہوگئے آپ نے اپنی حاجت پوری کی پھر واپس آئے آپ نے شامی جبہ پہن رکھا تھا جو تنگ آستینوں والا تھا آپ نے آستین سے ہاتھ باہر نکالنا چاہا مگر آستین تنگ تھی آپ نے جبے کے نیچے سے ہاتھ نکالا میں نے آپ کے ہاتھوں پر پانی ڈالا آپ نے وضو کیا جیسا کہ نماز کے لیے وضو کیا جاتا ہے پھر آپ نے موزوں پر مسح کیا اور نماز پڑھی ۔ (رواہ عبدالرزاق وابن ابی شیبۃ و سعید بن المنصور)

27645 ۔۔۔ حضرت مغیرہ (رض) روایت کی ہے کہ نبی کریم (صلی اللہ علیہ وآلہ وسلم) نے اپنی حاجت پوری کی (یعنی بول وبراز سے فارغ ہوئے) پھر آئے وضو کیا اپنے سر پر مسح کیا اور موزوں پر بھی مسح کیا ۔ (رواہ ابن ابی شیبۃ و سعید بن المنصور)

27646 ۔۔۔ ” ایضا “ حضرت مغیرہ (رض) روایت کی ہے کہ نبی کریم (صلی اللہ علیہ وآلہ وسلم) نے آستین سے ہاتھ نکالنا چاہا آپ نے شامی جبہ پہن رکھا تھا جو کہ تنگ آستینوں والا تھا آپ نے ہاتھ جبے کے نیچے سے نکالا آپ نے چہرہ اور ہاتھ دھوئے پھر پیشانی (کی مقدار سر) پر مسح کیا عمامے پر مسح کیا اور موزوں پر بھی مسح کیا ۔ (رواہ ابن ابی شیبۃ)

27647 ۔۔۔ ” ایضا “ حضرت مغیرہ (رض) کہتے ہیں میں نے نبی کریم (صلی اللہ علیہ وآلہ وسلم) کو دیکھا آپ نے پیشاب کیا پھر واپس آئے اور وضو کیا موزوں پر مسح کیا آپ نے دایاں ہاتھ دائیں موزے پر رکھا اور بایاں ہاتھ بائیں موزے پر رکھا پھر آپ نے اوپر کی طرف ایک ہی مرتبہ مسح کیا ، گویا کہ میں نبی کریم (صلی اللہ علیہ وآلہ وسلم) کی انگلیوں کو موزوں پر دیکھ رہا ہوں ۔ (رواہ ابن ابی شیبۃ)

27648 ۔۔۔ حضرت مغیرہ (رض) روایت کی ہے کہ نبی کریم (صلی اللہ علیہ وآلہ وسلم) نے پیشاب کیا پھر وضو کیا جرابوں اور نعلین پر مسح کیا ۔ (رواہ ابن ابی شیبۃ)

27649 ۔۔۔ حضرت مغیرہ (رض) روایت کی ہے کہ میں نے نبی کریم (صلی اللہ علیہ وآلہ وسلم) کو موزوں اور عمامے پر مسح کرتے دیکھا ہے۔ (رواہ عبدالرزاق)

27650 ۔۔۔ حضرت مغیرہ (رض) روایت کی ہے کہ میں غزوہ تبوک میں نبی کریم (صلی اللہ علیہ وآلہ وسلم) کے ساتھ تھا راستے میں ایک جگہ آپ لشکر سے پیچھے رہنے لگے میں بھی آپ کے ساتھ پیچھے ہونے لگا آپ کے پاس پانی کا ایک برتن تھا آپ رفع حاجت سے فارغ ہو کر میرے پاس آئے میں نے آپ کے ہاتھوں پر پانی ڈالا یہ صبح کی نماز کا وقت تھا ، جب آپ نے چہرہ دھویا تو آپ نے ہاتھوں کو دھونا چاہا مگر جبے کی آستیں تنگ ہونے کی وجہ سے ہاتھ باہر نہ نکل سکا آپ نے شامی جبہ پہن رکھا تھا ، آپ نے ہاتھ تو جبے کے نیچے سے نکالے اور دونوں ہاتھ دھو لیے پھر موزوں پر مسح کیا پھر ہم لوگوں تک پہنچے اتنے میں حضرت عبدالرحمن بن عوف (رض) لوگوں کو نماز پڑھانے لگے ، میں نے عبدالرحمن (رض) کو بتانا شروع کردیا آپ (رض) نے فرمایا : اسے چھوڑ دو پھر آپ پیچھے ہٹ آئے اور (پیچھے) کھڑے ہو کر ایک رکعت پڑھی لوگ آپ کو دیکھ کر گھبرا گئے آپ نے فرمایا : تم لوگوں نے اچھا کیا ۔ (رواہ عبدالرزاق)

27651 ۔۔۔ حضرت مغیرہ بن شعبہ (رض) کی روایت ہے کہ دو چیزوں کے متعلق میں کسی سے بھی سوال نہیں کروں گا چونکہ میں نے خود رسول اللہ (صلی اللہ علیہ وآلہ وسلم) کو یہ دو چیزیں کرتے دیکھا (1) موزوں پر مسح کرنا (2) اور سربراہ کا رعیت کے پیچھے نماز پڑھنا چنانچہ میں نے نبی کریم (صلی اللہ علیہ وآلہ وسلم) کو فجر کی دو رکعتیں حضرت عبدالرحمن بن عوف (رض) کے پیچھے پڑھتے دیکھا ۔ (رواہ ابن عساکر)

276 27 ۔۔۔ حضرت مغیرہ کہتے ہیں میں نے نبی کریم (صلی اللہ علیہ وآلہ وسلم) کو موزوں کی پشت پر مسح کرتے دیکھا ہے۔ (رواہ سعید بن المنصور)

27653 ۔۔۔ حضرت مغیرہ بن شعبہ (رض) کی روایت ہے کہ ہم ایک سفر میں نبی کریم (صلی اللہ علیہ وآلہ وسلم) کے ساتھ تھے ، آپ کو یہ طریقہ تھا کہ جب رفع حاجت کے لیے جاتے تو دور تک نکل جاتے تھے اس بار بھی آپ رفع حاجت کے لیے چل پڑے اور مجھ سے فرمایا : میرے پاس وضو کا پانی لاؤ میں پانی لے کر حاضر ہوا آپ نے وضو کیا اور موزوں پر مسح کیا ۔ (رواہ الضیاء)

27654 ۔۔۔ خزیمہ بن ثابت (رض) کی روایت ہے کہ نبی کریم (صلی اللہ علیہ وآلہ وسلم) نے مسافر کے لیے موزوں پر مسح کرنے کی مدت تین دن مقرر کی ہے اور مقیم کے لیے ایک دن ۔ اگر سائل اپنا مسئلہ پیش کرتا تو آپ پانچ دن مدت مقرر فرما دیتے ۔ (رواہ عبدالرزاق وابن ابی شیبۃ والطبرانی)

27655 ۔۔۔ افکح مولائے ابی ایوب (رض) لوگوں کو موزوں پر مسح کرنے کا حکم دیتے جبکہ خود پاؤں دھوتے تھے آپ (رض) سے اس کی وجہ دریافت کی گئی کہ بھلاایسا کیوں ہے کہ آپ لوگوں کو مسح کرنے کا کہتے ہیں اور خود پاؤں دھو لیتے ہیں ، افلح (رض) نے کہا : بہت بری ہوگی بات کہ کوئی چیز تمہیں بلامشقت حاصل ہوجائے اور اس کا گناہ مجھ پر ہو ۔ حالانکہ میں نبی کریم (صلی اللہ علیہ وآلہ وسلم) کو موزوں پر مسح کر دیکھا ہے اور آپ دوسروں کو بھی اس کا حکم دیتے تھے لیکن مجھے وضو (پاؤں دھونے) سے بہت محبت ہے۔ (رواہ عبدالرزاق و سعید بن المنصور و ابن ابی شیبۃ وابو یعلی وابن جریر)

27656 ۔۔۔ ” مسند ابی بکرہ “ نبی کریم (صلی اللہ علیہ وآلہ وسلم) نے مسافر کیلئے مسح کی مدت تین دن اور تین راتیں مقرر کی ہے اور مقیم کے لیے ایک دن اور ایک رات۔ (رواہ ابن ابی شیبۃ)